Usa e Website jw.org den Sirbishi

Nos website ta un hèrmènt balioso pa yuda nos plama e bon notisia “te na e parti mas leu di tera.” (Echo. 1:8) Pero mayoria di hende no sa mes di jw.org òf no sa kon pa hañ’é. Hopi biaha nan ta haña sa di nos website ora un publikadó mustra nan e.

Un superintendente di sirkuito a download e vidio Dikon Analisá Loke Beibel Ta Bisa? riba su selular i kada biaha ku e haña un chèns e ta mustra un hende. Por ehèmpel, ora di prediká di kas pa kas, e ta bisa: “Mi a pasa serka bo un ratu djis pa mustra bo unda bo por haña kontesta pa tres pregunta importante di bida: Dikon den mundu tin asina tantu problema? Kon Dios lo kaba ku nan? I kon nos por trata ku nan tanten? E vidio kòrtiku akí ta kontestá e preguntanan ei.” Anto, e ta primi e boton di play i wak kon e persona ta reakshoná. E vidio ta asina interesante ku mayoria di hende no ta kita nan bista for di e pantaya sino te ora e kaba. Despues e superintendente di sirkuito ta bisa: “Bo a kaba di skucha ku bo por pidi un kurso di Beibel online. Ya ku mi t’aki, mi por mustra bo kon e kurso ta.” Si e persona aseptá, e ta usa e foyeto Bon Notisia pa mustr’é kon e kurso pa yuda hende studia Beibel ta bai. Si e persona no tin tempu, e ta traha un afsprak pa mustr’é na e siguiente bishita. Ora e tuma un pousa pa bai bebe algu na un lugá, e ta kuminsá un kòmbersashon amigabel ku e hende sintá banda di dje i e ta bisa algu paresido. Abo ta usa jw.org den sirbishi?