No Tene Miedu di Prediká den Negoshi
1. Si nos tin miedu di prediká den negoshi, dikon nos no mester pèrdè ánimo?
1 E idea so di prediká den negoshi sa duna bo miedu? Si esei ta e kaso, no pèrdè ánimo, pasobra apòstel Pablo mes, kende tabata un hòmber balente, mester a “tuma un kurashi” pa prediká. (1 Tes. 2:2) Ban trata algun pregunta ku sa bini dilanti i tambe algun sugerensia práktiko.
2. Dikon bo no mester pensa ku bo ta stroba e trahadó?
2 E Trahadó Lo Pensa Ku Mi Ta Strob’é? Den hopi negoshi, e deber di un trahadó ta di stòp ku loke e ta hasi i atendé e hende ku kana drenta. Ademas, mayoria di biaha nan ta masha kortes, ya ku nan por mira bo komo un posibel kliente. Si bo ta amabel i ta bisti na un manera representabel, nan lo trata bo ku rèspèt.
3. Kiko bo por hasi pa e klientenan no rabia?
3 Mi Tin Ku Prediká ora Tin Hopi Kliente? Lo ta bon pa skohe un momento ku no tin hopi kliente den e negoshi, por ehèmpel ora e habri. Pa e klientenan no rabia, warda te ora e gerente òf e trahadó ta su so promé ku bo aserk’é; anto tene bo presentashon kòrtiku.
4. Kiko bo por bisa ora bo ta prediká den negoshi?
4 Kiko Mi Por Bisa? Si den e negoshi tin vários trahadó, papia ku e persona enkargá. Bo por bis’é: “Masha poko biaha nos ta haña hende ku ta traha den negoshi na kas; p’esei nos ta bishitá nan na trabou. Mi sa ku bo ta trahando, pues lo mi ta masha breve.” Pa evitá ku nan por konfundí bo ku un “salesman,” kisas ta mihó pa no trese e punto di donashon dilanti, a ménos ku nan ke sa kon nos trabou ta ser finansiá. Dependiendo di e tipo di negoshi, bo por puntra e gerente si bo tin mag di papia brevemente ku e otro trahadónan. Usa e mesun presentashon ku nan. Si un trahadó ta okupá, kòrta bo presentashon i laga un tratado p’e. Si no ta posibel pa papia ku e otro trahadónan, puntra si bo por laga literatura den e kantina òf na un otro lugá.
5. Kiko ta duna nos motibu pa prediká ku kurashi den teritorio di negoshi?
5 Hesus i Pablo a prediká ku kurashi na hende ku nan a haña na nan lugá di trabou, i bo tambe por hasié. (Mat. 4:18-21; 9:9; Echo. 17:17) Pidi Yehova duna bo kurashi i pa yuda bo keda trankil. (Echo. 4:29) Un kos ta sigur, den teritorio di negoshi semper lo bo haña hende pa papia kuné. Pues, dikon no purba e forma di prediká akí?