Yuda Bo Superintendente di Studio di Buki di Kongregashon
1 E Studio di Buki di Kongregashon ta yuda nos tur den hopi manera. Luna pasá nos a papia tokante e manera ku e superintendente di Studio di Buki di Kongregashon mester kumpli ku su responsabilidatnan. Pero kiko nos por hasi pa yud’é, i asina benefisiá nos mes i otronan?
2 Sea Presente Tur Siman: Debí ku e gruponan di studio di buki ta chikitu, bo presensia ta hopi importante. Pone un meta pa ta presente tur siman. Tambe bo ta yuda e superintendente dor di yega na tempu, pasobra asina e por kuminsá e reunion na un manera ordená.—1 Kor. 14:40.
3 Komentario Edifikante: Otro manera ku bo por yuda ta dor di prepará bon i duna komentario edifikante. Generalmente, e mihó komentarionan ta esnan ku ta trata un solo punto, i ademas, asina mas ruman ta ser animá pa duna komentario. Evitá di purba kubri henter e paragraf. Si tin un punto den e paragraf ku a toka bo kurason, aportá na e konsiderashon dor di menshoná esei, i asina kompartí bo pensamentunan ku otronan.—1 Ped. 4:10.
4 Si bo tin e privilegio di lesa e paragrafnan p’e grupo, kumpli ku bo asignashon ku diligensia. Un bon lesamentu ta yuda pa e studio ta un éksito.—1 Tim. 4:13.
5 Predikashon den Grupo: Na hopi kas kaminda studio di buki ta ser tené tin tambe reunion pa sali den sirbishi di vèlt. Dor di apoyá e areglonan aki bo ta yuda e superintendente hiba delantera den e trabou di prediká e bon nobo. Mira e areglonan aki komo oportunidat pa hala mas serka di bo rumannan i animá nan.
6 Rapòrt di Sirbishi di Vèlt: Otro manera ku bo por yuda e superintendente ta dor di entregá bo rapòrt di sirbishi di vèlt asina ku luna kaba. Bo por sea entreg’é bo rapòrt personalmente òf pon’é den e kaha pa rapòrt di sirbishi na Salon di Reino. E sekretario por usa e kaha aki pa rekohé tur e rapòrtnan di sirbishi ku e superintendentenan di studio di buki a risibí.
7 Bo koperashon ku e superintendente di Studio di Buki di Kongregashon lo ser apresiá sigur. Mas ainda, bo por ta sigur ku Yehova lo ‘ta ku e spiritu ku bo ta desplegá.’—Fil. 4:23, NW.