Reunion pa Sirbishi di Vèlt

1. Dikon nos ta deseá di sali den sirbishi di vèlt na un manera organisá?

¹ Hesus a pone un bon ehèmpel den hasi e trabou di prediká e Reino na un manera organisá i efisiente. Awe tambe e rumannan responsabel pa e kampaña mundial di prediká e Reino ta deseá mashá pa mira e obra akí tuma lugá na e manera ei. Na armonia ku esaki, kongregashonnan rònt mundu ta usa e reunionnan pa sirbishi di vèlt komo un manera pa organisá grupo di predikadó di Reino pa bai den sirbishi di vèlt.—Mat. 24:45-47; 25:21; Luk. 10:1-7.

2. Kiko nos por spera na e reunionnan pa sirbishi di vèlt?

² Un Areglo Ekselente: E propósito di reunion pa sirbishi di vèlt ta pa duna animashon, instrukshon práktiko i guia na e rumannan promé ku nan sali den sirbishi. Por konsiderá e teksto di dia brevemente ora ta bisto ku e ta apliká na sirbishi di vèlt. Tin biaha por trata rekordatorionan for di Nos Ministerio di Reino, e buki Rasonamentu òf kisas e buki Skol di Ministerio pa asina prepará tur publikadó presente pa e predikashon di e dia ei. Por tene tambe un demostrashon kòrtiku relashoná ku e publikashon ku ta e oferta. Promé ku konkluí ku orashon, tur presente mester sa ku ken nan ta traha i na unda e teritorio ku nan ta bai traha ta keda. Djis despues di e reunion akí, ku no ta dura mas ku 15 minüt, tur ruman lo mester ta riba kaminda pa e teritorio.

3. Ken ta responsabel pa organisá e reunionnan pa sirbishi di vèlt?

³ Kon Ta Organisá e Reunionnan Ei? E superintendente di sirbishi, hibando delantera, tin e responsabilidat di kordiná e reunionnan pa sirbishi di vèlt. Superintendentenan di grupo, òf nan asistente, tin e responsabilidat di kompañá nan respektivo grupo di sirbishi den fin di siman. Den siman, kisas tin ansiano òf sirbidó ministerial ku por kompañá e gruponan di sirbishi. Superintendentenan di grupo ta traha den estrecho koperashon ku e superintendente di sirbishi pa asina nan tin sufisiente teritorio pa nan grupo por traha di kas pa kas den fin di siman. Pa loke ta den siman, e superintendente di sirbishi lo supervisá e areglonan ku tin relashoná ku e rumannan ku ta saka e gruponan pa bai den sirbishi di vèlt.

4-6. (a) Ki meta reunionnan pa sirbishi di vèlt ke logra relashoná ku e teritorio di e kongregashon? (b) Menshoná algun punto ku por konsiderá pa determiná kuantu reunion pa sirbishi di vèlt mester tene.

⁴ Na Unda i Ki Ora Mester Tene e Reunionnan Akí? En bes di laga henter e kongregashon reuní na un solo lugá, por lo general ta mihó pa tene e reunionnan akí na lugánan kumbiniente plamá den e teritorio, normalmente kasnan privá, ku e intenshon di traha e teritorio di e kongregashon na un manera efikas. Por usa Salòn di Reino tambe pa e reunionnan akí. Hopi kongregashon ta usa Salòn di Reino pa tene un reunion pa sirbishi di vèlt riba djadumingu djis despues di nan diskurso públiko i Estudio di Toren di Vigilansia. Mester hasi esfuerso pa e lugá di reuní i e teritorio ta mas serka posibel di otro. P’esei, tempu-tempu por repasá e areglonan ku tin, pa hasi sigur ku e lugánan di reuní aktual ta apropiá ainda pa traha e teritorio na un manera efisiente i kompletu.

⁵ E mihó ora pa tene e reunionnan akí—i tambe kuantu biaha pa siman òf pa dia mester tene nan—ta dependé di e tipo di teritorio ku e kongregashon tin. Por usa e siguiente preguntanan komo un guia pa determiná na unda i ki ora ta mihó pa tene e reunionnan pa sirbishi di vèlt.

⁶ Kua teritorio tin mester di mas atenshon? Kua ta e mihó ora pa traha di kas pa kas? Mester programá un ora parti anochi pa traha di kas pa kas òf pa hasi rebishita? Tur areglo pa sirbishi di vèlt mester ta riba e bòrchi di informashon di kongregashon. E meta di tur publikadó di Reino ta pa kubri nan teritorio asigná kabalmente, te na e grado ku nos tambe por bisa meskos ku apòstel Pablo: “No tin mas teritorio kaminda mi no a prediká ainda.”—Rom. 15:23, NW.

