Kaha di Pregunta

◼ Kon nos por determiná si nos lo laga literatura ku un persona?

E kos mas importante pa tene kuenta kuné ta e hende su interes. Si e mustra berdadero interes, nos por lag’é ku sea dos revista, un foyeto, un buki òf e literatura ku nos tin komo oferta. Nos ta hasi esaki asta ora nos nota ku e no por duna nada òf kasi nada pa e obra mundial. (Yòb 34:19; Rev. 22:17) Sinembargo, nos no mester laga nos literatura balioso den man di esnan ku no ta apresiá nan.—Mat. 7:6.

Kon nos por sa ku un doño di kas tin interes? E echo ku e ta dispuesto pa kòmbersá ku nos ya kaba ta un bon señal. E manera ku e ta presta atenshon, kontestá nos preguntanan, duna su opinion i sigui lesamentu di teksto di Beibel ta un indikashon ku e tin interes i ku e tin un grado di rèspèt pa e Palabra di Dios. Apesar di tur esei, tòg ta bon pa puntra e persona si e lo lesa e literatura ku nos ke ofresé. Publikadónan mester usa sano huisio pa determiná un persona su interes. Por ehèmpel, lo no ta sabí pa ora nos ta prediká den kaya nos ofresé revista, foyeto òf buki pa loko na tur hende ku kana pasa. Si nos no por determiná si un persona tin interes, ta mihó dun’é un pamfleta òf tratado.

Di igual manera, e kantidat di literatura ku un publikadó tuma mester ta di akuerdo ku loke e tin mester pa traha den sirbishi, i no a base di kuantu e por kontribuí. Donashon no ta pa paga pa literatura, sino pa yuda den tur aspekto di e obra mundial di prediká. Sea kual sea nos situashon finansiero, nos apresio mester motivá nos pa promové interes di e Reino kontribuyendo generosamente for di nos nesesidat i no for di loke nos tin di mas. (Mar. 12:41-44; 2 Kor. 9:7) Esaki tambe lo motivá nos pa tuma solamente literatura ku nos tin mester, pa asina no dispidí e rekursonan di nos organisashon.

[Komentario di e plachi na página 2]

Publikadónan mester usa sano huisio pa determiná un persona su interes