Nos Por Haci April 2000 Nos Mihó Luna di Tur Tempu?
1 Diarason anochi, 19 di april, lo ta e ocasion mas special di nos aña di sirbishi. E dia ei, segun cu solo ta baha progresivamente rond e tera, tur congregacion i grupo di Testigonan di Jehova mundialmente lo tene e Memorial dje morto di Cristo. Sin importá unda nos ta biba, conmemoracion dje sacrificio di Jesucristo lo ta e evento mas special di aña. Riba e Kalender 2000 di Testigonan di Jehova e fecha di Memorial ta resaltá den e luna di april.
2 Henter e luna di april nos tin un oportunidad maraviyoso pa demostrá di henter curason nos aprecio pa Jehova su bondad inmerecí cu el a expresá mediante e sacrificio di su Yu. Con asina? Apostel Pablo a skirbi: “E amor cu e Cristo tin ta obligá nos, pasobra esaki ta loke nos a husga, cu un solo homber a muri pa tur; pues anto, tur a muri; i el a muri pa tur afin cu esnan cu ta biba no biba mas pa nan mes, sino pa esun cu a muri pa nan i a ser lantá.” (2 Cor. 5:14, 15) Sí, durante april nos por demostrá cu nos no ta biba pa nos mes, sino pa esun cu a muri pa nos, dor di haci april nos mihó luna di tur tempu como ministernan dje Reino!
3 Inscribí pa Traha Pionero Auxiliar na April: Apostel Pablo a pone un ehempel cu ta sirbi di inspiracion pa nos ora el a bisa: “Mi no ta considerá mi alma di ningun balor como algu precioso pa mi, con tal cu mi terminá mi carera i e ministerio cu mi a ricibí di Señor Jesus, pa duna testimonio cabal dje bon nobo dje bondad inmerecí di Dios.” (Echo. 20:24) Nos tin e mésun privilegio di duna testimonio cabal tocante Jehova Dios. Pa logra esei, nos lo tin gana di haci april nos mihó luna di tur tempu den e actividad di pionero auxiliar!
4 Cu cincu fin di siman completo, april 2000 lo ta un luna excelente pa hopi ruman traha pionero. Aya na mart 1997, ora nos a alcansá nos máximo di tur tempu di pioneronan auxiliar, e 257 pioneronan cu a participá a representá 12 porciento dje total di publicadó. Esaki ta nificá cu nos tin un potencial pa surpasá nos máximo anterior di pionero auxiliar. Ademas, e rekisitonan di ora a baha tambe entre tantu, loke ta haci e rasgo aki di sirbishi mas accesibel pa hopi mas ruman den congregacion. Cada publicadó bautisá mester considerá bou di oracion si e por traha pionero auxiliar april aki.
5 Usa e luna di april riba e Kalender 2000 pa planea bo programa awor pa próximo luna. Dicidí cua dianan lo bo por sali den sirbishi di veld, i suma tur e oranan cu bo ta pensa cu bo por dedicá n’e actividad di predicá durante e luna. Incluí e tempu cu bo por dedicá na duna testimonio tantu formal como informal. E total ta yega banda dje 50 oranan rekerí pa pionero auxiliar? Si bo no ta yega n’e oranan necesario, ta posibel cu bo por haci cualkier otro ahuste den bo programa pa asina cumpra e tempu pa traha pionero auxiliar? Lo bo tin cu traha solamente un promedio di un ora cu 40 minuut pa dia, pa yega 50 ora p’e luna.
6 Awor cu a baha e rekisito di ora pa pioneronan regular tambe, bo a pensa riba e posibilidad di drenta e ministerio di tempu completo? Pakico warda te mas den fin di aña? April lo ta un bon luna pa cuminsá! Si bo no ta sigur cu bo por yega e 70 ora rekerí pa pionero regular, pakico no traha pionero auxiliar den april i fiha 70 ora como bo meta? Una bes bo mira cu bo por logr’é, lo bo ta mas incliná na inscribí pa djoin e fila di pionero regular mas pronto posibel.—Mira e buki Nos Ministerio, página 113-14.
