Loke Beibel Ta Siña Nos Tokante Su Outor

1. Dikon bo ta gradisidu ku bo tin Beibel?

ESTA gradisidu nos ta na Yehova ku el a regalá nos Beibel! Den dje, Yehova ta duna nos konseho ku ta yuda nos dil ku problemanan di tur dia. Tambe e ta duna nos un bunita speransa pa futuro. Mas importante ainda, mediante Beibel Yehova ta revelá su personalidat. Segun ku nos ta pensa riba su bunita kualidatnan, nos ta stim’é mas i nos ta haña mas gana di bira su amigu.—Sal. 25:14.

2. Ki maneranan Yehova a usa pa laga hende konos’é?

² Semper Yehova tabata ke pa hende konos’é. Den pasado el a usa soño, vishon i asta angel pa duna mas informashon tokante su mes. (Num. 12:6; Echo. 10:3, 4) Nos lo no por a analisá e soño-, vishon- ni mensahenan ei si nan no a ser skirbí. Ta p’esei Yehova a laga algun hende skirbi tur loke ku e tabata ke pa nos sa “den un buki.” (Yer. 30:2) Komo ku “e Dios berdadero semper ta aktua na un manera perfekto,” nos tin sigur ku e método ku el a usa pa komuniká ku nos ta ekselente i lo yuda nos.​—Sal. 18:30.

3. Kon Yehova a sòru pa e mensahe di Beibel keda preservá? (Isaías 40:8)

³ Lesa Isaías 40:8. Pa míles di aña, Dios su sirbidónan ta hañando bon guia for di su Palabra. Pero, kon esei ta posibel? Esei ta un bon pregunta, ya ku Dios su Palabra a ser skirbí hopi tempu pasá riba material ku ta garna. I te asina leu ku nos sa, niun di e dokumentonan original ei no ta eksistí mas. Ma, Yehova a hasi sigur ku hende a traha kopia di su Palabra. Aunke e kopiadónan tabata imperfekto, nan a hasi nan bèst pa no hasi fout. Un eksperto di Beibel a bisa tokante e Skritura Hebreo: “Nos tin sigur ku niun otro buki di antigwedat no a ser kopiá asina presis.” Pues, apesar ku Beibel a ser skirbí hopi tempu pasá riba material ku ta garna i e kopiadónan tabata imperfekto, nos por tin sigur ku loke nos ta lesa den Beibel awe ta presis e ideanan ku Yehova tabata kier a transmití.

4. Kiko nos ta bai trata den e artíkulo akí?

⁴ “Tur regalo perfekto ta bini” di Yehova. (Sant. 1:17) I Beibel ta un di e mihó regalonan ku Yehova a duna nos. Un regalo ta bisa nos algu di e persona ku a duna nos e regalo—ku e konosé nos bon i ku e sa presis kiko nos tin mester. Meskos ta konta pa Beibel. Ora nos analisá e regalo ei, e ta bisa nos hopi tokante Yehova—ku e konosé nos bon i e sa presis loke nos tin mester. Den e artíkulo akí, nos ta bai trata kon Beibel ta proba ku (1) Dios ta sabí, (2) ku e ta hustu i (3) ku e ta stima nos. Pa kuminsá, laga nos wak kon Beibel ta proba ku Dios ta sabí.

BEIBEL TA PROBA KU DIOS TA SABÍ

5. Kua ta un manera ku Beibel ta proba ku Dios ta sabí?

⁵ Yehova sa ku nos mester di su konseho. P’esei el a regalá nos Beibel, ku ta yen di su sabiduria. E konsehonan den Beibel ta yuda hende. Sí, e ta kambia bida di hende. Ora ku Moises a skirbi e promé bukinan di Beibel, el a bisa e israelitanan: “Esaki no ta . . . palabra bashí pa boso; di bèrdat, esaki ta boso bida.” (Deu. 32:47) Esnan ku a obedesé loke e Skrituranan a bisa lo tabatin un bida felis i eksitoso. (Sal. 1:2, 3) Aunke ku ta hopi tempu pasá a skirbi Beibel, te ainda e tin poder pa kambia bida di hende. Por ehèmpel, den e seri di artíkulo “Beibel Ta Kambia Bida di Hende” riba jw.org lo bo haña mas o ménos 50 eksperensia di hende ku a logra hasi kambionan grandi den nan bida debí ku nan a obedesé Beibel su konseho.​—1 Tes. 2:13.

