Kongreso di Distrito 2004 di Testigunan di Yehova “Kana ku Dios”
1 Kiko ta hasi nos kongresonan di distrito ku ta tuma lugá tur aña algu spesial pa bo? E diskursonan edifikante i e drama ku “e esklabo fiel i prudente” ta prepará pa nos? (Mat. 24:45-47) Publikashonnan nobo ku ta kontené alimento spiritual oportuno? Rumannan ku ta konta nan eksperensianan ku ta mustra kon Beibel a kambia nan bida? Informenan ku ta indiká kon e trabou di prediká e Reino ta progresando den otro paisnan? Asosiashon ku kompañeronan di fe di tur edat? Sí, pa e motibunan aki i hopi otro mas, nos ta spera ansiosamente riba nos kongresonan!
2 Asistí Tur Tres Dia: Mediante Moisés, Yehova a duna e mandato: “Reuní e pueblo . . . pa nan tende i siña.” (Deu. 31:12) Mediante e esklabo fiel i prudente, Yehova a prepará pa nos un programa spesial di edukashon riba kada dia di nos kongreso. Siendo ku Yehova ta siña nos pa nos “prosperá,” nos kier ta presente pa risibí tur su instrukshonnan. (Isa. 48:17) Si bo tin ku pidi bo doño di trabou dia liber, sigui e ehèmpel balente di Nehemias: hasi orashon na Yehova anto pidi bo doño di trabou. (Neh. 1:11; 2:4) Tambe lo ta amoroso di bo parti pa, mas pronto posibel, bo informá miembronan di bo famia ku no ta kreyente di bo plannan pa bai kongreso.
3 Nesesidatnan Spesial: Apòstel Pablo a rekordá e kongregashonnan na Galasia pa “hasi bon na tur hende, i spesialmente na esnan ku ta di e famia di fe.” (Gal. 6:10) Ounke rumannan di edat, esnan enfermo, mayornan soltero òf rumannan den sirbishi di tempu kompletu kisas no ta pidi bo yudansa, tòg nan lo por tin algun difikultat pa vense pa nan por asistí na e kongreso. Bo ta den posishon pa “hasi bon” na nan i duna nan un man? Foral miembronan kristian di nan famia i e ansianonan mester ta konsiente di e sirkunstansia di e rumannan ei.
4 Ora di Asistí na un Otro Kongreso: Podisé bo sirkunstansianan ta pone ku bo tin ku asistí na un kongreso ku no ta esun na kua bo kongregashon ta asigná. Si bo tin mester di informashon tokante un otro kongreso, sea asina bon di aserká e sekretario di bo kongregashon. E na su turno por tuma kontakto ku e ofisina di sukursal pa haña e adrès di e sede di kongreso. E ora ei bo por manda bo petishon na e adrès indiká. Si tin dos òf mas kongreso den e stat, hasi sigur ku bo petishon ta indiká e fecha di e kongreso ku bo ta deseá di asistí. E Departamentu di Alohamentu pa e kongreso ei lo manda pa bo e Lista di Alohamentu Rekomendá di mas resien.
5 Na un kongreso di e pueblo di Yehova ku a tuma lugá kasi 2.500 aña pasá, Esdras i su kompañeronan levita a lesa for di e Palabra di Dios i a splik’é na e hendenan ku a reuní. Kiko tabata e resultado? Nehemias 8:12 ta konta nos ku “henter e pueblo a bai . . . pa selebrá un gran fiesta, pasobra nan a komprondé e palabranan ku a wòrdu spliká na nan.” Nos no ta gradisidu ku e esklabo ungí, meskos ku Esdras i e levitanan, ta usa e Palabra di Dios, ta splik’é i ta mustra nos kon pa aplik’é den nos bida? Di e manera aki e esklabo ta reflehá Yehova su amor i interes sinsero pa henter Su pueblo. Sea determiná pa no falta niun dia di e Kongreso di Distrito “Kana ku Dios”!
[Box on page 3]
Orario di e Programa
Djabièrnè i Djasabra
9:30 a.m. - rònt di 5:10 p.m.
Djadumingu
9:30 a.m. - rònt di 4:05 p.m.