Benefisiá Plenamente di Reunionnan pa Sirbishi di Vèlt
1 Reunionnan pa sirbishi di vèlt ku ta efektivo ta duna nos berdadero animashon i instrukshon práktiko promé ku nos bai den e ministerio. Nan ta duna nos oportunidat di partisipá den e trabou di prediká huntu ku otro publikadónan pa asina nos por sostené otro i siña for di otro. (Pro. 27:17; Ekl. 4:9, 10) Kiko nos por hasi pa benefisiá plenamente di e reunionnan aki?
2 E Konduktor: Normalmente no tin informashon spesífiko preskribí di antemano pa konsiderá na e reunionnan aki. P’esei, si bo tin ku kondusí, bo mester prepará bon. No tuma e kustumber di outomátikamente konsiderá e teksto di dia, ounke bo por inkluyé den e konsiderashon si e ta relashoná direktamente ku sirbishi. Pensa ki yudansa práktiko lo por benefisiá e publikadónan ku ta bai prediká e dia ei. Por ehèmpel, kisas lo bo ke konsiderá òf demostrá un presentashon. Lo bo por skohe pa repasá sierto informashon for di e buki Rasonamentu, e buki Skol di Ministerio òf un parti di un Reunion di Sirbishi resien. Otro biaha lo bo por konsiderá kon pa trata ku un problema ku lo por surgi den teritorio. Òf lo bo por konsiderá kon pa kultivá interes di e personanan i kuminsá estudionan di Beibel, spesialmente si hopi publikadó lo bai hasi rebishita. Loke sea bo konsiderá, hasié ku entusiasmo i sea positivo.
3 Kuminsá e reunion na tempu, ounke bo sa ku algun publikadó lo bin lat. Usa sano huisio ora di organisá e grupo, i duna teritorio na esnan ku tin mester. E reunion no mester dura mas ku 10 pa 15 minüt, i ora e ta despues di un reunion di kongregashon, e mester ta mas kòrtiku. Promé ku bo finalisá e reunion, tur publikadó mester sa ku ken i na unda nan ta bai traha. Mester konkluí e reunion ku orashon.
4 Loke Abo Por Hasi: Meskos ku na reunionnan di kongregashon, ora nos yega na tempu, nos ta mustra rèspèt pa Yehova i konsiderashon ku otro hende. Partisipá den e konsiderashon. Bo por laga e konduktor asigná un hende pa bo traha kuné, òf bo por hasi bo propio areglonan promé ku e reunion. Si bo ta preferá di hasi bo propio areglonan, hasi esfuerso pa “hancha” bo mes i traha ku un variedat di publikadó en bes di traha kada bes ku bo bon amigunan. (2 Kor. 6:11-13) Unabes e reunion a kaba, bai teritorio mesora i evitá di kambia e areglonan.
5 E reunionnan pa sirbishi di vèlt tin e mesun propósito ku e reunionnan di kongregashon. Nan ta duna nos oportunidat pa “konsiderá kon pa stimulá otro pa stima i hasi bon obra.” (Heb. 10:24, 25) Si nos hasi esfuerso pa benefisiá di e reunionnan aki, esaki lo yuda nos kumpli ku nos ministerio ku realmente ta un “bon obra”!
[Study Questions]
1. Kon reunionnan pa sirbishi di vèlt por yuda nos?
2. Kiko ta algun kos ku e konduktor lo por konsiderá?
3. Kon largu e reunion mester dura, i kiko mester tuma lugá durante e tempu ei?
4. Kiko lo yuda tur publikadó benefisiá plenamente di e reunionnan pa sirbishi di vèlt?
5. Kiko ta e propósito di reunionnan pa sirbishi di vèlt?