Ora No Tin Hende na Kas
1 Den hopi área ta birando mas i mas difísil pa haña hende na kas. Den e “tempunan trabahoso” aki hopi hende ta haña nan obligá ta traha mas tantu djis pa nan mantené kabes riba awa. (2 Tim. 3:1) Tin hende no ta na kas pasobra sea nan ta trahando, hasiendo kompra òf ta rekreá. Kon nos por alkansá e personanan ei ku e bon nobo?
2 Tene Registro Eksakto: E promé kos ku bo tin ku hasi ta anotá e kasnan kaminda no tin hende. Esaki ta spesialmente importante ora ta traha e mesun e teritorionan kada bes. Abo sa yena e nòmber di kaya, number di e teritorio, bo nòmber i e fecha? Podisé bo por laga sierto espasio pa hasi anotashon ora abo òf un otro publikadó bolbe bai traha e kasnan kaminda no tabatin hende. Ora bo kaba di prediká, kòrda duna e ruman ku tin e teritorio ei e registro òf e notanan, a ménos ku e bai di akuerdo pa bo traha e kasnan kaminda no tabatin hende. Usa un registro apart pa bo nota kualke persona ku a mustra sierto interes i ku lo bo rebishitá.
3 Purba Otro Ora: Kisas un persona ku no tabata na kas durante oranan di trabou lo por ta na kas parti anochi òf den fin di siman. Bo por programá bo skèdjel pa bai bèk na un ora mas oportuno? (1 Kor. 10:24) Si bo no por, lo bo por duna un publikadó ku sí por bai un otro ora e adrèsnan. Òf kisas bo por manda un karta pa e personanan ku no tabata na kas òf purba alkansá nan via telefòn. Publikadónan ku pa motibu di salú no por partisipá mashá den e trabou di kas pa kas, ta kontentu pa yuda bo den esaki.
4 E siguiente eksperensia ta mustra e importansia di hasi esfuerso pa alkansá e personanan ku no ta na kas. Despues ku publikadónan tabatin tres aña ta yama na un kas, finalmente nan a haña e doño di kas. A resultá ku e tabata studia Beibel kaba promé ku el a bin biba den e área ei; i tur e tempu ei e tabata warda pa un Testigu bin serka dje pa e por a reanudá su estudio.
5 Kompletá e Teritorio: Ki ora ta konsiderá ku un teritorio ta kla? Generalmente esei ta ora ku publikadónan a hasi tur esfuerso rasonabel pa haña hende na kada kas. Podisé ta apropiá pa laga un tratado òf un revista ménos resien diskretamente na kasnan kaminda nos no a haña hende, spesialmente den teritorionan ku nos no ta traha frekuentemente. Mester kompletá e teritorio denter di kuater luna. Despues di esei mester entreg’é pa asina e sirbidó di teritorio por aktualisá su registronan.
6 Nos ke pa mas tantu hende posibel haña un oportunidat pa siña invoká e nòmber di Yehova i haña salbashon. (Rom. 10:13, 14) Esaki ta inkluí hende ku no ta na kas ora nos ta den e trabou di kas pa kas. Meskos ku apòstel Pablo, kultivá e deseo ‘pa duna testimonio kabal di e evangelio di e grasia di Dios.’—Echo. 20:24.
[Study Questions]
1. Ki problema komun nos ta konfrontá den e ministerio di kas pa kas?
2. Kon nos por hasi sigur ku ta bolbe bishitá e kasnan kaminda no tabatin hende?
3. Menshoná algun sugerensia pa alkansá hende ku no ta na kas.
4. Kiko ta mustra e importansia di bai bèk kaminda nos no a haña hende na kas?
5. Ki ora ta konsiderá ku a kompletá un teritorio?
6. Dikon nos mester purba alkansá tur hende den nos teritorio ku e bon nobo?