Kongreso di Distrito 2006 di Testigunan di Yehova “Liberashon Ta Serka”
1 Rei Ezekias di Huda di antigwedat a usa mensaheronan pa kore entregá kartanan ku a konvoká e pueblo pa reuní na Yerusalèm. (2 Kró. 30:6, 13) E reakshon di e pueblo a revelá nan aktitut pa ku adorashon berdadero. (2 Kró. 30:10-12) Den e lunanan binidero, sirbidónan di Yehova djawe lo tin un oportunidat similar pa demostrá nan apresio sinsero pa e privilegio di por reuní huntu pa adorá Yehova. Un karta a keda entregá na boso kongregashon ku ta invitá boso pa asistí na e Kongreso di Distrito “Liberashon Ta Serka.” Kon abo lo reakshoná riba e invitashon ei?
2 Hasi Areglo for di Awor: Pa benefisiá plenamente di e programa spiritual ku ta ser prepará ku amor, nos mester ta presente pa henter e programa. Ta sabí pa bo kuminsá hasi for di awor tur e areglonan nesesario pa abo i bo famia por asistí tur e tres dianan. (Pro. 21:5) E preparashon ei kisas ta enserá pidi dia liber di bo doño di trabou, papia tokante bo plannan ku bo kasá si e no ta Testigu i yuda studiantenan di Beibel pa nan por asistí kada dia. No laga e asuntunan importante aki pa último ora. Mas bien, papia ku Yehova tokante nan den orashon, ku e konfiansa ku ‘e lo aktua.’—Sal. 37:5, NW.
3 Yehova su organisashon a traha duru pa hasi sigur ku lo tin sufisiente akomodashon disponibel na tur stat kaminda ta tene kongreso. Loke mester motivá nos pa koperá plenamente ku e instrukshonnan presentá den e artíkulo aki ta apresio pa e esfuersonan apnegá di e rumannan ku a traha duru pa yuda hasi e areglonan aki, konsiderashon pa e otro delegadonan di kongreso i rèspèt pa órden teokrátiko.—1 Kor. 13:5; 1 Tes. 5:12, 13; Heb. 13:17.
4 Nesesidatnan Spesial: Proverbionan 3:27 ta bisa: “No laga di hasi bon na esnan ku meresé esaki, si ta den bo poder pa hasié.” Kon bo por hasi bon na otro rumannan en konekshon ku e kongreso? Publikadónan di mas edat, esnan enfermo, esnan den sirbishi di tempu kompletu i otronan kisas tin mester di yudansa práktiko ku transpòrt òf alohamentu. Miembronan di famia tin e responsabilidat prinsipal di perkurá pa e nesesidatnan di personanan asina. (1 Tim. 5:4) Sin embargo, si nan no por, rumannan den fe kisas lo por duna un man. (Gal. 6:10) Hopi promé ku e dianan di kongreso, superintendentenan di estudio di buki mester tuma kontakto ku e rumannan den nan grupo ku tin nesesidat spesial pa hasi sigur ku nan plannan ta na òrdu.
5 E formularionan di Solisitut pa Alohamentu pa Esnan Ku Tin Nesesidat Spesial ta disponibel solamente pa publikadónan ku tin nesesidat di alohamentu pasobra nan miembronan di famia òf nan kongregashon no por perkurá pa esei. E Komité di Sirbishi di Kongregashon mester konsiderá e publikadó su kualifikashonnan, usando e puntonan ku e formulario ta menshoná i tambe e karta fechá 14 di desèmber 2005, dirigí na tur kuerpo di ansiano. E provishon aki ta solamente pa publikadónan ku tin bon reputashon, i pa nan yunan ku tin bon komportashon.
6 Ora di Asistí na un Otro Kongreso: Pa hasi sigur ku lo tin sufisiente asiento, literatura, alohamentu, etcetera, nos ta animá bo pa asistí na e kongreso na kua bo kongregashon ta asigná. Si sirkunstansia ta pone ku bo mester asistí na un otro kongreso, por fabor tuma kontakto ku bo sekretario di kongregashon pa haña e adrès di e lugá di kongreso kaminda lo bo asistí. Si ta bai tin mas ku un kongreso den e stat, hasi sigur di e fechanan di e kongreso na kua lo bo asistí.
7 Boluntarionan Dispuesto pa Sirbi: No tin duda ku tur ku asistí na e kongreso i benefisiá di e kuminda spiritual i di e oportunidatnan pa tin asosiashon edifikante, lo risibí hopi goso. Nos felisidat lo ta asta mas grandi si nos ofresé nos mes boluntariamente pa yuda ku e trabou ku tin ku ser hasí pa e kongreso por ta un éksito. (Echo. 20:35) Denter di poko, Komiténan lokal di Kongreso lo kuminsá invitá otro rumannan pa partisipá den e trabou aki. Abo por pone bo mes disponibel?—Sal. 110:3.
8 Durante un kongreso di distrito, un mucha hòmber di sinku aña a bisa: “Kongreso di distrito ta e parti ku mi ta gusta mas tantu di adorá Yehova.” E komentario sinsero ei ta yuda nos tur realisá kuantu nos ta disfrutá di asistí na nos kongreso anual di distrito. Di bèrdat ta manera e salmista a kanta: “Un dia den bo pationan ta mihó ku mil dia pafó.” (Sal. 84:10) David a ekspresá den kantika su deseo di por a ‘keda den e kas di Yehova tur e dianan di su bida, pa asina meditá ku apresio den su tèmpel.’ (Sal. 27:4) Pa David tabata un gran plaser di por ta entre e adoradónan di Yehova. Laga nos imitá su apresio pa adorashon berdadero dor di ta presente tur e tres dianan di e Kongreso di Distrito “Liberashon Ta Serka.”
[Study Questions]
1. Kon Dios su pueblo di antigwedat a demostrá nan apresio pa adorashon berdadero, i ki oportunidat similar nos tin awe?
2. Kiko nos por hasi for di awor pa asina benefisiá plenamente di e kongreso?
3. Dikon nos mester koperá ku e areglonan ku a keda hasí pa nos akomodashon?
4, 5. Kon por perkurá pa publikadónan ku tin nesesidat spesial?
6. (a) Dikon nos tin ku asistí na e kongreso na kua nos ta asigná? (b) Ki pasonan bo tin ku dal si sirkunstansia ta pone ku bo tin ku asistí na un otro kongreso?
7. Kua ta un manera ku nos por kontribuí na e goso di e binidero kongreso?
8. Kiko abo ta apresiá di e kongreso anual di distrito, i kiko lo mester ta bo determinashon?
[Box on page 3]
Orario di e Programa
Djabièrnè i Djasabra
9:30 a.m. - 5:05 p.m.
Djadumingu
9:30 a.m. - 4:10 p.m.