7 Participá Plenamente Como Publicadó dje Bon Nobo: Den nos tur su caso, publicadó i tambe pionero, ta nos amor genuino pa Dios i pa próhimo ta impulsá nos pa haci di henter alma tur loke nos por den Jehova su sirbishi, di acuerdo cu nos circunstancianan personal. (Luc. 10:27) Asina nos ta mustra cu “nos ta traha duru i ta haci esfuerso vigoroso, pasobra nos a pone nos speransa den un Dios bibu, cu ta Salbador di tur clase di hende, specialmente di esnan fiel.” (1 Tim. 4:10) Ta p’esei nos por verwagt di mira cu den april lo tin un participacion di 100% dje publicadónan den e obra di Reino.
8 Laga nos no lubidá e apelacion urgente di Jesus: “E cosecha ta grandi, pero e trahadónan ta poco. P’esei, roga e Doño dje cosecha pa manda trahadó na su cosecha.” Djis despues di a bisa esaki, Jesus a yama su 12 apostelnan cerca dje i a manda nan bai predicá. (Mat. 9:37, 38; 10:1, 5, 7) Rond di un aña despues—despues cu e diesdosnan tabata bon entrená den e actividad di predicá—Jesus “a nombra setenta otro i a manda nan,” dunando nan e mésun instruccionnan: “E cosecha, en berdad, ta grandi . . . P’esei roga n’e Doño dje cosecha pa manda trahadó na su cosecha.” (Luc. 10:1, 2) E buki bíblico di Echonan ta conta nos con Jehova a contestá e oracionnan ei. Pa Pentecoste 33 E.C., e cantidad di disipel a crece bira rond di 120. Anto, nan a alcansá máximonan consecutivo di 3.000 i 5.000 disipel. (Echo. 1:15; 2:41; 4:4) Despues di esei, “e cantidad di disipelnan a sigui aumentá.” (Echo. 6:7) Mescos tambe den nos tempu actual, nos tin cu sigui roga e Doño pa mas predicadó di Reino ainda! Na armonia cu nos oracionnan, cada publicadó di congregacion mester haci areglonan definitivo pa participá den e ministerio tur luna.
9 Por fabor, analisá e luna di april riba e Kalender 2000 cuidadosamente. Ya cu e promé dos dianan dje luna ta un diasabra cu un diadomingo, bo por planea pa participá den sirbishi e fin di siman ei, i asina cuminsá for di trempan den e luna? Bo por apoyá tur “Dia di Revista” durante e luna ei cu bo grupo di Studio di Buki di Congregacion? Ke tal di dedicá un ora of mas tur diadomingo den e ministerio? Ta bira scur mas lat durante e luna ei. Bo por haci areglo pa predicá algun anochi? I no lubidá di probechá di tur e chensnan cu bo tin di duna testimonio informal na trabou, na scol of ora bo ta haciendo otro actividadnan di tur dia. Marca e dianan cu bo por dedicá algun tempu den e ministerio, i usa e kalender pa skirbi bo oranan di sirbishi pa e luna.
10 April lo ta un bon luna pa tur cu ta cualificá i cu e ancianonan a aprobá, cuminsá sirbi como publicadó no-bautisá. Si bo ta studia Bijbel cu un persona, el a haci suficiente progreso pa bai cerca e superintendente presidente pa pidi p’e ser considerá como un publicadó dje bon nobo? Si bo tin yunan no-bautisá, bo a papia tocante nan progreso spiritual cu e ancianonan? Esaki lo no ta un bon luna pa nan bira publicadó?—Mira e buki Nos Ministerio, página 97-100.
11 Den nos esfuerso pa haci april 2000 nos mihó luna di tur tempu, nos tur tin cu participá den e ministerio anto entregá nos raport di sirbishi di veld na fin di luna. (Compará cu Marco 6:30.) Mester animá publicadónan nobo no-bautisá cu participá den sirbishi di veld pa promé biaha pa entregá nan raport na tempu. Dor di haci nos parti, nos por contribuí na un manera excelente n’e raport di april i n’e gritu fuerte di alabansa cu Jehova lo ricibí mediante nos esfuersonan di duna testimonio.
12 Trece Otro Hende Memorial Huntu cu Bo: Nos lo no keda conmoví pa mira un máximo nobo di asistencia n’e Memorial di aña 2000 di Cristo su morto? Sí! Esei lo nificá e cantidad mas grandi cu nunca di hende cu a reuní huntu pa manifestá nan aprecio pa e mayor expresion di amor cu Jehova Dios i Jesucristo a haci na nos fabor! (Juan 3:16; 15:13) Haci e areglo necesario pa asina nada no stroba abo i bo famia di asistí na Memorial.
