Kon Superintendentenan di Studio di Buki di Kongregashon Ta Mustra Interes Personal
1 E Studio di Buki di Kongregashon ta diseñá pa “duna mas atenshon personal n’e kresementu spiritual di kada persona. . . . Den esaki tin un refleho dje bondat amoroso di Yehova i su kuido tierno pa su pueblo.” (om-PA pág. 75; Isa. 40:11) E superintendente di studio di buki ta hunga un papel importante den dunamentu dje atenshon personal ei.
2 Na Studio di Buki: Dor ku a propósito ta mantené e grupo na un studio di buki chikitu, e superintendente di studio di buki ta haña chèns di siña konosé e miembronan di su grupo bon. (Pro. 27:23) Generalmente e tin oportunidat di asosiá ku nan promé i despues di kada lès tur siman. Durante e periodo di un luna lo e por kòmbersá ku kasi tur persona den su grupo. Esaki ta yuda e miembronan dje studio di buki sinti ku nan por aserk’é ora nan haña nan ku prueba òf ora nan tin mester di animashon.—Isa. 32:2.
3 E superintendente di studio di buki ta purba animá tur hende den e grupo pa partisipá durante e studio. Un manera ku e ta hasi esei ta dor di kondusí e studio den un manera bondadoso i tierno. (1 Tes. 2:7, 8) E ta hasi esfuerso pa enbolbé tur hende den e studio, inkluso e muchanan. Si tin algun hende ku ta tímido pa duna komentario, e por duna nan yudansa na privá dor di hasi areglo di antemano ku nan pa lesa un teksto di Beibel òf pa komentá riba un sierto paragraf. Òf lo e por mustra nan kon pa duna komentario den nan mes palabra.
4 Si e asistente di e superintendente di studio di buki ta un sirbidó ministerial, e superintendente ta hasi areglo kuné p’e kondusí e studio un bes kada dos luna. Esaki ta duna e superintendente e oportunidat p’e opservá e asistente i dun’é sugerensianan útil. Esta un ekselente areglo pa yuda ruman hòmbernan mehorá nan arte di siña!—Tito 1:9.
5 Den Sirbishi di Vèlt: Un responsabilidat prinsipal di e superintendente di studio di buki ta di hiba delantera den e trabou di evangelisá. (Num. 27:16, 17) E ta hasi areglonan práktiko pa e grupo por duna testimonio i e ta hasi esfuerso pa tur hende den e grupo haña goso den nan sirbishi. (Efe. 4:11, 12) Pa logra esaki, e ta pone e meta pa traha ku tur miembro di su grupo. Tambe e ta traha en koperashon ku e superintendente di sirbishi pa hasi areglo pa publikadónan ku kier mehorá sierto aspekto di nan sirbishi, haña yudansa serka un publikadó ku mas eksperensia.
6 Un Wardadó Amoroso: Superintendentenan di studio di buki ta interesá den e publikadónan kende nan sirkunstansianan no ta permití nan hasi mashá den e trabou di prediká. E ta hasi sigur ku e publikadónan ku tin limitashon debí na edat avansá òf ku ta na kama i esnan ku ta limitá temporalmente debí na malesa òf leshon serio, ta konsiente di e areglo ku ta permití nan yena for di 15 minüt di sirbishi riba nan rapòrt si nan no por a traha henter un ora den un luna. (E Komité di Sirbishi di Kongregashon ta determiná ken ta kai bou di e areglo aki.) Tambe e ta mustra interes den e personanan ku kisas ta inaktivo ku ta asigná na su studio di buki. E ta hasi esfuerso pa yuda nan bolbe partisipá den e aktividatnan di kongregashon.—Luk. 15:4-7.
7 Nos ta apresiá masha e interes amoroso ku superintendentenan di studio di buki ta mustra! E atenshon personal ku nan ta duna ta yuda “tur yega na e unidat di fe . . . , na e midí di e estatura di e plenitut di Kristu.”—Efe. 4:13.