Teritorio Personal Tin Su Benefisionan
1. Kiko bo por hasi den un kongregashon ku tin hopi teritorio?
1 Den un kongregashon ku tin hopi teritorio, lo bo deseá di tin un teritorio personal, esta unu pa bo mes, tal bes serka di bo kas. E buki Organisá, página 103, ta splika: “Un teritorio personal kaminda bo por yega fásilmente lo permití bo hasi bon uso di e tempu ku bo por dediká na sirbishi di vèlt. Tambe, kisas lo bo kier invitá un otro publikadó pa traha huntu ku bo den bo teritorio personal.”
2. Kon bo por usa bo teritorio personal pa komplementá e trabou di prediká den grupo?
2 Pa Komplementá e Trabou di Prediká den Grupo: Si bo haña un teritorio personal banda di bo lugá di trabou, bo por traha esaki durante bo pousa òf atardi promé ku bo bai kas, kisas huntu ku un publikadó ku ta traha den serkania. Si bo a haña un teritorio banda di bo kas, abo i bo famia por skohe e oranan mas kumbiniente parti atardi pa prediká den dje. Den e kaso ku bo no ta asistí na un reunion pa sirbishi di vèlt, lo ta bon pa promé ku bo kuminsá prediká bo hasi orashon pa pidi Yehova su direkshon. (Flp. 4:6) Ademas, ta bon pa bo balansá e tempu ku bo ta traha den e teritorio personal ku e tempu ku bo ta apoyá e areglonan di sirbishi di bo kongregashon. Foral den wikènt, ora hopi publikadó ta sali den sirbishi, por lo general ta mihó bo apoyá bo grupo di sirbishi di vèlt.
3. Kiko ta e benefisionan ku bo ta haña ora bo tin un teritorio personal?
3 Benefisio: Si bo tin un teritorio personal, bo tin un kaminda pa prediká ki ora bo haña un chèns. Bo por yega bo teritorio mas lihé i dediká mas tempu na e trabou di prediká. Esaki a habri kaminda pa algun publikadó traha pionero ousiliar òf asta regular. Komo ku e personanan ku mustra interes ta di e mesun bisindario, ta mas fásil pa hasi rebishita i kuminsá estudio di Beibel. Hopi ruman ta haña ku un teritorio personal ta yuda nan siña konosé e doñonan di kas i asina gana nan konfiansa. Esei ta spesialmente e kaso ora nan por traha e teritorio vários biaha promé ku nan entreg’é bèk pa otro publikadó tambe por hañ’é. Un teritorio personal por yuda abo i bo famia kumpli ku boso sirbishi mas kabalmente?—2 Tim. 4:5.