Bo Tin un Teritorio Personal?
1 Un teritorio personal ta un teritorio ku a ser asigná na abo. Kisas e ta serka di bo kas pa asina bo por yega na dje fásilmente i prediká sea bo so òf huntu ku un otro publikadó. Ounke ta bon pa apoyá areglonan di kongregashon pa bai prediká den grupo ora esei ta posibel, si bo ta traha den un teritorio personal na otro okashonnan, lo bo por duna un testimonio kabal, spesialmente den kaso di kongregashonnan ku tin hopi teritorio.—Echo. 10:42, NW.
2 Benefisionan: Algun publikadó a ripará ku ta mas benefisioso pa prediká durante nan pousa òf djis despues di trabou den un teritorio personal ku ta keda serka di nan trabou. Otronan a traha dushi huntu komo famia den e área di nan kas pa mas o ménos un ora promé ku e Estudio di Buki di Kongregashon. Komo resultado, e rebishita- i estudionan di Beibel ku nan a haña den e teritorio ei tabata den bisindario; asina nan a spar energia, tempu i plaka. Ora bo tin un teritorio personal, bo por hasi mas den ménos tempu. P’esei, esaki lo por yuda algun di nos traha komo pionero ousiliar de bes en kuando òf asta kuminsá den e sirbishi di pionero regular. Ademas, ora nos ta traha den un teritorio personal, nos ta siña konosé e doñonan di kas bon, i esaki por yuda nos gana nan konfiansa i adaptá nos presentashon na loke ta interesá nan. Esei ta hasi nos ministerio mas efektivo.
3 Un pionero ku e superintendente di sirkuito a animá pa pidi un teritorio personal a konta: “Mi a sigui su konseho, i no a dura mashá ku tur e doñonan di kas den mi teritorio tabata konosé mi i tabata amigabel ku mi. Mi a ahustá e orario di mi bishitanan na nan kumbinensia. Un di e resultadonan tabata ku mi rebishitanan a oumentá di 35 te na mas ku 80 pa luna, i mi tin shete estudio di Beibel.”
4 Kon pa Haña un Teritorio Personal: Si bo ke un teritorio personal, papia ku e sirbidó di teritorio. Sinti bo liber pa invitá un otro publikadó pa traha huntu ku bo, i tene un registro di e kasnan kaminda bo no a haña hende. Bo mester hasi esfuerso pa kaba e teritorio denter di kuater luna. Si bo tin problema pa hasi esei, bo por pidi e superintendente di Estudio di Buki di Kongregashon òf otronan pa yudansa. Despues di kuater luna, bo por sea entregá e teritorio ku bo a kubri kompletamente òf pidi pa bo trah’é di nobo. Sin embargo, bo no mester keda demasiado tempu ku e mesun teritorio sino entreg’é pa asina otronan por pidi p’e. Si bo ta den un kongregashon kaminda e teritorionan ta limitá i no ta posibel pa bo haña un teritorio personal, podisé bo por pidi e superintendente di estudio di buki parti di e teritorio di boso estudio di buki.
5 Nos trabou di prediká “den henter mundu” no ta un asignashon fásil. (Mat. 24:14) E ta rekerí bon kordinashon di nos esfuersonan. Si ademas di duna testimonio den grupo nos ta prediká tambe den un teritorio personal, esei por yuda nos alkansá mas tantu hende posibel ku e bon nobo.
[Study Questions]
1. Kiko ta un teritorio personal?
2. Kiko ta algun benefisio di tin un teritorio personal?
3. Ki eksperensia un pionero ku a haña un teritorio personal tabatin?
4. Kon bo por haña un teritorio personal?
5. Kiko nos tin ku hasi pa kumpli ku nos trabou di prediká?