13 Awor ta e tempu tambe pa cuminsá invitá hende pa Memorial. Traha un lista di tur hende cu lo bo tin gana pa nan asistí. Incluí tur esnan cu a yega di studia Bijbel den pasado, esnan cu ta studia awor i tur bo rebishitanan. Agregá n’e lista bo conocínan di trabou, di scol i di den bario, i tambe ken cu bo ta haci negoshi cuné. No lubidá di incluí otro conocínan i bo famianan. Despues di compilá e lista, cuminsá extendé un invitacion sincero i personal na cada un. Laga nan comprendé bon cla ki dia i na unda lo tene e Memorial. Segun cu 19 di april ta yega mas cerca, duna esnan riba bo lista un recordatorio, sea en persona of via telefon. Ofrecé nan pa bin Memorial huntu cu bo e anochi ei.
14 Na armonia cu instruccion anterior di Sociedad, e cuerpo di anciano lo haci un esfuerso special pa animá tur publicadó inactivo den e teritorio pa asistí na Memorial. (Mat. 18:12-14) E ancianonan lo kier repasá e carta di Sociedad fechá 2 di februari 1999. E secretario di congregacion lo traha un lista di tur publicadó inactivo, i e superintendente di sirbishi lo asigná ancianonan pa bishitá nan i invitá nan pa Memorial. Kisas dor di ricibí un bishita di pastoreo animante mas pronto posibel, por yuda e personanan inactivo aki bira activo atrobe den e ministerio di veld durante april mes. Lo ta edificante pa nan si invitá nan pa traha den sirbishi di veld cu un publicadó experenciá.
15 Animá Bon Apoyo pa April! Lo e rekerí bon coordinacion di parti di tur anciano, sirbidó ministerial i cabesnan di famia, pa haci april 2000 nos mihó luna di tur tempu. E ancianonan lo ta diligente pa soru cu tur cos ta bon organisá i pa hiba delantera. (Heb. 13:7) Mester haci areglonan práctico pa reunionnan pa sirbishi den siman i pa fin di siman. Por haci areglo pa mas reunion pa sirbishi parti atardi i comienso di anochi. Mester pega un programa completo di tur loke tin planeá pa april, riba e borchi di informacion. Lo tin cu asigná un persona pa atendé cada reunion programá pa sirbishi. Mester percurá suficiente teritorio pa cada grupo.
16 Durante april e oferta principal lo ta E Toren di Vigilancia i Spierta! Mester ofrecé e foyeto Rekerí na tur hende cu mustra interes den un esfuerso pa cuminsá studionan di Bijbel. Pues, mester tin suficiente revista i foyeto na stock.
17 Na fin dje luna, tur conductor di studio di buki i nan asistente lo kier animá cada persona den nan grupo pa entregá nan raport di sirbishi asina cu e luna terminá. Kisas e rumannan por haci esaki asta for di diadomingo, 30 di april. Anto, ora e secretario ta conta e raportnan, si e nota cu algun publicadó no a entregá nan raport, e por recordá nan bondadosamente pa haci esei promé cu dia 6 di mei, ora cu e tin cu entregá e raport di congregacion na Sociedad. Kisas e por pidi e conductornan di studio di buki pa yud’é haña contacto cu e publicadónan ei.
18 E temporada di Memorial ta e periodo di aña mas importante p’e pueblo di Dios. E mester ta un tempu hopi druk pa nos tur cu ta den sirbishi di Jehova. Lo e ta asina si tur hende participá mas pleno posibel como un publicadó dje bon nobo, si tur esnan cu por inscribí como pionero auxiliar haci esei i si nos ta diligente den bin cu otro hende n’e Memorial di Cristo di su morto. Laga nos pidi sinceramente den oracion pa Jehova su bendicion ricu miéntras nos ta haci esfuerso pa april 2000 bira nos mihó luna di tur tempu, tur esei p’e alabansa i gloria di Dios!—Heb. 13:15.
[Blurb on page 3]
Pioneronan Auxiliar
Nos Máximo di Tur Tempu: 257
(Mart 1997)
[Box on page 4]
Total di Publicadó
Nos Máximo di Tur Tempu: 2.197
(Mei 1998)
[Box on page 5]
Asistencia na Memorial
Nos Máximo di Tur Tempu: 6.478
(1995)