Prediká i Duna Testimonio Kabal
1 Komo “un lider i komandante” Hesus a entrená su disipelnan pa e inmenso trabou di prediká ku tabatin nan dilanti. (Isa. 55:4; Luk. 10:1-12; Echo. 1:8) Apòstel Pedro a deskribí e mandato ku Hesus a duna nan ku e siguiente palabranan: “El a manda nos prediká pa e pueblo i pa duna testimonio [kabal] ku esaki ta Esun ku Dios a nombra komo hues di e bibunan i di e mortonan.” (Echo. 10:42; NW ) Kiko duna un testimonio kabal ta enserá?
2 Nos por siña hopi dor di konsiderá e ehèmpel di apòstel Pablo. Ora el a reuní ku e ansianonan di e kongregashon na Efeso, el a rekordá nan: “Mi no a laga di deklará nada ku tabata di probecho pa boso i tabata siña boso públikamente i di kas pa kas, dunando testimonio [kabal], tantu na hudiu komo na griego, di repentimentu pa ku Dios i di fe den nos Señor Hesukristu.” Apesar ku e mes tabata bou di prueba, Pablo a buska manera pa alkansá mas tantu hende posibel ku e bon nobo. E no a keda satisfecho ku djis kompartí e bèrdatnan básiko ku su oyentenan, sino ku el a buska manera pa bisa nan “henter e propósito di Dios.” Pa logra esaki, e tabata dispuesto pa hasi esfuerso i sakrifisio. Ademas el a bisa: “Mi no ta konsiderá mi bida di ningun balor, ni komo algu presioso pa mi mes, kontal ku mi por terminá e kurso di mi bida i e ministerio ku mi a risibí di Señor Hesus, pa duna testimonio [kabal] di e evangelio di e grasia di Dios.”—Echo. 20:20, 21, 24, 27; NW.
3 Kon nos por imitá Pablo su ehèmpel awendia? (1 Kor. 11:1) Dor di buska famianan digno asta ora nos mes ta bou di prueba, dor di hasi esfuerso pa alkansá hende di tur grupo étniko i idioma ku e bon nobo, i dor di ser diligente den yuda esnan interesá ku nos haña. (Mat. 10:12, 13) Esaki ta rekerí tempu, esfuerso i amor pa hende.
4 Bo Por Sirbi Komo Pionero Ousiliar? Mart ku aprel por ta un ekselente oportunidat pa bo duna testimonio kabal dor di traha pionero ousiliar. Esta un gran animashon tabata aña pasá pa mira asina tantu publikadó hasi un esfuerso spesial pa traha pionero ousiliar!
5 Un ruman muhé di 80 aña di edat ku tin hopi problema ku salú a wòrdu konmoví pa e animashon ku Yehova su organisashon a duna. El a skirbi: “El a sende e chispa di kandela ku mi tabatin den mi kurason pa hopi tempu, i el a pone mi sinti ku mi tabatin ku traha pionero ousiliar por lo ménos un biaha mas.” El a disidí di traha pionero ousiliar na mart. El a bisa: “E promé kos ku mi a hasi ta kai sinta i kalkulá e gastu. Dor ku mi tabatin mester di e yudansa di mi yu muhé mi a kont’é mi plan. El a duna mi un sorpresa dor di buska un formulario pa e tambe traha pionero.” Durante e luna ei, e ruman muhé di edat avansá aki a traha 52 ora den sirbishi. “Hopi bes mi mester a pidi Yehova den orashon pa renobá mi forsa ora mi tabata sinti ku mi no tabata por mas. Na final di e luna ei, mi tabata sumamente felis i kontentu, i mi a gradisí Yehova hopi bes pa e yudansa ku el a duna mi. Lo mi tin gana di purba trah’é atrobe.” E echo ku el a sintié felis trahando pionero por animá otronan ku tin masha gana di traha pionero ousiliar apesar di problema serio ku salú.
6 Un ruman hòmber ku inesperadamente a pèrdè trabou a probechá di e oportunidat pa traha pionero ousiliar. Durante e luna ku el a traha pionero ousiliar, el a sinti mas selo pa e trabou di prediká, i pa fin di e luna ei el a kuminsá un studio di Beibel nobo. Reflekshonando riba loke el a eksperensiá, el a bisa: “Ki un luna dushi!” Esta animá el a sintié di tin Yehova su guia i yudansa! Sí, Yehova a basha bendishon na abundansia riba dje pa e esfuerso èkstra ku el a hasi den sirbishi, i Yehova lo hasi e mesun kos pa bo.—Mal. 3:10.
7 Pa hopi ruman no ta fásil pa traha pionero ousiliar. No opstante, apesar di responsabilidat di trabou i di famia i tambe problemanan personal, hopi ruman a logra traha pionero. Duna un testimonio kabal hopi bes ta nifiká ku nos tin ku sakrifiká nos tempu i energia presioso, pero e bendishonnan ta inkomparabel.—Pro. 10:22.
