Pakiko Tene un Registro di Esnan Ku No Ta na Kas?
1 Un pareha Testigu tabata den sirbishi di vèlt parti mainta. Mas despues riba e mesun dia ei, nan a bolbe bai den e teritorio ei pa bishitá esnan ku nan no a haña na kas. Un hòmber a laga nan drenta i a skucha atentamente. El a tuma e buki Biba pa semper i a puntra si e Testigunan lo bini bèk. Nunka promé el a papia ku Testigunan di Yehova i e tabatin hopi pregunta ku e kier a haña kontesta pa nan. Anto el a kuminsá studia Beibel. E pareha Testigu tabata sumamente kontentu ku nan a lokalisá un persona semehante di karné. Abo lo kier tin un eksperensia asina? Si bo tene un bon registro di esnan ku no ta na kas i bolbe mas pronto posibel, abo tambe lo por haña un eksperensia asina.
2 Bes tras bes nos a haña rekordatorio pa mantené un registro eksakto di esnan ku no ta na kas i pa bishitá nan mas pronto posibel. Manera e eksperensia ariba ta mustra, si nos bai bèk riba e mesun dia nos por haña resultadonan ekselente. Maske tal bes nos ta determiná pa kubri e teritorio asigná, kisas nos no ta mes diligente den mantené un registro di esnan ku no ta na kas. Algun ruman ta bisa: ‘Nos ta traha nos teritorio kada dos òf tres siman; no ta nesesario pa mantené un registro di hende ku no ta na kas pasobra di tur manera pronto nos lo ta bèk atrobe.’ Pero esei ta duna nos asta mas motibu pa mantené un registro. Si nos bishitá esnan ku no tabata na kas den e teritorionan ku nos ta kubri ku frekuensia, nos lo por buska hende digno mas kuidadosamente. Kon asina?
3 Den hopi área, 50 porshento òf mas di e habitantenan no ta na kas durante dia. Pues, en realidat, dor di konsentrá riba esnan ku nos no a haña na kas, nos por traha mas tantu den e teritorio. Asta si nos ta traha e teritorio masha poko bes, nos por logra haña mihó resultado ora nos hasi esfuerso pa alkansá tur hende promé ku entregá e teritorio.
4 Por lo general nos por plania pa bishitá esnan ku nos no a haña na kas un otro dia, preferiblemente denter di un siman. Hopi publikadó ta haña ku ta mihó pa bolbe riba un otro dia i un otro ora. Tal bes bo ta preferá di usa poko tempu riba djasabra òf djadumingu pa bishitá e hendenan ku bo no a haña na kas durante siman. Ademas, hopi kongregashon ta haña ku ta masha benefisioso pa hasi e bishitanan ei atardi lat. Nan ta logra haña mas ku mitar di e habitantenan na kas.
5 Ora bo haña un rebishita, anotá esaki riba bo registro personal. Si bo no por bai bèk serka e hendenan ku bo no a haña na kas, entregá e registro na e ruman ku ta dirigí e grupo. Anto e siguiente grupo ku bai den e teritorio por us’é.
6 Mas atenshon nos presta na e rasgo akí di nos ministerio, mas produktivo nos lo bira i mas goso nos lo haña. E echo ku nos sa ku nos ta hasi nos máksimo esfuerso pa buska i kuida hende semehante di karné por duna nos un satisfakshon.—Eze. 34:11-14.