Un Kampaña Spesial di Tratado! di 20 di Òktober pa 16 di Novèmber
1 Entrante djaluna 20 di òktober, nos lo kuminsá ku distribushon spesial di un tratado nobo titulá Bo Ke Haña Sa e Bèrdat? E kampaña lo dura kuater siman. Nos ta spera ku e kampaña mundial spesial akí lo yuda mas hende haña interes den e úniko fuente di bèrdat.—Juan 17:17.
2 E tratado ta duna kontesta bíbliko breve i al kaso riba seis pregunta importante: “Dios ta interesá den nos di bèrdat?” “Guera i sufrimentu lo kaba un dia?” “Kiko ta pasa ku nos ora nos muri?” “Tin speransa pa hende ku a muri?” “Kon mi mester hasi orashon pa Dios skucha mi?” i “Kon mi por logra haña felisidat den bida?” Religionnan di kristiandat nunka no a duna kontesta satisfaktorio riba e preguntanan akí. Asta hopi hende ku no ta bisa ku nan ta kristian sa hasi nan mes e tipo di preguntanan ei, pero kisas nan no ta konsiente ku Beibel ta duna kontesta bon kla riba e preguntanan ei. P’esei, nos ta spera ku e mensahe akí lo atraé hopi hende.
3 Kubri Boso Teritorio: Trata na kubri boso teritorio di kas pa kas mas tantu posibel. Si boso tin un teritorio grandi, e ansianonan por animá boso pa laga e tratado na e kasnan kaminda boso no haña hende for di prinsipio. Kòrda duna e tratado na famia, bisiña, konosí na trabou òf skol i na otro hende ku bo ta papia kuné regularmente. Kisas bo por regla bo asuntunan pa traha pionero ousiliar na òktober òf novèmber. Bo tin yu òf studiante di Beibel ku ta hasiendo progreso spiritual i ku lo por kualifiká pa traha huntu ku nos den e kampaña akí komo un publikadó no-batisá? Si ta asina, informá e ansianonan.
4 Loke Bo Por Bisa: Pa nos por logra alkansá mas tantu hende ku e mensahe, ta mihó pa bo tene bo presentashon kòrtiku. Djis puntra e doño di kas un di e seis preguntanan ku tin riba e portada i mustr’é e kontesta den e tratado. Esaki lo duna publikadónan oportunidat pa adaptá nan presentashon na e nesesidat di e hendenan den teritorio. Si un hende mustra interes, hasi anotashon di esei i rebishit’é. Durante fin di siman, por ofresé e revistanan nobo huntu ku e tratado. Despues di e kampaña (dia 16 di novèmber), nos lo ofresé e buki Beibel Ta Siña. Si sobra tratado, nos lo sigui laga nan normal manera e otro tratadonan.
5 Kuminsá Estudio di Beibel: E propósito di e tratado akí ta pa yuda nos kuminsá estudio di Beibel. Ora di rebishitá un hende ku a mustra interes, bo por puntr’é kua bèrdat bíbliko a konsol’é òf yud’é? Hala atenshon na e parti patras di e tratado kaminda e ta menshoná tokante estudio di Beibel, anto dun’é un buki Beibel Ta Siña. Si ta posibel, konsiderá brevemente ún òf dos paragraf di e kapítulo ku tin mas informashon tokante e tema ku el a skohe.
6 Yehova ta buskando hende ku lo ador’é ku “spiritu i bèrdat.” (Juan 4:23) Laga nos tur ban partisipá den e kampaña spesial akí pa yuda otro hende haña e bèrdat!