Duna Testimonio den Grupo Ta Trese Goso
1 Ora Hesus a manda su 70 disipelnan bai prediká, el a siña nan kiko pa bisa, el a parti nan dos-dos, i a bisa nan den kua teritorio nan mester a prediká. E areglonan aki a kontribuí na nan goso. (Luk. 10:1-17) Di mesun manera awe, e trabou di duna testimonio den grupo ta yuda ekipá, organisá i animá e pueblo di Dios pa e trabou di prediká.
2 Ansianonan Ta Hiba Delantera: Ansianonan ta hunga un papel vital den yuda tur publikadó partisipá regularmente den e trabou di prediká. E superintendente di sirbishi ta esun enkargá pa hasi areglo pa sali den sirbishi durante siman. Kada superintendente di studio di buki ta responsabel pa organisá aktividat di prediká pa su grupo, spesialmente den wikènt. Na okashonnan ku henter e kongregashon ta reuní huntu pa sirbishi di vèlt, manera por ehèmpel despues di e Studio di Toren di Vigilansia, kada konduktor di studio di buki mester perkurá p’e nesesidatnan di su propio grupo.
3 “Korektamente i na un Manera Ordená”: E ruman asigná pa kondusí e reunion di sirbishi di vèlt mester kuminsá na tempu i e reunion mester dura 10 pa 15 minüt. E mester parti e rumannan i duna nan teritorio pa traha (a ménos ku e superintendentenan di studio di buki mes lo perkurá pa nan grupo, manera nos a menshoná ariba) promé ku e konkluí ku orashon. Esaki ta evitá ku e publikadónan tin ku aglomerá den e teritorio, ya ku esaki lo por rebahá e dignidat di nos trabou. E areglo aki ta na armonia tambe ku e konseho di Pablo: “Laga tur kos sosodé korektamente i na un manera ordená.” (1 Kor. 14:40) Tur publikadó ku ta asistí na e reunionnan aki mester pone di nan parti pa e areglonan aki por ta un éksito dor di yega na tempu, koperá plenamente ku esun ku ta hiba delantera, i sali bai teritorio asina ku e reunion terminá.
4 Uni ku Otro: Areglonan pa duna testimonio den grupo ta duna nos un ekselente oportunidat pa siña konosé otro publikadónan den e kongregashon. Ounke no tin ningun opheshon kontra di hasi areglo di antemano pa traha ku un persona den sirbishi, nos lo por haña eksperensianan dushi tambe si nos bai reunion di sirbishi di vèlt sin hasi areglo di antemano. Podisé e ruman por asigná nos pa traha ku un persona ku nos no konosé masha bon, i esaki ta duna nos e oportunidat pa ‘habri nos kurason mas hanchu’ den amor.—2 Kor. 6:11-13.
5 Duna testimonio den grupo ta animá nos i ta laga nos uni ku otro komo “kolaboradónan pa e bèrdat.” (3 Juan 8) Laga nos tur partisipá plenamente den dje!