Atendiendo e “No-na-Casnan”
1 Pa yuda hende di curason onrado beneficiá dje mensahe di Reino ta necesario pa papia cu nan. Sin embargo, cada bes ta bira mas difícil pa haña hende na cas. Hopi bes nos ta ripará cu mayoria hende no ta na cas ora nos pasa den dia, i foral den siman.
2 P’esei, ora di traha e teritorio nos tin cu tene un registro di e “no-na-casnan.” Por ta bo a nota cu ta útil pa laga mas cu un liña bashí riba e registro di cas-pa-cas di manera cu lo tin suficiente lugá pa skirbi informacion adicional, segun cu ta haci esfuerso despues pa haña hende na cas. Ta bon pa bo mantené e registro nechi i lesabel i tambe esei ta facilitá e trabou pa otro publicadónan cu kisas lo usa e registro pa pasa na oranan cu abo no por.
3 Ora di anotá cu no tin hende na un cierto cas, ademas dje fecha, indicá e literatura cu bo a laga den brievenbus. Si bo laga un tratado, lo ta útil pa skirbi e number dje tratado. Asina ei, si e persona no ta na cas ora bo bolbe pasa, bo por laga un otro tratado. Anto ora por fin bo topa e persona, lo bo sa loke el a ricibí caba i esaki lo por sirbi como base pa un consideracion amigabel.
4 Generalmente, cada bes cu bishitá casnan caminda promé no tabatin hende, ta mihó pa purba pasa un otro dia of ora. Por haña mas hende na cas parti anochi. Si bo no tin henter un anochi pa bishitá e “no-na-casnan,” bo a purba sali trempan pa bai e reunionnan di congregacion, i haci e bishitanan na caminda? Si bo a traha den un teritorio pegá cu bo cas, e ora ei esei lo rekerí masha tiki of ningun tempu extra of gastu extra pa transport. Naturalmente, otro publicadónan den e grupo tambe lo por haci e bishitanan usando e informacion riba bo registronan di cas-pa-cas, of tal bes nan tin nan mes adresnan di no-na-cas pa haci den e mésun teritorio ei.
5 Ora di dicidí si mester laga literatura na e “no-na-casnan,” corda pa no laga nada cu lo ta visibel pa presunto intrusonan. Nos lo no kier haci algu cu lo causa problema p’e doño di cas, of cu lo desacreditá e mensahe di Reino.
6 Caminda no por haña contacto cu ningun hende, despues di vários bishita na diferente ora, pakico no purba haña contacto cu e doño di cas via telefon? Ora bo bel, lo bo ripará cu ta eficas pa mencioná promé bo nomber i bisa cu bo ta bel pasobra bo no por a haña contacto cuné ora bo a pasa personalmente na su cas. Tambe, bo por referí na cualkier tratado of otro literatura cu bo a laga, manera bo registro di cas-pa-cas ta indicá, mencionando brevemente su contenido. Dependiendo dje reaccion dje doño di cas, lo bo por sigui e ora ei cu bo presentacion dje “bon nobo.”
7 Segun cu nos ta haci esfuerso pa haña contacto cu tur hende den nos teritorio, haciendo un esfuerso diligente pa ègt papia cu cada un, nos por tin confiansa cu Jehova su bendicion ricu lo ta riba nos esfuersonan.