Kongreso di Distrito 2007 di Testigunan di Yehova “Sigui e Kristu!”
1 Moisés a instruí tur israelita i residente stranhero pa reuní huntu kada shete aña pa tende lesamentu di e Lei. Ku ki propósito? “Pa nan tende i siña.” (Deu. 31:10-12) Yehova a haña ku ta nesesario pa reuní su pueblo den grupo grandi. Pronto, e pueblo di Yehova lo reuní atrobe pa e Kongresonan di Distrito “Sigui e Kristu!” di tres dia.
2 Bo a kuminsá hasi preparashon? Bo tin ku pidi bo doño di trabou liber? Bo por yuda bo studiantenan di Beibel òf miembronan di famia ku no ta Testigu bai kongreso huntu ku bo? Tin otro hende den e kongregashon ku tin mester di yudansa pa nan por asistí? Bo ta planiando pa asistí na un kongreso kaminda bo kongregashon no ta asigná? E siguiente informashon lo yuda bo prepará.
3 Asistí Tur Tres Dia: Yehova ta perkurá un abundansia di kuminda spiritual pa su pueblo. (Isa. 25:6) Esaki ta inkluí e bankete spiritual ku ta ser sirbí na nos kongresonan anual. Ta riparabel ku e asistensia riba djabièrnè ta hopi mas abou ku e otro dianan. Pone komo meta pa ta presente tur e dianan refreskante di e kongreso ku Yehova su organisashon a prepará pa nos! Si bo tin ku tuma liber di trabou, hasi orashon tokante e asuntu. Kaba, tuma “kurashi” i papia ku bo doño di trabou asina ku anunsiá e fechanan di bo kongreso. (1 Tes. 2:2; Neh. 2:4, 5) Kisas ta bon pa splik’é ku bo kongreso anual ta parti di bo adorashon. Si bo hasi esaki na tempu, por bira mas fásil pa bo doño di trabou hasi ahustenan pa kumpli ku bo petishon.
4 Prepará Bo Studiantenan di Beibel i Bo Famia: Lo ta un plaser pa bo studiantenan di Beibel asistí na e kongreso huntu ku bo. Asina nan mes por eksperensiá e kalor di nos hermandat kristian “den e gran asamblea”! (Sal. 22:25) Informá nan hopi tempu di antemano pa asina nan por apartá tempu pa asistí. Splika nan dikon abo personalmente ta gusta bai e kongresonan. Bo por mustra nan nos vidionan ku ta kontené esenanan di kongresonan anterior, spesialmente e vidio Uní pa Medio di Siñansa Divino, preparando nan asina pa loke nan por ferwagt. Laga miembronan di famia ku no ta Testigu tambe sa kiko bo plannan ta. Podisé nan por saka tempu pa bai wak e drama òf pa asistí na por lo ménos un dia di e kongreso huntu ku bo.
5 Yuda Bo Rumannan: Apòstel Pablo a konsehá kristiannan ku tabata riku materialmente “pa hasi bon, pa nan ta riku den bon obra, pa nan ta generoso i dispuesto pa kompartí.” (1 Tim. 6:17, 18) Nos por demostrá e disposishon generoso ku Pablo a promové. Un manera ku nos por hasi esei ta dor di konsiderá e situashon di rumannan di edat i esnan enfermo, rumannan den sirbishi di tempu kompletu, famianan di un mayor so i kisas otronan den e kongregashon ku lo por tin mester di yudansa pa asistí na e kongreso. Ounke e responsabilidat prinsipal pa yena e nesesidatnan aki ta kai riba e miembronan di famia den e bèrdat, ansianonan i otro rumannan tambe por mustra disernimentu i duna yudansa bondadoso si esei ta nesesario.—Gal. 6:10; 1 Tim. 5:4.
6 Si un miembro di e kongregashon tin mester di yudansa pa haña alohamentu, e Komité di Sirbishi di Kongregashon mester disidí si e publikadó ta kualifiká pa yena un formulario Solisitut pa Alohamentu pa Esnan Ku Tin Nesesidat Spesial.
