Reunion pa Sirbishi di Vèlt Ku Ta Logra Su Ophetivo
1. Kiko ta e ophetivo di e reunion pa sirbishi di vèlt?
1 Na un okashon, Hesus a reuní ku 70 di su disipelnan promé ku nan a sali bai prediká. (Luk. 10:1-11) Komo animashon el a rekordá nan ku nan no tabata nan so, Yehova, e “Doño di e kosecha” tabata esun ku lo a guia nan. Tambe el a duna nan instrukshon ku a yuda nan hasi e trabou, i el a organisá nan di manera ku nan a traha “dos dos.” Awe, e reunion ku nos ta tene promé ku nos sali den sirbishi tin e mesun ophetivo, esta pa animá nos, instruí nos i organisá nos.
2. Kuminsando na aprel, den kuantu minüt mester tene un reunion pa sirbishi di vèlt?
2 Aworakí, e reunionnan pa sirbishi di vèlt ta dura 10 pa 15 minüt. Den e par di minütnan ei ta organisá e grupo, parti e teritorio i hasi orashon. Pero kuminsando na aprel, reunion pa sirbishi di vèlt lo dura sinku pa shete minüt. Si tene e reunion akí despues di un otro reunion di kongregashon, lo e dura ménos, ya ku e publikadónan ku ta asistí ya a disfrutá di un programa spiritual. Ora tene e reunion pa sirbishi di vèlt mas kòrtiku, esei lo permití e publikadónan traha mas tempu den sirbishi. Ademas, pionero- òf publikadónan ku a kuminsá prediká promé ku e reunion pa sirbishi di vèlt lo interumpí nan aktividat djis pa un ratu so.
3. Kon ansianonan por organisá e reunionnan pa sirbishi di vèlt?
3 E ansianonan mester organisá e reunionnan pa sirbishi di vèlt di tal manera ku nan ta práktiko pa e publikadónan. Hopi kongregashon a mira ku ta bon pa e gruponan di sirbishi di vèlt reuní na lugánan separá. Esaki ta hasi ku ta mas fásil pa e publikadónan yega na e reunion pa sirbishi di vèlt i e teritorio. E superintendente di grupo por organisá e publikadónan lihé i ta mas fásil p’e duna atenshon na esnan ku tin mester di esei. E kuerpo di ansiano por evaluá ki ta e mihó proseder pa e kongregashon teniendo kuenta ku e situashon lokal. Promé ku sera e reunion ku un orashon kòrtiku, tur publikadó mester sa unda i ku ken nan ta traha.
4. Dikon e reunionnan pa sirbishi di vèlt ta mes importante ku e otro reunionnan?
4 Reunion pa Sirbishi di Vèlt Ta Mes Importante Ku Tur Otro Reunion di Kongregashon: Reunionnan pa sirbishi di vèlt ta pa publikadónan ku ta bai sali den sirbishi, p’esei kisas no ta henter e kongregashon ta asistí. Pero esei no ta nifiká ku e reunion akí ta ménos importante ku otro reunionnan. Meskos ku tur otro reunion, e reunion pa sirbishi di vèlt ta un provishon di Yehova ku ta yuda nos stimulá otro pa mustra amor i hasi bon obra. (Heb. 10:24, 25) P’esei, e ruman ku ta dirigí mester prepará bon pa asina e reunion onra Yehova i benefisiá tur publikadó presente. Te kaminda ku ta posibel, tur publikadó ku ta sali den sirbishi mester hasi nan máksimo esfuerso pa asistí na e reunion.
Reunionnan pa sirbishi di vèlt ta mes importante ku tur otro reunion di kongregashon
5. (a) Ki papel e superintendente di sirbishi tin den organisá reunion pa sirbishi di vèlt? (b) Kon un ruman muhé mester dirigí un reunion pa sirbishi di vèlt? (Wak kuadro na página 6.)
