Kampaña Spesial!
16 di Òktober pa 12 di Novèmber!
1 “Fin di Religion Falsu Ta Serka!” Esei ta título di e tratado Notisia di Reino Num. 37, ku entrante otro luna, nos lo distribuí rònt mundu. Durante e promé parti di luna di òktober nos lo ofresé e revistanan Toren di Vigilansia i ¡Despertad! Entrante djaluna 16 di òktober te djadumingu 12 di novèmber nos lo partisipá den un distribushon ekstenso di Notisia di Reino Num. 37. Den fin di siman durante e kampaña, nos lo ofresé e tratado aki huntu ku e revistanan nobo.
2 Ken Por Partisipá: Tur publikadó aktivo di e bon nobo lo kier partisipá plenamente. Algun di nan lo por traha komo pionero ousiliar. Bo tin yu òf studiante di Beibel ku ta progresando spiritualmente? Yuda nan aserká e ansianonan pa wak si nan ta kumpli ku e rekisitonan pa bira publikadó no-batisá. Ansianonan mester tuma inisiativa pa papia ku publikadónan inaktivo pa animá nan pa partisipá, kisas dor di traha huntu ku publikadónan ku tin hopi eksperensia.
3 Tur kongregashon lo haña un suministro di Notisia di Reino Num. 37 di manera ku kada publikadó i pionero por risibí por lo ménos 50 ehemplar. Personanan interesá ku no ta publikadó ainda por risibí sinku ehemplar pa nan duna nan famia- i amigunan. Kada publikadó i pionero mester nota kuantu tratado el a laga i skirbi esaki parti patras di su rapòrt di sirbishi di vèlt na fin di òktober i novèmber. E sekretario lo konta e total di e kongregashon i informá sukursal di esaki na fin di kada luna. Por usa loke sobra despues di e kampaña den kualke rasgo di e ministerio.
4 Kiko pa Bisa: Mantené bo presentashon kòrtiku pa asina bo por alkansá mas tantu hende posibel ku e mensahe. Lo bo por bisa: “Komo un servisio na públiko, mi ta partisipando den un kampaña mundial pa distribuí e mensahe importante aki. Esaki ta bo ehemplar grátis. Por fabor, no keda sin les’é.” Kisas ta mihó pa no kana ku tas di sirbishi ora bo ta bai di kas pa kas. Kòrda hasi un anotashon di tur persona ku mustra interes.
5 Kon pa Kubri Boso Teritorio: En bes di distribuí Notisia di Reino den e trabou riba kaya, trata di kubri e teritorionan di kas pa kas i di negoshi mas tantu posibel. Nota e kasnan kaminda no tin hende, i purba bolbe na un otro ora òf dia di siman. Entrante djaluna 6 di novèmber, por kuminsá laga e tratado kaminda no tin hende na kas. Sin embargo, si e kongregashon tin mas teritorio i no por abarká tur durante e periodo stipulá, e ansianonan por disidí pa durante henter e kampaña laga Notisia di Reino kaminda no tin hende na kas.
6 Destrukshon di ‘Babilonia e Grandi’ ta aserkando rápidamente. E hendenan mester sali for di dje promé ku e ser destruí kompletamente. (Rev. 14:8; 18:8) Plania for di awor pa bo partisipá plenamente den e kampaña mundial aki pa laga tur hende sa ku fin di religion falsu ta serka!