Pidi Dios pa Bendishoná Bo

Dios a duna nos un regalo úniko—e abilidat di komuniká kuné i ekspresá nos sintimentunan den orashon. Rei David a pidi Dios den orashon: “Abo ku ta skucha orashon, serka bo tur hende ta bini.” (Salmo 65:2) Pero kon nos por hasi orashon di manera ku Dios ta skucha nos i bendishoná nos?

HASI ORASHON DI KURASON

Salmo 62:8 ta bisa: “Drama [bo] kurason” dilanti Dios. Ora nos ta hasi orashon na Dios, nos por ekspresá nos sintimentunan di mas profundo. E Todopoderoso ta balorá orashon ku nos ta hasi di kurason.

USA DIOS SU NÒMBER PERSONAL

Dios tin hopi título, manera Alah, Kreador i Señor, pero e tin solamente un nòmber personal. “Ami ta Yehova. Esei ta mi nòmber.” (Isaías 42:8, NW) E nòmber di Yehova ta aparesé mas o ménos 7.000 biaha den e Santu Skritura. Hopi profeta a usa Dios su nòmber personal. Abraham a bisa: “Yehova, por fabor, . . . laga mi sigui papia [ku bo].” (Génesis 18:30, NW) Nos tambe mester usa Dios su nòmber, Yehova, ora nos ta hasi orashon.a

HASI ORASHON DEN BO IDIOMA

Dios ta komprondé nos pensamentu- i sintimentunan sin importá ki idioma nos ta papia. Su Palabra ta sigurá nos: “Dios no ta hasi distinshon di persona, sino ku e ta aseptá tur hende di tur nashon ku ta tem’é i ku ta hasi loke ta korekto.”—Echonan 10:34, 35.

Pero pa nos haña Dios su bendishon, no ta orashon so nos mester hasi. Den e siguiente artíkulonan, nos lo analisá kiko mas nos mester hasi.