No Laga di Hasié!
1 Nos no ta “laga di hasi bon” na hende den nos teritorio, ta p’esei nos ta partisipá aktivamente den e proklamashon di e bon nobo di e Reino di Dios. (Pro. 3:27) E mihó mensahe pa kompartí ku hende ta esun tokante e mihó tempu ku lo eksistí den futuro bou di e gobernashon di Dios. Kisas bo ta plama e speransa di Reino ampliamente dor di duna testimonio informal òf laga literatura. Pero si bo no ta kondusiendo un estudio di Beibel ainda, dikon bo no ta pone esei komo un meta?
2 Tin biaha un di e opstákulonan di mas grandi pa kondusí un estudio di Beibel ta e manera ku nos ta sinti tokante e asuntu. Tin algun publikadó ta vasilá pa kondusí un estudio di Beibel pasobra nan ta pensa ku nan no ta kapas òf pasobra nan tin un programa hopi drùk. Podisé e siguiente sugerensianan lo ta útil pa bo ya ku nan lo yuda bo pa no keda sin partisipá den e trabou di kondusí estudio di Beibel.—Mat. 28:19; Echo. 20:20.
3 Falta di Konfiansa: Kisas pasobra bo no tin masha skol òf debí na algun otro motibu bo no tin konfiansa den bo abilidat di kondusí estudio di Beibel. Pero ministernan kristian ku tabatin éksito den e promé siglo ‘no tabata hòmbernan eduká ni siñá.’ Kon bin nan tabata kapas pa siña e bèrdat na otro hende? Pasobra ‘nan tabata hende ku tabata kana ku Hesus.’ (Echo. 4:13) Nan a siña for di e Gran Maestro, Hesus, kende su siñansa- i métodonan a keda konserbá pa nos den e Skritura. Pues, ounke bo no tin masha edukashon eskolar, aktualmente bo ta risibiendo edukashon spiritual ku ta sin igual.—Isa. 50:4; 2 Kor. 3:5.
4 Tabatin biaha ku Yehova a usa profetanan pa reprendé gobernante- òf otro personanan den posishon haltu ku a kometé fayo. Algun di e profetanan aki, manera Amos, a bini di un background humilde. Amos a atmití: “Mi no tabata profeta, tampoko mi tabata yu di profeta; sino mi tabata kuidadó di bestia i skèrfdó di figu di palu di sikamor.” (Amos 7:14, NW) Apesar di esei, Amos no a vasilá pa deklará Yehova su mensahe di huisio na saserdote Amasias, kende tabata un adoradó di bisé. (Amos 7:16, 17) Semper nos tin ku kòrda ku ta e trabou di Dios nos ta hasiendo i e lo ekipá nos pa kumpli ku e trabou ku el a duna nos.—2 Tim. 3:17.
5 Un Programa Drùk: Apesar di bo programa drùk, probablemente bo a apartá tempu kaba pa partisipá regularmente den e ministerio. E trabou di kondusí un estudio di Beibel por ta un di e aspektonan di mas dushi di e ministerio. Ta un privilegio pa mira kon e Palabra di Yehova ta obra den bida di un persona. (Heb. 4:12) Yehova ta keda kontentu ora nos ta hasi sakrifisio personal pa yuda un persona “yega na konosementu di e bèrdat.” (1 Tim. 2:4) Asta e angelnan ta sinti goso ora un persona ta repentí di su estilo di bida anterior i ta progresá spiritualmente.—Luk. 15:10.
6 Dios su boluntat ta “pa tur [“klase di,” NW] hende wòrdu salbá i yega na konosementu di e bèrdat.” (1 Tim. 2:4) Nos ta privilegiá di por traha na armonia ku Dios su boluntat dor di no laga di kondusí estudionan di Beibel!
[Study Questions]
1. Den ki sentido nos no ta “laga di hasi bon”?
2. Kiko lo por pone ku nos ta vasilá pa kuminsá un estudio di Beibel?
3. Dikon nos ta kualifiká pa siña hende loke Beibel ta bisa?
4. Kiko nos por siña for di e ehèmpel di Amos?
5. Dikon nos tin ku hasi esfuerso pa kuminsá un estudio di Beibel ounke nos programa ta drùk?
6. Ki privilegio nos tin ora nos ta kumpli ku Dios su boluntat?