Caha Di Pregunta

◼ Ki informacion mester presentá na reunion pa sirbishi di veld?

E propósito di un reunion pa sirbishi di veld ta pa yuda nos enfocá riba e actividad cu tin despues dje reunion: e ministerio. P’esei, e conductor mester ta bon prepará i cla pa compartí algu cu ta animante, specífico i práctico. Si e texto di dia ta trata directamente cu e actividad di predicá, por les’é i consider’é brevemente. Sin embargo, e reunion mester concentrá principalmente riba e trabou den e ministerio, yudando tur cu ta bai predicá pa nan ta mihó prepará pa cumpli cu e ministerio e dia ei.—2 Tim. 4:5.

E conductor por considerá puntonan for di Nos Ministerio di Reino cu ta aplicabel i asina haci tur publicadó conciente dje oferta actual i con pa present’é. Riba Dia di Revista por demostrá un presentacion for dje columna “Kico Nos Por Bisa dje Revistanan.” Pa otro campañanan, e conductor por resaltá un of dos introduccion for dje buki Razonamentu cu ta pas cu e teritorio local. Tambe por considerá of demostrá un aspecto dje ministerio, manera por ehempel con pa usa Bijbel na porta, con pa trata cu un obhecion cu por para e combersacion, con pa ofrecé un studio di Bijbel of con pa rebishitá un persona cu a mustra interes.

Reunionnan pa sirbishi no mag di ta mas largu cu 10 pa 15 minuut, i esei ta incluí organisá e gruponan, asigná teritorio i haci oracion. Ora concluí e reunion, tur hende presente lo mester sa cu ken i na unda nan ta bai traha, i nan mester sali mesora rumbo pa e teritorio. En bista dje echo cu e reunion ta breve, ta importante pa tur publicadó yega na tempu. Ora cu un reunion pa sirbishi ta despues di un reunion di congregacion, manera por ehempel despues dje Studio di Toren di Vigilancia, e mester ta mas corticu. No ta necesario considerá e texto di dia e ora ei, ya cu e rumannan a caba di disfrutá di un excelente consideracion bíblico.

Di antemano mester asigná ruman hombernan bautisá i cualificá pa conducí cada reunion pa sirbishi. Si no tin niun ruman homber disponibel pa hiba delantera riba un dia en particular, e ancianonan mester scoge cua ruman muher bautisá por haci esei si e necesidad presentá. E ruman muher lo ta sintá, i por cuminsá un consideracion dje texto di dia cu e grupo of por trata otro puntonan relacioná cu sirbishi di veld, manteniendo su comentarionan breve. Lo e pone algu pa tapa su cabes.

Reunionnan pa sirbishi di veld ta un bon chens pa nos ser animá i ekipá pa participá den e ministerio. Mas mihó prepará e conductor ta, mas tur presente lo beneficiá.