Kon Bo Por Benefisiá di e Grupo di Sirbishi di Vèlt?
1. Menshoná algun benefisio di e Estudio di Buki di Kongregashon ku ainda nos por haña den e grupo di sirbishi di vèlt.
1 Bo ta kòrda e tempu di e Estudio di Buki di Kongregashon? Bo ta kòrda kon nos tabata reuní den gruponan chikí den un ambiente relahá? Esaki sin duda a permití nos forma amistatnan ku a yuda nos keda firme den fe. (Pro. 18:24) E superintendente di estudio di buki tabata konosé nos sirkunstansianan personal i por a animá nos. (Pro. 27:23; 1 Ped. 5:2, 3) Wèl, ainda nos por haña e benefisionan ei mediante e grupo di sirbishi di vèlt.
2. Kiko nos por hasi pa forma amistat den nos grupo di sirbishi di vèlt ku por ta un apoyo spiritual pa nos?
2 Tuma Inisiativa: Generalmente gruponan di sirbishi di vèlt ta mes grandi ku e gruponan di estudio di buki di ántes. Ora nos traha den sirbishi “lado a lado” ku e rumannan di nos grupo, nos por forma amistatnan será. (Flp. 1:27) Bo a traha ku tur ruman den bo grupo? Bo por ‘hancha bo mes’ pa ku esei? (2 Kor. 6:13, nota) Ademas, nos por invitá un òf mas ruman di nos grupo na nos Adorashon Komo Famia òf pa kome algu huntu. Den algun kongregashon, tur siman un grupo di sirbishi di vèlt ta invitá e oradó bishitante pa kome. Asta si e oradó no por ta presente, tur publikadó di e grupo asigná ta bini huntu pa kompartí un kuminda i enkurashá otro.
3. Kon nos por haña atenshon spiritual den e grupo di sirbishi di vèlt?
3 Aunke nos ta reuní komo kongregashon dos biaha pa siman so, esei no ta nifiká ku e publikadónan ta haña ménos atenshon spiritual di e ansianonan. E superintendente di grupo tin e responsabilidat di duna kada publikadó animashon i entrenamentu pa sirbishi. Si bo superintendente di grupo no a yega di traha ku bo den sirbishi, dikon bo no ta pidié pa bo traha kuné? Ademas, un wikènt pa luna, e superintendente di sirbishi ta bishitá un grupo diferente. Den kongregashonnan mas chikitu, e por bishitá kada grupo dos biaha pa aña. Bo ta sali den sirbishi ora e superintendente di sirbishi bishitá bo grupo?
4. (a) Kon ta organisá reunionnan di sirbishi di vèlt? (b) Bo ta kere ku un dia bo por ofresé bo kas pa tene e reunionnan ei?
4 Por lo general, ta mihó pa kada grupo reuní apart pa sirbishi di vèlt den wikènt. Ora tin diferente lugá pa reuní na mas o ménos e mesun orario, ta mas fásil pa e rumannan yega na e reunion di sirbishi di vèlt. Por parti e grupo mas lihé i sali bai e teritorio sin pèrdè hopi tempu. Ademas, e superintendente di grupo por ta mas pendiente di e publikadónan di su grupo. Sinembargo, pa motibu di sirkunstansianan kisas ta konsehabel pa dos òf mas grupo sali huntu. Si henter e kongregashon ta reuní riba e promé djasabra di luna òf despues di e Estudio di Toren di Vigilansia, hopi biaha ta mihó pa kada publikadó sinta huntu ku su grupo i pa e superintendente di grupo parti su grupo promé ku hasi orashon pa sali.—Wak e kuadro “Bo Por Ofresé Bo Kas?”
5. Aunke nos no tin e Estudio di Buki di Kongregashon mas, di kiko nos por ta sigur?
5 Aunke nos no tin e Estudio di Buki di Kongregashon mas, Yehova ta sigui perkurá tur loke nos mester pa hasi su boluntat. (Heb. 13:20, 21) Bou di su kuido nos no ta sinti falta di nada. (Sal. 23:1) Nos ta haña hopi bendishon pa medio di nos grupo di sirbishi di vèlt. Pues, laga nos tuma inisiativa, ya ku “esun ku ta sembra na abundansia, lo kosechá tambe na abundansia.”—2 Kor. 9:6.
[Komentario di e plachi na página 6]
Bo Por Ofresé Bo Kas?
Na algun kongregashon, e gruponan di sirbishi di vèlt ta sali huntu den wikènt pasobra no tin sufisiente lugá pa reuní. Reunion di sirbishi di vèlt ta forma parti di e aktividatnan di kongregashon, i p’esei ta un gran privilegio di por tin e reunionnan ei na nos kas. Abo por ofresé bo kas? No keda sin hasié djis pasobra bo kas ta humilde. Loke e ansianonan ta tuma na kuenta ta unda bo kas ta situá i otro faktornan manera nan tabata hasi ántes ora di skohe un lugá pa e estudio di buki. Si bo ke ofresé bo kas, laga bo superintendente di grupo sa esei.