Kon Nos Por Haña Sa Kiko Ta Dios Su Promesanan?

For di tempu ku nos Kreador a krea hende, el a komuniká ku nan mediante angel i profeta. Ademas, el a pone su mensahe i su promesanan por eskrito. Dios ta primintí ku nos lo ta felis den futuro, pero kisas bo ta puntra bo mes: Na unda nos por haña e promesanan ei den nos tempu?

Nos por haña Dios su mensahe den e Santu Skritura. (2 Timoteo 3:16) Kon Dios a usa profeta pa skirbi su mensahe? Wèl, Dios a pone su pensamentunan den mente di e hòmbernan ei i nan a pone esakinan por eskrito. (2 Pedro 1:21) Ta meskos ku awe. Si un komersiante usa un sekretario pa skirbi un mensahe p’e, e komersiante ta keda e outor di e mensahe. Di igual manera, aunke ku Dios a usa vários hende hòmber pa skirbi su mensahe, e ta keda e berdadero Outor di e Santu Skritura.

E PALABRA DI DIOS TA DISPONIBEL PA UN I TUR

Dios su mensahe ta asina importante ku e ke pa tur hende les’é i komprond’é. E “bon notisia eterno” ei ta na alkanse di hende di “tur nashon, tribu [i] idioma.” (Revelashon 14:6) Danki na Dios, e Santu Skritura ta disponibel, sea kompleto òf un parti di dje, na mas ku 3.000 idioma. Esei ta hopi mas ku kualke otro buki na mundu.