8 Mart ku aprel ta lunanan ideal pa traha pionero ousiliar. Mart tin sinku wikènt. Dor di probechá di esakinan i hasi bon uso di e oranan part’i anochi, lo ta posibel pa algun di esnan ku ta traha henter dia sirbi komo pionero ousiliar. Ademas, kisas bo por probechá pa prediká durante e dianan di fiesta den luna di aprel. Algun kisas tin fakansi di skol òf di trabou, loke por yuda nan alkansá e rekisito di 50 ora. Pa logra programá 50 ora den sirbishi durante mart ku aprel, bo ta kere ku bo por usa un di e skemanan pa pionero ousiliar sugerí den e artíkulo aki? Papia tokante bo skema ku otronan; sin duda algun di nan lo sinti nan animá pa kompañá bo den sirbishi. Si bo no por traha pionero ousiliar, pone meta spesífiko pa e lunanan aki, i traha ku esnan ku sí por hasié. Plania for di awor pa oumentá bo sirbishi durante mart ku aprel!
9 Mustra Apresio pa Memorial: Tur aña durante e temporada di Memorial, apresio pa e reskate ta motivá míles di ruman pa ‘hasi bon uso di nan tempu’ dor di traha pionero ousiliar. (Efe. 5:15, 16) Aña pasá, riba e islanan ABC tabatin 348 pionero ousiliar na mart i na aprel 125. Esei ta un promedio di 237 pa kada un di e lunanan aki. Kompará esei ku e promedio di 77 hende ku a traha pionero ousiliar durante kada un di e lunanan anterior di e aña di sirbishi. E temporada aki di Memorial ta un otro ekselente oportunidat pa mustra nos apresio sinsero pa Kristu su sakrifisio di reskate dor di oumentá nos aktividat den sirbishi di vèlt.
10 Segun ku 16 di aprel ta aserká, meditá riba loke Memorial ta nifiká pa bo. Pensa riba e susesonan ku a hiba na Kristu su morto i e pensamentunan ku tabata preokup’é profundamente. Reflekshoná tambe riba e goso ku tabatin poné dilanti Hesus i kon esaki a yud’é wanta e maltrato ei. Meditá riba su posishon aktual komo Kabes di e kongregashon, supervisando e trabou di prediká i hasi disipel. (1 Kor. 11:3; Heb. 12:2; Rev. 14:14-16) Anto kaba demostrá bo apresio pa tur loke Kristu a hasi dor di partisipá, segun bo sirkunstansianan, mas tantu posibel den e trabou di prediká.
11 Animá Otronan pa Duna Testimonio Kabal: Dor di partisipá den e sirbishi di pionero ousiliar, ansianonan i sirbidónan ministerial ta den un bon posishon pa animá otro miembronan di kongregashon. Ora nan ta traha ku publikadónan den sirbishi di vèlt i ora nan ta hasi pastoreo, nan tin oportunidatnan ekselente pa personalmente yuda otronan partisipá plenamente den e aktividat spesial aki. Laga nos tur hasi orashon tokante e asuntu aki, i asina duna mas forsa na nos esfuerso uní pa duna un testimonio kabal.
12 Maske tur e ansianonan i sirbidónan ministerial lo koperá ku e areglonan pa mas aktividat durante e lunanan di mart ku aprel, spesialmente e superintendente di sirbishi mester hasi areglonan apropiá pa e trabou di evangelisá. E mester organisá na unda i ki dia pa reuní pa sirbishi, na oranan ku ta kumbiniente pa mayoria publikadó, anto laga anunsiá esakinan regularmente. Kisas por hasi areglo pa reuní vários bes durante dia, dunando tur den e kongregashon un oportunidat pa partisipá den diferente maneranan pa duna testimonio. Esaki por inkluí traha teritorio di negoshi, prediká riba kaya, traha di kas pa kas, hasi rebishita i duna testimonio na telefon. Ademas, e mester hasi areglo pa durante e lunanan ei tin sufisiente literatura, revista, i teritorio disponibel.
13 E oferta pa mart lo ta e buki Conocimentu, ku e meta di kuminsá studio di Beibel. Den e suplemento di Nos Ministerio di Reino di yanüari 2002 tin ekselente sugerensia enkuanto kon pa ofresé e buki Conocimentu. Oferta pa aprel lo ta e revistanan E Toren di Vigilansia i Spièrta! Purba usa e presentashonnan sugerí ku tin den e kolumna “Kiko Nos Por Bisa di e Revistanan.” Tur hende mester tuma tempu pa prepará bon pa asina nan por duna un testimonio kabal.
14 Esta felis nos ta di por traha bou di guia di e Kabes di e kongregashon, Kristu Hesus, i ku nos tin e privilegio di kompartí e bon nobo ku otro hende! Segun ku e lunanan di mart ku aprel ta aserká, laga nos hasi esfuerso un biaha mas pa hasi e lunanan aki nos mihó lunanan di tur tempu miéntras ku nos ta obedesé Kristu su mandato pa prediká i duna un testimonio kabal.
[Box on page 4]
Vários Skema pa Traha Pionero Ousiliar na Mart ku Aprel 2003
[Caption on page 4]
Dia Ora
Djaluna 1 2 — — 2 —
Djamars 1 — 3 — — —
Djarason 1 2 — 5 — —
Djaweps 1 — 3 — — —
Djabièrnè 1 2 — — — —
Djasabra 5 4 3 5 6 7
Djadumingu 2 2 3 2 2 3
Mart 56 56 54 55 50 50
Aprel 50 50 51 53 — —
Lo bo por usa un di e skemanan aki?