Caha Di Pregunta

◼ Ki ora lo ta apropiado pa forma un grupo adicional di Studio di Buki di Congregacion?

Mester considerá pa forma un grupo nobo ora esei ta necesario pa asina mantené un asistencia di rond di 15 persona of ménos na cada sitio di studio di buki, incluso na Salon di Reino. Di con ta recomendá esaki?

Ora mantené gruponan di Studio di Buki di Congregacion chikitu, e conductor por duna mihó atencion na cada persona cu ta asistí. Ademas, tur presente lo tin amplio oportunidad pa comentá den un ambiente cu ta yuda nan haci declaracion público di nan fe. (Heb. 10:23; 13:15) Teniendo gruponan chikitu na vários sitio den e teritorio dje congregacion ta pone cu ta mas fácil pa asistí na e Studio di Buki di Congregacion i na reunionnan pa sirbishi di veld. Congregacionnan cu a aumentá e cantidad di sitio a ripará cu e asistencia total di studio di buki tambe a aumentá.

Por tin circunstancianan special den cua ta consehabel pa forma un otro grupo, maske e grupo ei lo ta basta chikitu. Esaki por ta e caso den un área aislá of ora cu e sitionan actual tin muchu hende of no tin lugá adecuá pa sinta. Ora ta necesario, por forma un grupo cu ta reuní den dia na beneficio di esnan di mas edad, esnan cu ta traha anochi of rumannan muher cu nan casá no ta Testigo.

Cada studio di buki mester tin vários publicadó activo i spiritualmente fuerte i tambe un conductor i lesadó cualificá. Ruman hombernan mester haci esfuerso pa yena e necesidadnan aki den e congregacion.

Ancianonan por promové e adelanto dje congregacion dor di haci sigur cu e congregacion su gruponan di studio di buki ta di tamaño razonabel, ta ser atendé bon den sentido spiritual i cu nan ta reuní na sitionan cumbiniente. Ki ora cu ta práctico, mester forma gruponan nobo di manera cu tur ruman por probechá plenamente dje beneficionan dje areglo spiritual único aki. Abo lo por ofrecé bo cas como un sitio pa studio di buki? Hopi cu a haci esei a experenciá bendicionnan spiritual.