Studio di Buki di Kongregashon—Dikon Nos Tin Mester di Dje
1 Na 1895, gruponan di studio di Studiantenan di Beibel, manera Testigunan di Yehova tabata ser yamá e tempu ei, a bira konosí komo Gruponan di Ourora pa Studio di Beibel. Nan tabata studia e volúmennan di Ourora di Milenio. Despues, e reunionnan aki a haña e nòmber Gruponan di Berea pa Studio di Beibel. (Echo. 17:11) Hopi bes un grupo chikitu tabata reuní den un kas privá riba un anochi ku a kumbiní e grupo. Ta asin’aki Studio di Buki di Kongregashon a kuminsá.
2 Animashon i Yudansa: Intenshonalmente ta tene gruponan di studio di buki na un tamaño chikitu. Dor di esei tin mas oportunidat pa esnan presente ekspresá nan fe públikamente mediante nan komentarionan. Resultado di e areglo aki ta ku tur presente ta ser “enkurashá . . . kada un dor di fe di e otro.”—Rom. 1:12.
3 Dor di opservá e manera ku e superintendente di studio di buki ta siña, esei por yuda nos manehá “e palabra di bèrdat na un manera korekto.” (2 Tim. 2:15) Paga tinu kon e ta enfatisá e tekstonan bíbliko ku ta base di e informashon. Si ta apropiá den kaso di e publikashon ku ta ser studiá, podisé e ta resaltá e puntonan klave mediante un repaso na final usando Beibel so. Su bon ehèmpel por yuda nos mehorá nos manera di siña hende den e sirbishi kristian.—1 Kor. 11:1.
4 Ademas di kondusí e lès semanal, e superintendente di studio di buki ta hiba delantera den e trabou di prediká. En koperashon ku e superintendente di sirbishi, e ta hasi areglonan práktiko pa e sirbishi di vèlt. E ta hasi esfuerso pa yuda tur persona den su grupo kumpli ku nan responsabilidat kristian di prediká e bon nobo i hasi disipel.—Mat. 28:19, 20; 1 Kor. 9:16.
5 E superintendente di studio di buki ta interesá den e bienestar spiritual di kada persona den su grupo. E ta demostrá e interes aki na reunionnan di kongregashon i segun ku e ta traha ku nan den sirbishi di vèlt. Tambe e ta probechá animá e rumannan spiritualmente ora e ta bishitá nan na kas. Tur hende mester sinti nan liber pa aserká e superintendente di studio di buki ki ora ku nan tin mester di yudansa spiritual.—Isa. 32:1, 2.
6 Fortalesé Otro: Den paisnan kaminda e aktividat di e pueblo di Dios ta restringí, hopi bes e rumannan ta reuní den gruponan mas chikitu. Un ruman a konta: “Ounke nos aktividatnan kristian tabata prohibí, ki ora ku tabata posibel nos tabata tene nos reunionnan semanal den gruponan di 10 pa 15 persona. Loke a fortalesé nos spiritualmente na e reunionnan ta e studio di Beibel i tambe e asosiashon despues di e studio. Nos tabata interkambiá eksperensianan, i esaki a yuda nos realisá ku nos kada un tabata hiba e mesun lucha.” (1 Ped. 5:9) P’esei anto, laga nos tambe fortalesé otro dor di apoyá e areglo di Studio di Buki di Kongregashon plenamente.—Efe. 4:16.
[Study Questions]
1. Kon e areglo di Studio di Buki di Kongregashon a kuminsá?
2. Kon nos por kontribuí pa ‘nos tur ser enkurashá’ na studio di buki?
3, 4. Kon e areglo di studio di buki ta yuda nos efektuá nos sirbishi?
5. Ki yudansa personal ta disponibel mediante e areglo di studio di buki?
6. (a) Kon reunionnan den grupo mas chikitu a fortalesé nos rumannan den sierto paisnan? (b) Kon abo a benefisiá personalmente di e areglo di studio di buki?