5 Kon e Ruman Ku Ta Dirigí e Reunion Mester Prepará pa Esaki?: Pa un ruman por prepará un parti bon, e mester hañ’é adelantá. Esaki ta konta tambe pa reunion di sirbishi di vèlt. Ora gruponan di sirbishi di vèlt ta reuní na lugánan separá, e superintendente di grupo òf su asistente ta dirigí e reunion. Sinembargo, ora tur e gruponan ta reuní huntu pa sali den sirbishi, e superintendente di sirbishi lo asigná un ruman pa dirigí. Algun superintendente di sirbishi ta duna tur ruman asigná un programa i ta pone un kopia di esaki riba e bòrchi di informashon. Komo ku e kalidat di e reunion ta dependé di e abilidat di siña i di organisá di e ruman ku lo dirigí, e superintendente di sirbishi mester usa sano huisio ora di asigná un ruman. Si riba sierto dia no por tin un ansiano, sirbidó ministerial òf ruman hòmber batisá kualifiká pa dirigí e reunion, e superintendente por asigná un ruman muhé ku eksperensia pa hasi esei.—Wak e artíkulo “Si un Ruman Muhé Tin Ku Dirigí.”
6. Dikon ta importante pa e ruman ku ta dirigí prepará bon?
6 Ora nos haña un parti den e Skol di Ministerio Teokrátiko òf Reunion di Sirbishi, nos ta tum’é na serio i ta prepará bon. Ta masha poko di nos lo warda te ora nos ta riba kaminda pa reunion pa bai pensa kiko nos lo bisa. Si nos tin ku dirigí un reunion pa sirbishi di vèlt, nos tin ku hasi meskos. Awor ku e reunion lo ta mas kòrtiku, ta masha importante pa prepará bon pa asina e ta instruktivo i kaba na tempu. Bon preparashon ta enserá tambe haña e teritorio for di adelantá.
7. Kiko ta algun kos ku e ruman ku ta dirigí por trata? (Wak kuadro na página 6.)
7 Loke Ku Por Trata: Komo ku sirkunstansianan ta varia di un lugá pa otro, e esklabo fiel no a prepará un boskeho pa kada reunion pa sirbishi di vèlt. E kuadro “Loke Por Trata Durante un Reunion pa Sirbishi di Vèlt” ta duna algun sugerensia. Generalmente, ta tene e reunion di manera ku tur publikadó presente por partisipá. Tin biaha, por inkluí tambe un demostrashon bon prepará òf un vidio for di jw.org relashoná ku sirbishi. Ora e ruman ku ta dirigí ta prepará pa e reunion, e mester pensa kiko lo por animá i yuda e rumannan ku ta bai den sirbishi e dia ei.
Ora e ruman ku ta dirigí ta prepará pa e reunion, e mester pensa kiko por animá i yuda e rumannan ku ta bai sirbishi e dia ei
8. Kiko lo ta bon pa trata durante e reunionnan pa sirbishi di vèlt den wikènt?
8 Riba djasabra, mayoria di publikadó ta ofresé E Toren di Vigilansia i ¡Despertad! Hopi di esnan ku ta sali den sirbishi djasabra no por sali den siman, p’esei kisas nan no ta kòrda bon bon e presentashon ku nan a prepará durante nan Adorashon Komo Famia. P’esei, lo ta bon pa e ruman ku ta dirigí e reunion repasá un di e sugerensianan ku tin parti patras di Nos Ministerio di Reino. Un otro opshon ta di purba di inkluí un notisia lokal, un suseso òf dia di fiesta den nos presentashon di revista. Òf kon nos por prepará pa rebishitá un persona ku a aseptá e revistanan. Si tin algun publikadó na e reunion ku a ofresé e revistanan di luna kaba, e ruman ku ta dirigí por pidié duna algun sugerensia breve òf konta algun eksperensia animante. Riba djadumingu por hasi algu similar ku e oferta di luna. Tur ora por ofresé publikashonnan di estudio, manera e foyetonan Bon Notisia i Skucha Dios i e buki Beibel Ta Siña. Pues e ruman ku ta dirigí por papia brevemente tokante kon pa ofresé nan.
