Kon pa Prediká den Teritorio di Negoshi
1 Lo bo tin gana di prediká den teritorio kaminda hende por lo general ta risibí bishitantenan kordialmente i kaminda masha poko biaha no tin hende na kas? Kisas tin áreanan den e teritorio di bo propio kongregashon kaminda bo por eksperensiá esaki. Kon? Dor di bishitá e negoshinan den bo teritorio. Publikadónan ku ta prediká di negoshi pa negoshi hopi bes ta haña bon resultado.
2 Algun kongregashon tin áreanan di negoshi komo parti di nan teritorio asigná. Kisas e ruman enkargá ku teritorio por prepará karchi spesial di teritorio pa e sekshonnan aki ku tin un konsentrashon grandi di negoshi. Si tin karchi di teritorio normal ku ta inkluí e sekshonnan aki di negoshi, mester indiká bon kla riba nan ku no mester traha e negoshinan komo parti di e teritorio. Den otro teritorionan, ta posibel pa traha e negoshinan ora ku ta traha di kas pa kas. Si nunka bo no a prediká den negoshi, kuminsá dor di prediká na un par di negoshi chikí.
3 Usa un Introdukshon Simpel: Ora bo ta prediká di negoshi pa negoshi, ta importante pa bo bisti manera ora bo ta bai reunion na Salòn di Reino. Tambe ta bon pa skohe un ora ku e negoshi no ta drùk. Si ta posibel, drenta ora ku no tin kliente ta para warda pa wòrdu yudá. Pidi pa papia ku e manager òf e persona enkargá. Sea breve i al kaso. Kiko lo bo por bisa?
4 Si bo ta papia ku e doño òf manager, lo bo por bisa algu den e direkshon aki: “Komersiantenan ta asina drùk ku masha poko biaha nos ta topa nan na kas, p’esei nos ta bishitá bo na bo trabou. Nos revistanan ta duna un perspektiva mundial riba asuntunan aktual.” Anto presentá un punto breve for di un revista.
5 Òf lo bo por purba e introdukshon simpel aki: “Hopi hende lo tin gana di sa mas tokante Beibel pero nan tin masha tiki tempu. E tratado aki ta splika tokante un programa di studio grátis ku tin disponibel pa yuda bo haña kontesta riba bo preguntanan bíbliko.” Anto mustr’é página 4-5 di e tratado Lo Bo Kier Sa Mas Tocante Bijbel?
6 Si e persona enkargá ta parse okupá, lo bo por djis ofresé un tratado i bisa: “Lo mi pasa bèk atrobe ora bo no ta dje okupá ei. Lo mi tin gana di sa kiko bo ta pensa di e tratado aki.”
7 Kon pa Kultivá e Interes: Kisas bo por asta kondusí un studio di Beibel den teritorio di negoshi. Un pionero spesial tabata entregá revista regularmente na un komersiante. Ora e hòmber a ekspresá apresio pa loke e tabata lesa, e pionero a dun’é un demostrashon di e areglo di studio di Beibel, usando e foyeto Rekerí. El a kuminsá un studio einan kaminda e hòmber ta traha. Teniendo kuenta ku e sirkunstansia, e pionero tabata limitá e studio na 10 pa 15 minüt. Di igual manera, laga nos tambe sigui buska hende meresedor dor di prediká den teritorio di negoshi.
[Study Questions]
1. Menshoná algun bentaha di prediká den teritorio di negoshi.
2. Kon por organisá e predikashon di negoshi?
3. Kiko lo yuda nos pa ta efektivo ora di prediká di negoshi pa negoshi?
4-6. Kiko nos por bisa ora nos ta prediká na e doño òf manager?
7. Kon nos por kultivá e interes ku nos haña den teritorio di negoshi?