KON NOS POR YUDA VENSE ODIO?

4 | Vense Odio Ku Yudansa Di Dios

Loke Beibel Ta Bisa:

“Fruta di spiritu ta amor, goso, pas, pasenshi, amabilidat, bondat, fe, suavedat, dominio propio.”—GALATIONAN 5:22, 23.

Kiko Esei Ta Nifiká?

Nos por vense odio ku Dios su yudansa. Spiritu santu por yuda nos kultivá kualidat ku kisas nunka nos lo por a kultivá riba nos mes. Pues, en bes di purba di vense odio riba nos mes, lo ta bon pa nos dependé riba e yudansa ku Dios ta duna nos. Si nos dependé riba Dios su yudansa, nos lo sinti meskos ku Apòstel Pablo, kende a bisa: “Pa tur kos mi tin forsa pa medio di esun ku ta duna mi poder.” (Filipensenan 4:13) E ora ei, nos tambe lo por bisa: “Mi yudansa ta bini for di [Yehova].”—Salmo 121:2.

Loke Bo Por Hasi:

“Yehova a transformá mi di un persona violento pa un persona pasífiko.”—WALDO

Hasi orashon na Yehova i rog’é pa su spiritu santu. (Lukas 11:13) Pidié pa yuda bo kultivá bon kualidat. Studia Beibel i enfoká riba e kualidatnan ku por yuda bo vense odio, manera amor, pas, pasenshi i dominio propio. Buska manera pa demostrá e kualidatnan ei den bo bida. I sera amistat ku hende ku tambe ta purba di kultivá e tipo di kualidatnan ei. E tipo di amigunan ei por “stimulá [bo] pa mustra amor i hasi bon obra.” —Hebreonan 10:24.

Eksperensia

WALDO—A Vense Odio i Violensia

Komo ku Waldo tabatin un bida masha difísil, el a bira un persona ku tabatin hopi odio. El a bisa: “Hopi biaha mi tabata haña mi . . . den pelea di kaya ku bendedónan di droga . . . Un biaha, un gang rival a kontratá un asesino notorio pa mata mi, pero mi a skapa ku solamente un hinká.”

Waldo no tabata kontentu ora ku su kasá a kuminsá studia Beibel ku Testigunan di Yehova. El a bisa: “Mi tabatin masha rabia riba e Testigunan, i hopi biaha mi tabata papia palabra malu ku nan. Pero, pa mi sorpresa, semper nan tabata respondé mi na un manera pasífiko.”

Despues di algun tempu, Waldo tambe a kuminsá studia Beibel. El a bisa: “No tabata fásil pa mi apliká loke mi tabata siña. Mi tabata konvensí ku nunka lo mi por a kontrolá mi karakter violento.” Pero algu ku el a siña for di Beibel a yud’é masha hopi mes.

Un dia, Alejandro, kende tabata studia Beibel ku Waldo, a pidié pa lesa Galationan 5:22 i 23. Waldo a bisa: “Alejandro a splika mi ku e úniko manera ku lo mi por a desaroyá e kualidatnan ei ta ku yudansa di e spiritu santu di Dios, i no riba mi mes forsa. E bèrdat ei a kambia mi punto di bista por kompleto.”

Komo ku Waldo a laga Dios yud’é, el a logra vense odio. El a bisa: “Mi famia i mi amigunan di ántes no por kaba di kere kuantu mi a kambia.” Waldo a sigui bisa: “Yehova a transformá mi di un persona violento pa un persona pasífiko.”