9. Ora tin un kampaña spesial, kiko por trata den e reunion pa sirbishi di vèlt?
9 Ora e kongregashon ta partisipá den un kampaña spesial den wikènt, e ruman ku ta dirigí por trata kon pa ofresé e revistanan huntu ku e invitashon òf tratado, i kiko nos tin ku hasi si un persona mustra interes. Un otro opshon ta di konta eksperensianan ku ta mustra e importansia di e kampañanan.
10, 11. Dikon ta importante pa publikadónan prepará bon pa reunion di sirbishi di vèlt?
10 Kon Publikadónan Por Prepará pa e Reunion?: Pa e reunion logra su ophetivo ta dependé tambe di e publikadónan. Si nan prepará for di adelantá pa sirbishi, kisas durante nan Adorashon Komo Famia, nan por partisipá na e reunion. Bon preparashon ta enserá tambe tin e publikashonnan ku nos mester pa sirbishi promé ku e reunion kuminsá. Esei ta evitá ku nos ta tarda pa yega teritorio.
11 Ta importante tambe pa nos hasi esfuerso pa yega e reunion un par di minüt promé ku e kuminsá, manera nos ta hasi pa e otro reunionnan di kongregashon. Si nos yega lat, aparte di stroba, nos ta bruha e areglonan ku ya a ser hasí. Kon asina? E ruman ku ta dirigí ta tene kuenta ku vários faktor promé ku e organisá e grupo. Por ehèmpel, si tin poko publikadó presente, e por opta pa traha un teritorio ku a keda na mitar. Si e teritorio ta muchu leu, kisas e ta laga publikadónan ku no tin outo traha ku esnan ku sí tin. Òf si ta bai prediká den un teritorio ku ta un tiki peligroso, e por pidi algun ruman hòmber traha huntu ku un grupo di ruman muhé òf no muchu leu for di nan. Si tin publikadó ku tin problema ku salú, kisas e ta laga nan prediká kaminda ta plat òf na kasnan ku no tin hopi trapi. E por pidi e publikadónan ku mas eksperensia traha ku esnan nobo. Pero si nos yega lat, e ruman ta hañ’é tin ku kambia e parehanan i areglonan. Klaru, ku por sosodé ku nos tin un motibu bálido pakiko nos a yega lat. Sinembargo, si nos tin kustumber di ta lat, kisas nos tin ku puntra nos mes si ta debí ku nos no tin apresio pa e reunion pa sirbishi di vèlt òf si ta debí ku nos no ta organisá nos kosnan bon.
12. Si bo tin kustumber di traha ku e mesun rumannan, ki ahuste bo por hasi?
12 Publikadónan por palabrá di antemano pa traha huntu den sirbishi òf nan por laga e ruman ku ta dirigí duna nan un kompañero. Pero si bo tin e kustumber di traha ku e mesun rumannan, pakiko no ‘hancha bo mes’ i prediká ku otro publikadó? (2 Kor. 6:11-13, nota.) Lo bo por traha de bes en kuando ku un publikadó nobo i yud’é bira un bon maestro? (1 Kor. 10:24; 1 Tim. 4:13, 15) Durante e reunion, presta atenshon na tur instrukshon ku e ruman ku ta dirigí ta duna, spesialmente enkuanto unda bo tin ku kuminsá prediká. Despues di e reunion, evitá di kambia loke a ser palabrá i sali bai teritorio mesora.
13. Si nos tur duna di nos parti, kon e reunion pa sirbishi di vèlt lo benefisiá nos?
13 E grupo di 70 disipel ku Hesus a manda bai prediká “a bini bèk kontentu.” (Luk. 10:17) Sin duda, e reunion ku Hesus a tene ku nan promé ku nan a kuminsá prediká a yuda ku esei. Awe, e reunion pa sirbishi di vèlt tin e mesun ophetivo. Si nos tur duna di nos parti, e reunionnan akí lo animá nos, instruí nos i organisá nos pa kumpli ku nos enkargo di ta un “testimonio pa tur nashon.”—Mat. 24:14.