“E Milenio Nobo—Kico Futuro Tin pa Bo?”
1 Hende rond mundu ta puntra nan mes esei. Aunke humanidad a logra hopi atrabes di siglonan, hende ta desilusioná pasobra e problemanan básico cu pa milenionan largu a plaga hende, ta existí ainda. (Job 14:1; Sal. 90:10) Unda humanidad por haña alivio?
2 Durante luna di october i november nos lo tin un oportunidad special pa duna nos bisiñanan e contesta riba e pregunta ei. Con? Mediante distribucion di Noticia di Reino Num. 36. E ta titulá “E Milenio Nobo—Kico Futuro Tin pa Bo?” Durante e promé parti di october, nos lo ofrecé e revistanan E Toren di Vigilancia i Spierta! Anto for di dialuna, 16 di october, te cu diabierne, 17 di november, nos lo participá den un distribucion intensivo di Noticia di Reino Num. 36. Durante e campaña aki, nos lo concentrá riba laga Noticia di Reino Num. 36 durante dianan den siman. Den fin di siman nos lo present’é huntu cu e revistanan actual.
3 Lo Bo Tin un Pleno Participacion? Anciano, sirbidó ministerial i pioneronan lo kier hiba delantera den e campaña aki, ya cu nan ta na vanguardia dje trabou. Hopi publicadó a ahustá nan circunstancia pa traha pionero auxiliar durante un of ámbos luna dje distribucion. Otronan a planea pa dedicá mas tempu cu normal den e ministerio.
4 Conductornan di Studio di Buki di Congregacion por hunga un papel importante den animá tur miembro di nan grupo pa nan tin un pleno participacion den distribucion di Noticia di Reino Num. 36. Por tin algun publicadó cu no ta activo mas den e trabou di predicá. Ancianonan mester bishitá esakinan pa wak kico por haci pa yuda nan. Podisé por haci areglo pa un publicadó experenciá compañá cada persona inactivo den veld durante e lunanan aki. E presentacion simpel di Noticia di Reino Num. 36 por ta net loke tin mester pa reactivá e publicadónan aki.
5 Tambe esaki lo ta un bon oportunidad pa studiantenan di Bijbel cu ta basta leu den e buki Conocimentu i cu ta cualificá pa bira publicadónan no-bautisá, cuminsá participá den e ministerio. Asta hóbennan por tin un excelente participacion den e trabou excitante aki.
6 Tur loke bo mester ta un presentacion simpel. Lo bo por bisa:
◼ “Mi a ofrecé mi tempu pa yuda distribuí e mensahe masha importante aki pa tur famia den [nomber di stad of bario]. Esaki ta bo ehemplar. Por fabor, les’é.” Kisas ta probechoso pa no cana cu tas di predicá ora di distribuí Noticia di Reino Num. 36.
7 Reunionnan Bon Planeá pa Sirbishi di Veld: Ancianonan mester soru pa e areglonan pa testificá ta cumbiniente i tambe práctico. Foral e superintendente di sirbishi mester haci sigur cu tin hopi teritorio di cas-pa-cas i di negoshi na man di manera cu tur hende por participá plenamente den e trabou. Caminda ta posibel, mester organisá reunionnan pa sirbishi pa cada dia den siman, pa finnan di siman i pa anochi. Por haci areglo pa reuní atardi lat pa beneficio di alumnonan di scol, publicadónan cu ta traha warda i otronan.
8 Kico Mester Haci cu Esnan No-na-Cas: Nos meta ta pa papia cu mas tantu doño di cas posibel. Si no tin niun hende na cas ora bo pasa, haci nota dje adres i pasa na un otro ora di dia. Si pa e último siman dje campaña bo no a logra haña contacto cu e doñonan di cas aki, bo por laga pa nan un ehemplar di Noticia di Reino Num. 36 den un lugá cu no ta na bista di hende cu ta pasa forbij. Ora di traha áreanan di cunucu i áreanan caminda tin mas teritorio cu por ser cubrí durante e campaña, e ancianonan local por instruí e congregacion pa laga un ehemplar di Noticia di Reino Num. 36 na e bishita inicial si no tin hende na cas.
9 Man na Obra! Congregacionnan mester haci esfuerso pa cubri nan teritorio promé cu e campaña terminá dia 17 di november. Si bo teritorio ta basta grandi, kisas algun publicadó por traha nan so caminda esei ta práctico i sin peliger. E areglo aki lo haci cu ta mas fácil pa alcansá mas tantu hende merecedor posibel. Haci sigur di tene un bon registro di tur persona interesá cu bo topa.
10 Ancianonan mester anticipá cuantu revista extra e congregacion lo tin mester, i haci pedido conforme cu esei. No ta necesario pa haci pedido di Noticia di Reino Num. 36, ya cu lo manda un cargamentu pa cada congregacion. Pioneronan special, regular i auxiliar lo ricibí cada un 140 ehemplar pa distribuí, miéntras cu cada publicadó di congregacion lo haña 35 ehemplar. Pues, bo ta cla i ansioso pa pone man na obra den e actividad special aki? Ki privilegiá nos ta di por laga tur nos bisiñanan sa kico Dios a primintí pa e futuro cercano!