7 Ora di Asistí na un Otro Kongreso: Pa hasi sigur ku lo tin sufisiente asiento, literatura, alohamentu, etcetera, nos ta animá bo pa asistí na e kongreso na kua bo kongregashon ta asigná. Si sirkunstansia ta pone ku bo mester asistí na un otro kongreso, por fabor tuma kontakto ku bo sekretario di kongregashon pa haña e adrès di e lugá di kongreso kaminda lo bo asistí. Si ta bai tin mas ku un kongreso den e stat, hasi sigur di e fechanan di e kongreso na kua lo bo asistí.
8 Koperá ku e Areglonan: Ora nos yega e sitio di kongreso, nos ta mira mesora ku e rumannan a hasi hopi trabou di antemano sperando nos yegada. Ruman hòmbernan amoroso ku ta sirbi komo ùsher ta kumindá nos, duna nos programa i yuda nos haña asiento. Rumannan a yuda limpia e lugá i a drecha un bunita plataforma. Hopi trabou importante tambe a ser hasí tras di kortina pa prepará e partinan riba e programa i pa perkurá pa un kantidat di otro detaye.
9 Pa kada kongreso tin hopi ruman ku ta traha lunanan largu pa hasi e areglonan nesesario, i nan famianan tambe ta kontribuí ya ku nan ta permití nan usa nan tempu pa perkurá pa e asuntunan importante ei. Nos ta apresiá e sakrifisionan ku e rumannan a hasi pa nos benefisio personal, no ta bèrdat? Un manera ku nos por mustra nos gratitut ta di kumpli ku e instrukshonnan den e artíkulo aki i ku tur otro guia ku nos lo por risibí promé ku nos kongreso. (Heb. 13:17) Un koperashon boluntario di tur persona ta hasi posibel pa tur kos “sosodé korektamente i na un manera ordená.”—1 Kor. 14:40.
10 Segun ku nos “ta mira ku e dia ta yegando serka,” e reunionnan di e pueblo di Yehova ta bira muchu mas importante. (Heb. 10:25) Na nos kongresonan kristian, e esklabo fiel i prudente ta duna nos informashon ku ta yuda nos “perkurá di kumpli ku tur e palabranan” ku Yehova ke pa nos kumpli kuné. (Deu. 31:12) Kuminsá plania for di awor pa asistí na tur e tres dianan di e Kongreso di Distrito “Sigui e Kristu!” i asina benefisiá di tur e instrukshon spiritual i kompañerismo plasentero!
[Study Questions]
1, 2. (a) Kon Moisés a animá e israelitanan pa benefisiá di nan reunimentu huntu? (b) Ki preparashonnan nos tin ku kuminsá hasi for di awor?
3. (a) Kon Isaias 25:6 ta kumpliendo den nos tempu? (b) Kiko ta riparabel di e asistensia riba djabièrnè di kongreso, i kiko nos kada un personalmente mester hasi?
4. Kon nos por prepará nos studiantenan di Beibel i nos famianan ku no ta Testigu pa e kongreso?
5, 6. (a) Kon nos por demostrá e disposishon generoso ku 1 Timoteo 6:18 ta papia di dje? (b) Kiko por ser hasí pa un miembro di kongregashon ku tin mester di yudansa pa haña alohamentu?
7. (a) Dikon nos tin ku asistí na e kongreso na kua nos ta asigná? (b) Ki pasonan bo tin ku dal si pa motibu di sirkunstansia bo tin ku asistí na un otro kongreso?
8, 9. (a) Ki preparashonnan rumannan a hasi pa nos promé ku nos yega e sitio di kongreso? (b) Kon nos por mustra apresio i gratitut pa tur e trabounan ku rumannan a hasi pa nos benefisio? (Lesa Hebreonan 13:17.)
10. (a) Dikon e reunionnan di e pueblo di Yehova ta asina importante den nos tempu? (b) Kiko kada un di nos por hasi for di awor?
[Box on page 3]
Program Times
Djabièrnè i Djasabra
1:30 p.m. - 8:45 p.m.
Djadumingu
1:30 p.m. - 8:00 p.m.