Bo Kongregashon Ta Traha Su Teritorio Kabalmente?
1 For di e statnan na Hudea te den e kunukunan di Galilea, Hesus a duna un testimonio kabal den henter e teritorio grandi di antiguo Israel. (Mar. 1:38, 39; Luk. 23:5) Nos tambe tin ku papia ku mas tantu hende posibel tokante e bon nobo. (Mar. 13:10) Sin embargo, esaki por ta un desafio. Dikon?
2 Algun kongregashon tin teritorio ku ta abarká un área grandi. Kongregashonnan di otro idioma kisas tin ku traha den barionan hopi poblá, en buska di hende ku ta papia nan idioma. Kiko nos por hasi pa yuda hende ku ta biba den nos teritorio siña e bèrdat tokante Yehova, Hesus i e Reino?
3 Planea Kuidadosamente: E superintendente di sirbishi i e sirbidó di teritorio tin ku supervisá e esfuersonan di e kongregashon pa asina logra mas tantu. Kisas nan por programá djasabranan spesial ora ku mayoria publikadó por traha henter dia den sirbishi. Si ta posibel, planea pa traha mas largu den sirbishi di fèlt, kisas boso por asta bai ku kos di bebe òf un lùnch pa kome mèrdia. Podisé boso por reuní pa sirbishi mas trempan ku normal ya asina tin mas tempu pa aktividat produktivo. Asigná un grupo chikí di publikadó den kada outo ya asina tur hende ta haña chèns di papia.
4 Esnan ku ta traha den teritorio di otro idioma por spar hopi tempu balioso ora nan tin un lista al dia di tur e nòmber i adrèsnan di e hendenan ku ta papia e idioma i un mapa aktualisá. Publikadónan por yuda e kongregashonnan di otro idioma dor di nota e adrèsnan kaminda e hendenan no ta papia papiamentu i duna e informashon aki na e superintendente di sirbishi. Organisá e teritorionan di tal manera ku un grupo por bishitá tur e adrèsnan den mesun área.
5 Hasi sigur ku boso tin sufisiente literatura. Kisas ta apropiado pa laga un tratado òf un revista di fecha ménos resien kaminda no tin hende na kas. Si e tratado Lo Bo Kier Sa Mas Tocante Bijbel? ta disponibel den bo idioma, ofres’é na tur hende ku bo topa i lag’é na e kasnan kaminda no tin hende.
6 Koperá Plenamente: Pa traha e teritorio kabalmente tur hende den kongregashon mester koperá. Ta un muestra di konsiderashon pa kòrda ku esnan ku ta kore huntu den mesun outo por yuda kubri gastu di gasolin. Usa sano huisio ora bo topa doñonan di kas ku kier kòmbersá. Semper kòrda ku mester alkansá tur hende den e teritorio, i tene konsiderashon ku esnan ku ta wardando riba bo den bo grupo. Si bo ta deseá di sigui papia mas largu ku un persona interesá, ta posibel pa hasi areglo pa e restu di e grupo por sigui den sirbishi di fèlt?
7 Hasi areglonan definitivo pa bai bèk i atendé e personanan ku a mustra interes. Fuera di su adrès, purba haña e number di telefòn di un persona interesá ya asina bo por tuma kontakto kuné i sigui dun’é testimonio via telefòn. Si sierto kayanan no tin nòmber òf e kasnan no tin number, pinta un mapa òf deskribí kon pa haña e kas di e persona interesá ora di hasi rebishita.
8 Ki un privilegio nos tin di por kumpli ku e instrukshon di Hesus: “Den kualkier stat òf pueblito ku boso drenta, buska pa haña sa ta ken ta digno den dje”! (Mat. 10:11) Yehova sigur lo bendishoná bo esfuersonan segun ku bo ta dediká bo mes di buena gana na e trabou sumamente rekompensador aki!