“Laga Tur Boso Asuntunan Tuma Lugá cu Amor”
1 “Boso miembronan ta ègt dushi hende; nan ta comportá nan mes cu masha cortesia i respet.” E comentario ei a bini di un agencia pa congreso i bishitante di un stad na Merca cu tabata anfitrion di un di nos congresonan di distrito. Ta un animacion pa nos ora nos ricibí encomendacion asina tocante e manera cu nos ta comportá nos mes den público. Esaki ta mustra cu en general nos ta ‘laga tur nos asuntunan tuma lugá cu amor.’ (1 Cor. 16:14) Na mésun tempu, tin algun asuntu preocupante cu si no trata nan, nan lo daña e bon reputacion dje pueblo di Dios.
2 Problemanan cu Reservacion di Kamber: Den cada stad di congreso, ta establecé un Departamento di Alohamentu pa negoshá tarifanan razonabel cu hotelnan pa asina tur hende por aford di asistí n’e congreso. Nos rumannan ta gasta hopi tempu i esfuerso na nos fabor. Tin manager di algun hotel cu na promé instante a vacilá pa duna nos un tarifa mas abou debí na nan mal experencia cu otro gruponan religioso. Ora nos Departamento di Alohamentu a sigurá nan cu nos delegadonan lo cooperá cu e hotel, hopi establecimentu a keda contentu di duna nos kamber.
3 Aña pasá vários hotel a keha cu nan tabatin un cantidad abnormalmente grandi di cancelacion na último ora. Con bin? Algun delegado a boek kamber na dos hotel pero a keda sin manda un depósito na e promé hotel of notificá nan cu nan ta cancelá nan reservacion na fabor di un otro hotel. Den otro casonan, algun ruman a reservá mas cu un kamber na un hotel, pensando cu nan ta haciendo un fabor na otro rumannan cu tabata biaha cu nan. Pero ora nan a yega, nan a aceptá solamente un kamber anto cancelá sobrá. E hotelnan caminda esei a pasa, a bisa cu nunca promé esaki a sosodé cu delegadonan di Watchtower.
4 Esaki a causa problema serio pa e hotelnan i pa nos organisacion di congreso. Hotelnan ta apartá un cierto cantidad di kamber pa nos delegadonan i dor dje reservacionnan nan ta kere cu tur a yena, i na ora di congreso nan ta descubrí cu nan tin kambernan bashí. Si e problema persistí, e por bira un punto di controversia cu e hotelnan aki ora nos ta negoshá kamber pa futuro congresonan. Pa evitá esaki, nos mester haci reservacion solamente pa kambernan di hotel cu definitivamente nos lo bai usa. Ademas, mester paga un depósito di un anochi pa garantisá cada kamber reservá. Dor di haci esei nan lo warda e kamber pa bo si bo yega lat. Cu esaki na mente, bo a manda bo depósito caba pa e hotel caminda bo a boek pa keda?
5 Algun hotel cu ta ofrecé desayuno grátis a keha cu nos rumannan ta abusá dje areglo dor di bai cu gran cantidad di cos di come asta despues cu nan a come n’e hotel. Ora un hotel ta percurá cuminda mainta pa su huéspednan, mester consider’é pa loke e ta, esta, un desayuno di cortesia pa esnan cu ta hospedá ei. E intencion no ta pa nos bai cu e cosnan di come aki pa come despues of pa parti cu amigunan na congreso. Si nos abusá dje percuracion aki, lo por resultá cu e hotel ta cancelá e servicio aki, kier prijs mas haltu pa kamber of ta nenga di negoshá cu nos den futuro.
6 Obra Loke Ta Bon pa cu Tur: Amor pa Jehova i amor pa nos próhimo ta motivá bon manera i conducta ehemplar. (Mat. 22:37-39; Sant. 3:13) Bijbel ta urgi nos pa mustra amor i consideracion na tur hende. (Gal. 6:10) E principio ei ta aplicá sigur ora nos ta keda na hotel. Ora un hende no ta dispuesto pa cooperá, esei ta daña nos reputacion, ta pone nos areglo pa haña prijs reducí na peliger i ta crea rencor entre e rumannan. Si un hotel dicidí di no ofrecé nos bon tarifa mas, otro rumannan cu ta asistí n’e congreso den e stad ei por ser afectá seriamente, foral si nan no por aford un tarifa mas haltu di kamber.
7 Ora reservá un kamber di alta calidad di antemano i cancel’é na último ora, esei ta nificá cu a stroba un otro ruman di hañ’é ora e tabata purba haci un reservacion. Esaki kisas ta pone cu e mester biaha mas leu of aceptá un lugá ménos deseabel. Esei ta muestra di amor of consideracion? Cuantu mas mihó ta pa mustra amor i obra loke ta bon pa otronan dor di tin nan mihó interes na mente en bes di nos mes interes!—Mat. 7:12; Juan 13:34, 35.
8 Nos ta ansioso pa asistí n’e Congreso di Distrito “Hacidónan dje Palabra di Dios.” Bo a haci tur bo preparacionnan, incluso reservá hotel i areglonan di biahe? Laga nos conducta na hotel i den e stad di congreso semper reflehá e berdad cu ta den nos curason i nos amor pa nos Creador.