Sea “Celoso pa Obranan Excelente” Durante April!

¹ Aña pasá durante april i mei un testimonio sin precedente a ser duná ora miyones di copia di Noticia di Reino Num. 34 a ser distribuí mundialmente. Tantu publicadornan di congregacion como pioneronan a participá celosamente den e trabou stimulante aki. Abo tabata entre nan? Si ta asina, sin duda bo a disfrutá cabalmente di participá den e campaña remarcabel ei. Tal bes awor bo ta puntrando bo mes, Ki ‘obra excelente’ ta spera nos e aña aki?​—⁠Tito 2:⁠14.

² Durante april i principio di mei, nos lo tin e placer di distribuí un edicion special dje revista ¡Despertad!, esun di 22 di april, 1996, conteniendo e tema “Ora Lo No Tin Guera Mas.” Ya cu e tema aki lo atraé un gran cantidad di doño di cas, nos lo trata na duna e revista e distribucion mas amplio posibel. En bista dje importancia dje informacion cu e ta contené, e edicion aki di ¡Despertad! lo mester ser ofrecé durante april i mei, te ora cu no tin mas di dje na stock.

³ Nos Meta​—⁠Participacion di Tur Publicador: Lo ta berdaderamente animador si tur publicador riba nos islanan lo por tin un participacion den e trabou di predicá durante april. Teniendo e Memorial di Cristo su morto frescu na mente, nos siguramente lo kier mustra nos aprecio pa Dios su bondad dor di ofrecé un “sacrificio di alabansa” directamente den e ministerio di veld.​—⁠Heb. 13:⁠15.

⁴ Mester haci un esfuerso diligente pa dicerní e necesidadnan di cada miembro dje congregacion di manera cu nan tur por tin un participacion celoso den e ministerio durante april. (Rom. 15:⁠1) Conductornan di studio di buki mester ta plenamente conciente dje circunstancianan di esnan den nan grupo i ofrecé yudansa práctico ora ta necesario. Tin publicador cu mester di transportacion? Ken por percurá pa esei? Tin algun cu ta tímido of ta sinti nan mes incómodo den hende of na porta? Publicadornan mas experenciá por traha huntu cu nan? Ki tal di esnan cu no por sali for di cas of esnan cu ta malu? Nan lo por participá den testificacion via telefon, via skirbimentu di carta, of den un of otro actividad productivo?

⁵ Algun publicador cu a bira inactivo ta ricibiendo animacion spiritual regular, i nan por ser motivá pa participá den e trabou di predicá atrobe. E campaña cu e edicion special di ¡Despertad! lo duna nan un oportunidad excelente pa bira activo atrobe.

⁶ Entrená Esnan Chikitu pa Tuma Parti: Hopi yu di Testigonan di Jehova a compañá nan mayornan bai di cas pa cas pa añanan, aunke nan ainda no ta sirbiendo como publicadornan no-bautisá. Awor ta e tempu pa nan cuminsá? Nan ta ser impulsá di curason i ta cla pa tin un participacion significativo den e trabou di cas-pa-cas? Cabesnan di famia mester usa e tempu durante e studio di famia pa yuda nan yunan cu ta cualificá prepará un presentacion adaptá na cada un su edad i abilidad. Esnan mas grandi por scoge un pregunta cu ta stimulá pensamentu pa asina lanta e interes dje doño di cas i e ora ei indicá e contesta den e revista. Yunan mas chikitu por duna un testimonio eficas cu solamente un par di palabra. Por ehempel, nan por animá e doño di cas pa “lesa un revista special cu ta ser ofrecé mundialmente e luna aki.” Como parti di bo famia su preparacion, sea sigur di incluí sugerencianan pa vence obhecionnan comun. Lo bo haña un cantidad di bon idea den e buki Razonamiento. Na oranan di come i na otro ocasionnan apropiado, animá e miembronan di famia pa relatá experencianan cu nan tabatin den sirbishi di veld.

⁷ Studiantenan di Bijbel cu Ta Cualificá Ta Emprendé e Trabou cu Jesus A Haci: Jesus no a limitá su siñamentu na dunamentu di instruccion riba asuntunan di doctrina. El a compañá su studiantenan den e ministerio i a siñá nan con pa predicá. (Luc. 8:1; 10:​1-11) Con e situacion ta awe? Mas cu mei miyon studio di Bijbel ta ser conducí na Merca [riba e islanan ABC mas cu 2.115 studio]. Sin duda, cu animacion apropiado hopi di e studiantenan aki lo por dal e siguiente paso den nan entrenamentu i cualificá pa sirbi como publicadornan no-bautisá na april.

⁸ Si bo ta conduciendo un studio di Bijbel, considerá e preguntanan aki: E studiante ta haciendo progreso, conforme cu su edad i abilidad? El a cuminsá compartí su fe informalmente cu otronan? E ta bistiendo “e personalidad nobo”? (Col. 3:10) E ta cumpli cu e cualificacionnan pa publicadornan no-bautisá, describí na página 97 te cu 99 dje buki Nos Ministerio? Si bo ta kere cu e ta cualificá, pakico no considerá e asuntu cuné? Algun studiante tin mester di simplemente un invitacion directo pa participá den e trabou. Naturalmente, si e studiante ta dispuesto, lo ta necesario promé pa e superintendente presidente haci areglo den e manera custumbrá pa un consideracion huntu cu dos dje ancianonan. Na otro un banda, algu tal bes ta teniendo e studiante atras. Kisas un dje ancianonan por compañá bo n’e studio di Bijbel i saca for dje studiante su sintimentunan pa cu e berdad. Despues di scucha na loke e studiante tin di bisa, e anciano lo por duna sugerencianan práctico, huntu cu yudansa bíblico.

