Maneranan Ku e Estudio di Buki di Kongregashon Ta Yuda Nos
1 Kada un di nos sinku reunionnan semanal ta ser kondusí na un manera diferente i tin un propósito diferente. Sin embargo, nan tur ta importante i ta yuda nos “stimulá otro pa stima i hasi bon obra.” (Heb. 10:24, 25) Kiko ta algun benefisio i rasgo úniko di e Estudio di Buki di Kongregashon?
2 Un Yudansa pa Progresá Spiritualmente: E kantidat di hende ku ta asistí na un estudio di buki generalmente ta hopi mas chikitu ku e kantidat ku ta asistí na e otro reunionnan di kongregashon. Dor di esei ta bira mas fásil pa sera amistatnan ku ta un fuente di apoyo spiritual. (Pro. 18:24) Bo a hasi esfuerso pa siña konosé tur persona den bo grupo di estudio di buki, kisas pidiendo kada un di nan pa traha ku bo den sirbishi? Ademas, e areglo di estudio di buki ta duna e superintendente di estudio di buki oportunidat pa siña konosé e sirkunstansia personal di kada persona den e grupo i pa duna nan animashon personal.—Pro. 27:23.
3 Bo a invitá bo studiantenan di Beibel pa asistí na e estudio di buki huntu ku bo? Personanan interesá ku ta vasilá pa asistí na nos reunionnan mas grandi, lo tin ménos miedu pa asistí na un reunion mas chikitu, foral si e ta na un kas privá. Debí na e ambiente amistoso, ta bira mas fásil pa hóbennan i personanan ku resientemente a kuminsá asosiá, duna komentario. I ya ku e grupo ta mas chikitu, nos tin mas chèns di duna komentario i alabá Yehova.—Sal. 111:1.
4 Generalmente ta tene estudionan di buki na sitionan kumbiniente den henter e teritorio. Ounke no ta posibel pa tur hende ser asigná na e estudio di buki situá mas serka di nan kas, probablemente nos tin ku biaha ménos ora nos ta bai nos estudio di buki asigná ku ora nos ta bai e otro reunionnan di kongregashon. E sitio di e estudio di buki por sirbi tambe komo un lugá kumbiniente pa tene reunion pa sirbishi di vèlt.
5 Un Yudansa pa e Ministerio: E superintendente di estudio di buki ta interesá pa yuda tur publikadó pa nan por tin un partisipashon regular, produktivo i gososo den e ministerio. P’esei, e ta hasi esfuerso pa traha ku tur publikadó den su grupo i yuda nan den e vários rasgonan di e ministerio. Si bo tin problema ku un sierto aspekto di e ministerio, manera hasimentu di rebishita, laga e superintendente di estudio di buki sa esei. Kisas e por hasi areglo pa bo traha huntu ku un publikadó eksperensiá den e grupo. Bo abilidat di studia Beibel ku hende lo mehorá si bo presta atenshon na e bon métodonan di duna siñansa ku e superintendente di estudio di buki ta usa ora e ta kondusí e estudio di buki.—1 Kor. 4:17.
6 E Estudio di Buki di Kongregashon ta realmente un bendishon! E areglo amoroso aki di Yehova ta yuda nos mantené nos mes spiritualmente fuerte i stabil durante e tempunan difísil aki ku nos ta biba aden.—Sal. 26:12.
[Study Questions]
1. Kon nos sinku reunionnan semanal ta yuda nos?
2. Kiko ta e benefisionan di reuní den un grupo mas chikitu na e estudio di buki?
3. Den ki sentido e estudio di buki ta animá studiantenan di Beibel pa duna komentario i tambe asistí?
4. Den ki maneranan e estudio di buki por ta kumbiniente?
5. Kon nos superintendente di estudio di buki por yuda nos den e ministerio?
6. Dikon nos tin ku hasi esfuerso pa benefisiá plenamente di e areglo di estudio di buki?