Congreso di Distrito 2001 di Testigonan di Jehova “Siñadónan dje Palabra di Dios”
1 Profeta Isaías a describí Jehova como e Magnífico Instructor, kende manera un tata ta urgi: “Esaki ta e caminda. Cana den dje.” (Isa. 30:20, 21) Pero con nos por tende e palabranan cu Jehova ta papia pa nos beneficio? Jehova ta papia cu su pueblo mediante e páginanan di Bijbel i tambe mediante publicacionnan basá riba Bijbel, reunionnan, programanan di circuito i congresonan di distrito percurá dor di “e esclabo fiel i discreto.” (Mat. 24:45) Nos por ta gradicidu na Jehova cu e ta sigui dirigí nos den e caminda den cua nos mester cana.
2 Tur aña, e congreso di distrito ta duna nos e oportunidad di reuní cu compañeronan creyente i scucha atentamente na e instruccionnan di Jehova. Aña pasá, na islanan ABC 3.887 persona a asistí na e Congresonan di Distrito “Hacidónan dje Palabra di Dios” cu tabata spiritualmente refrescante. Durante aña 2001 lo tene vários Congreso di Distrito “Siñadónan dje Palabra di Dios” den e teritorio. Nos sa cu boso ta ansioso pa haci boso areglonan pa asistí, p’esei nos ta percurá e siguiente informacion pa boso considerá.
3 Yudando Esnan cu Necesidadnan Special: Hende di edad, esnan enfermo, esnan den sirbishi di tempu completo of otronan podisé tin mester di yudansa pa asistí na e congreso. Famia, ancianonan i otro rumannan den congregacion cu ta na altura dje circunstancianan único di esnan cu tin necesidadnan special, amorosamente por haci e areglonan necesario. No mester pusha e responsabilidad di famia i di congregacion riba lomba dje organisacion di congreso.—1 Tim. 5:4.
4 Asistiendo na un Otro Congreso: Si bo mester di informacion relacioná cu un otro congreso, e secretario di congregacion por obtené e informacion necesario cerca Sucursal pa bo.
5 Conclusion: Segun cu tempu pa bo asistí na bo congreso di distrito ta acercá, hacié un asuntu di oracion na Jehova pa bo por ta presente na tur sesion riba tur tres dia i saca e mayor probecho dje programa. Bo a pidi dia liber caba na trabou pa e tres dianan dje congreso na cua bo tin planeá pa asistí? Si no ta asina, hacié mas pronto posibel. Por lo general trabou no ta duna bo dia liber ora bo pidi na último momento. E esclabo fiel i discreto a haci areglo pa e Congreso di Distrito dje aña aki “Siñadónan dje Palabra di Dios,” percurá instruccion spiritual pa nos i edificá nos fe. Pues cuminsá traha plan awor pa ta presente, siguiendo e conseho dje salmista: “Den multitudnan congregá bendicioná Dios”!—Sal. 68:26.
[Box on page 3]
Ora di Programa
Diabierne i Diasabra
9:30 a.m. – 5:00 p.m.
Diadomingo
9:30 a.m. – 4:00 p.m.