No Laga Bo Programa Okupá Stroba Bo
1. Dikon algun publikadó ta mek pa ofresé estudio di Beibel?
1 Algun publikadó ku ta hopi okupá ta mek pa ofresé un estudio di Beibel. Pa bo kondusí un estudio di Beibel bo mester tin tempu. Bo tin ku prepará, bai studia ku e persona i yud’é vense su problemanan personal. Apòstel Pablo a bisa ku el a kompartí su alma pa yuda e hendenan na Tesalónika siña konosé Yehova. (1 Tes. 2:7, 8) Pero kon nos por kondusí un estudio asta si nos tin un programa hopi okupá?
2. Kon nos amor pa Yehova lo motivá nos pa usa nos tempu?
2 Saka Tempu pa Sirbi Yehova: Ta bèrdat ku nos tin ku saka tempu pa sirbi Yehova. Tur siman nos ta asistí na nos reunionnan, sali den sirbishi, lesa Beibel i hasi orashon. Un persona kasá, maske e ta hopi okupá, gustosamente ta saka tempu pa dediká na su esposo òf esposa. Nos ku ta stima Yehova mester ta asta mas kontentu ainda pa usa nos tempu pa ador’é. (Efe. 5:15-17; 1 Huan 5:3) De echo, Hesus a bisa ku un parti importante di nos adorashon ta e trabou di hasi disipel. (Mat. 28:19, 20) Ora nos meditá riba e punto ei, nos lo sinti nos mas motivá pa kumpli ku e responsabilidat di kondusí un estudio di Beibel.
3. Si algun sirkunstansia ta stroba nos programa, kiko nos por hasi pa sigui ku un estudio di Beibel?
3 Pero kiko nos por hasi si trabou, malesa króniko òf asignashon teokrátiko ta stroba nos di bai un estudio? Den e kasonan ei algun publikadó sa kondusí nan estudio di Beibel via telefòn òf kòmpiuter. Esnan ku tin un malesa króniko ta pidi e studiante pa bin studia na nan kas. Algun ta palabrá ku publikadó konfiabel pa perkurá pa e studiante ora ku nan mes no por bai studia kuné.
4. Ki bendishon nos ta risibí si nos ta kondusí estudio di Beibel?
4 Pablo a sinti hopi goso ora el a duna di su tempu i energia pa siña otronan e bèrdat. (Echo. 20:35) Ora el a mira fruta di su trabou na Tesalónika, el a gradisí Yehova pa esei. (1 Tes. 1:2) Nos tambe por haña hopi goso i satisfakshon den sirbishi si nos no laga nos bida drùk stroba nos di kondusí estudio di Beibel.