7. Kiko ta responsabilidat di e ruman asigná pa saka e grupo?

⁷ Kon pa Kondusí Reunion pa Sirbishi di Vèlt: E ruman asigná pa atendé e reunion akí ta demostrá pa medio di su bon preparashon ku e tin un rèspèt profundo pa e areglo teokrátiko akí. E reunionnan akí mester kuminsá na ora i mester ta instruktivo i breve, entre 10 pa 15 minüt. Promé ku e reunion kuminsá, e konduktor mester tin teritorio pa e grupo traha aden. Ounke no tin nodi warda riba hende ku yega despues ku e reunion pa sirbishi di vèlt a terminá, lo ta bon pa laga un nota ku ta indiká na unda e grupo a bai traha. Djis despues ku e reunion kaba, tur hende mester ta riba kaminda pa e teritorio asigná. Un reunion pa sirbishi di vèlt bon organisá i instruktivo sin duda lo duna tur presente e guia nesesario pa kumpli ku nan ministerio riba e dia ei.—Pro. 11:14.

8. Menshoná algun manera ku e rumannan ku ta asistí na reunion pa sirbishi di vèlt por koperá ku esnan ku ta hiba delantera.

⁸ Ora Nos Asistí na Reunion pa Sirbishi di Vèlt: Koperashon ta esensial. (Heb. 13:17) Ora ta posibel, e ruman ku ta organisá e grupo lo yuda ken ku tin mester di un hende pa traha kuné. Ta bon si por tin publikadó ku eksperensia presente, ya asina nan por yuda publikadónan mas nobo òf esnan ku tin ménos eksperensia. Rumannan ku ta dispuesto pa traha de bes en kuando ku otro hende lo por logra hopi kos bon. (Pro. 27:17; Rom. 15:1, 2) Nos tur mester hasi un esfuerso spesial pa ta puntual. Nos rèspèt pa e areglo teokrátiko akí i konsiderashon pa nos rumannan kristian lo motivá nos pa hasi e ahustenan nesesario relashoná ku esaki.—2 Kor. 6:3, 4; Fil. 2:4.

9. Menshoná algun manera balioso ku pioneronan por apoyá e reunion pa sirbishi di vèlt.

⁹ Apoyo di Parti di Pionero: E apoyo ku pioneronan ta duna na e reunionnan pa sirbishi di vèlt ta di gran balor i ta animá tur presente. Ta di komprondé ku e pioneronan tin hopi responsabilidat. Fuera di kondusí estudio di Beibel i hasi rebishita, nan programa diario kisas ta inkluí bai trabou i atendé ku responsabilidatnan familiar. Pues, e pioneronan no mester sinti ku nan tin ku apoyá tur reunion pa sirbishi di vèlt ku e kongregashon ta organisá, foral si tin tur dia. Sinembargo, e pioneronan probablemente por apoyá por lo ménos algun reunion pa sirbishi pa siman. Te na sierto grado, reunion pa sirbishi di vèlt ta yuda entrená miembronan di e kongregashon i e konosementu i eksperensia di e pioneronan por ta di gran yudansa pa otro publikadó. E echo ku pioneronan ta partisipá konstantemente den sirbishi di vèlt ta duna nan chèns di gana eksperensia den e ministerio, i nan por kompartí esaki ku otro publikadó. Nan partisipashon entusiasmá den e ministerio i na reunionnan pa sirbishi di vèlt ta hasi nan un ehèmpel ku nos por imitá i ta algu ku ta ser apresiá mashá.

10. Dikon ta na su lugá pa tur publikadó di Reino duna nan apoyo kompletu na e reunionnan pa sirbishi di vèlt?

¹⁰ Meskos ku tabata e kaso ku Hesus i su disipelnan, un gran parti di nos trabou di prediká e Reino ta tuma lugá pa medio di e predikashon di kas pa kas. E propósito di reunion pa sirbishi di vèlt ta pa nos haña un interkambio di estímulo i pa nos por partisipá na un manera efektivo den e obra akí. Tur publikadó di e bon notisia lo mester apoyá e tipo di areglonan teokrátiko ei te kaminda nan por. (Echo. 5:42; 20:20) Laga nos tur duna nos apoyo kompletu na e reunionnan pa sirbishi di vèlt. Si nos hasi esei, nos por ta sigur di Yehova su bendishon i nos por alegrá kurason di nos Lider, Hesukristu, segun ku nos ta prediká e bon notisia di e Reino di Dios.—Mat. 25:34-40; 28:19, 20.