⁹ ‘Cumpra Tempu’ pa Traha Pionero Auxiliar: Tur aña durante e temporada di Memorial, gratitud pa e rescate ta impulsá miles di ruman pa ‘cumpra’ tempu pa ser pionero auxiliar. (Efe. 5:​15-17) Aunke algun sacrificio ta necesario, e recompensanan ta grandi. Un cantidad encomendabel di hóbennan ta probechá dje vacansi di scol pa traha pionero. Adultonan cu ta traha henter dia ta usa anochinan i finnan di siman pa probechá plenamente dje mésun actividad aki. Asina, famianan completo a tuma e oportunidad pa traha pionero auxiliar huntu! Den algun congregacion mayoria dje ancianonan i sirbidornan ministerial i nan esposanan a inscribí como pionero auxiliar. Stimulá dor di nan ehempel celoso, otronan a sigui nan ehempel, di manera cu un porcentahe grandi dje congregacion a sirbi como pionero auxiliar den april.

¹⁰ Sea cu bo por traha pionero auxiliar of no, busca maneranan pa aumentá bo sirbishi den veld durante april. Fiha un meta personal pa bo mes, unu cu lo rekerí algun esfuerso pa alcansá pero cu ta posibel. Bo deseo pa “gasta i keda completamente gastá” den e sirbishi di Jehova, segun bo circunstancianan personal, lo tin Jehova su bendicion.​—⁠2 Cor. 12:⁠15.

¹¹ Reunionnan pa Sirbishi di Veld: Mester haci areglo pa reunionnan pa sirbishi di veld tur dia dje campaña di ¡Despertad!, na un ora cu lo permití e rumannan sali trempan den e ministerio. Mester haci percuracion tambe pa testificacion djanochi. Mayoria publicador lo participá den sirbishi di veld den finnan di siman, pues congregacionnan mester programá reunionnan pa sirbishi di veld riba diasabra, tantu mainta como atardi, durante henter e periodo dje distribucion special dje ¡Despertad!

¹² Esnan cu ta conducí reunionnan pa sirbishi di veld mester percurá pa tin hopi teritorio na man. Teritorio cu no a ser trahá recientemente mester ser cubrí promé. Bo tin un of mas teritorio personal cu no a ser cubrí recientemente? Si lo bo tin mester di yudansa pa traha nan durante e campaña, papia cu e superintendente di sirbishi of cu e ruman encargá cu teritorio i nan gustosamente lo haci areglo pa bo haña algun yudansa.

¹³ Cuantu Revista Lo Bo Laga? E pregunta ei ta pa cada persona individual contestá. Determinando cuantu revista bo por laga durante e campaña, considerá e tipo di teritorio cu lo bo ta trahando, bo edad, bo salú, e tempu cu bo por dedicá na e trabou, i otro factornan. Sin embargo, tuma nota dje recordatorio cu a ser duná den E Toren di Vigilancia di 1 di januari, 1994: “Como un sugerencia, publicador por pone meta di, por ehempel, 10 revista pa luna, dependiendo di nan circunstancia; pionero por haci esfuerso di parti 90.” Un meta similar lo ta realístico den bo caso?

¹⁴ Ancianonan​—⁠Planeamentu Cuidadoso Ta Necesario: Haci sigur cu, si ta posibel, henter e teritorio dje congregacion ta ser trahá cu e edicion special di ¡Despertad! Mester duna atencion cuidadoso na traha cualkier teritorio di negoshi asigná na e congregacion. Esnan cu ta trah’é mester ta bon prepará i nechi bistí. Un presentacion elaborá no ta necesario. Ora di acercá un hende di negoshi, bo por bisa cu bo no ta topa hende di negoshi hopi biaha na cas, p’esei bo ta bishitando su lugá di negoshi pa presentá un artículo cu siguramente lo ta di interes p’e. Anto bo por compartí cuné brevemente un punto specífico den e revista. Testificacion den caya cu e revistanan tambe mester ta apropiadamente organisá den e teritorionan dje congregacion. E manera mas eficas pa participá den e trabou den caya ta di tuma e iniciativa i acercá hende cu ta pasa forbij, en bes di spera pa nan acercá bo. Ya cu lo bo ser observá p’e público, bo mester ta conciente pa tin un aparencia di bon gustu i decente. Tal bes tin otro lugánan den bo teritorio cu lo por ser trahá durante e campaña, manera aeropuertonan, hospitalnan, lugánan di parkeer, parkenan i casnan pa anciano. E cuerpo di anciano mester determiná ki areglonan apropiado por ser hací pa testificá den e áreanan aki dje teritorio di bo congregacion.

¹⁵ Jehova ta un trahador incansabel. (Juan 5:17) El a crea e shelu i e tera i tambe e matanan i e animalnan; pero el a sigui traha te ora el a crea su logro supremo riba tera​—⁠hende. E echo cu nos tin bida ta un resultado directo di Dios su boluntad pa traha. Como “imitadornan di Dios,” nos mester ser impulsá dor di nos amor p’e pa ta “celoso pa obranan excelente.” (Efe. 5:1; Tito 2:14) Ya cu Jehova ta digno di ricibí nos mas mihó esfuerso i ya cu e deseo pa obtené resultadonan ta un característica di un persona cu ta celoso, nos mester ta interesá na efectuá trabou di calidad den e ministerio. Naturalmente, Jehova ta apreciá cualkier sacrificio cu nos haci p’e, i nos trabou nunca ta en bano. (1 Cor. 15:58) Pues, cu un curason yen di gratitud, laga nos dedicá nos mes na actividad celoso durante april, sigur di Jehova su aprobacion i bendicion i di éxito ricu!