6. Dikon nos por bisa ku no tin niun buki manera Beibel?

⁶ No tin niun buki manera Beibel. Dikon nos por bisa esei? Pasobra su Outor ta Yehova Dios. E ta Todopoderoso, semper el a eksistí i e ta e persona di mas sabí. Tin hopi buki ku hende ta sigui lesa aunke ku nan outor ya a muri. Ma e konsehonan ku tin den nan no ta útil mas. Pero di otro banda, e prinsipionan ku tin den Beibel sí semper ta útil i nan a yuda hende di tur époka. Segun ku nos ta lesa e buki importante ei i meditá riba loke nos ta siña, Yehova, kende ta su Outor, lo usa su spiritu santu pa yuda nos mira kon nos por apliká e konsehonan ei den nos bida. (Sal. 119:27; Mal. 3:16; Heb. 4:12) Sí, Beibel su outor ta bibu i e ta kla pa yuda bo. Esei no ta duna bo gana pa lesa Beibel regularmente?

7. Kon Beibel a uni Dios su pueblo den pasado?

⁷ Tin algu mas den Beibel ku ta proba ku Dios ta sabí. Esei ta e echo ku Beibel ta yuda Yehova su sirbidónan keda uní. Tempu e israelitanan a drenta e Tera Primintí, nan a bai biba den diferente área. Tin di nan a bira piskadó, otronan a bira kriadó di baka i toro i otronan a bira kunukero. E israelitanan ku tabata biba den un área fásilmente por a lubidá riba e israelitanan ku tabata biba den e otro áreanan. Pero Yehova a ordená nan pa bini huntu na diferente okashon pa skucha lesamentu i splikashon di su Palabra. (Deu. 31:10-13; Neh. 8:2, 8, 18) Imaginá bo kon un israelita ku kier a obedesé Yehova lo a sintié despues di a hasi un biahe largu pa yega Herúsalèm. Einan lo el a topa ku miónes di otro israelita di diferente área di e pais ku tambe kier a sirbi Yehova. Di e manera ei, Yehova a yuda su pueblo keda uní. Mas despues, den tempu di e kristiannan, e kongregashon tabata konsistí di hende di diferente idioma, diferente nivel sosial i ekonómiko. Pero komo ku nan tabata stima Dios su Palabra, nan a sirbi Yehova uní. E úniko manera ku e kreyentenan nobo por a komprondé Dios su Palabra, tabata dor di reuní huntu i risibí yudansa di e otro kristiannan den kongregashon.​—Echo. 2:42; 8:30, 31.

8. Kon Beibel ta uni Dios su pueblo awe?

⁸ Awendia, Yehova ta sigui usa Beibel pa siña i uni su pueblo. Beibel ta kontené tur bèrdat ku nos mester sa tokante Yehova. P’esei, regularmente nos ta reuní huntu na nos reunionnan di kongregashon, asamblea- i kongresonan pa papia tokante Beibel i pa skucha lesamentu i splikashon di Beibel. Pues, Beibel ta un instrumènt hopi importante ku Yehova ta usa pa yuda su adoradónan “sirbié den ún akuerdo,” sí, skouder ku skouder.​—Sof. 3:9.

9. Ki kualidat nos mester tin pa por komprondé Beibel? (Lukas 10:21)

⁹ Tin algu mas ku ta proba ku Yehova ta sabí. El a laga skirbi vários parti di e Skritura na un manera ku ta solamente hende humilde por komprondé loke nan ta lesa. (Lesa Lukas 10:21.) Hende rònt mundu ta lesa Beibel. Un eksperto di Beibel a bisa: “Kompará ku otro buki, Beibel no solamente ta e buki mas lesá sino tambe esun ku hende ta lesa ku mas atenshon.” Pero ta solamente hende humilde ta ègt komprondé i ta purba di apliká loke nan ta lesa.​—2 Kor. 3:15, 16.

10. Den ki otro manera mas Beibel ta proba ku Yehova ta sabí?

¹⁰ Tin un otro manera mas ku Beibel ta proba ku Yehova ta sabí. Yehova no ta usa Beibel solamente pa siña nos komo grupo pero tambe e ta us’é pa siña i konsolá kada un di nos. Ora nos lesa Yehova su Palabra, nos por sinti kon interesá e ta den kada un di nos. (Isa. 30:21) Bo a yega di lesa Beibel i topa un versíkulo ku ta “ègt pa bo”? Pero, Beibel a ser skirbí pa miónes di hende por komprondé. Kon e informashon ku tin den dje por ta al dia i na mes momento presis loke abo tin mester? Esei ta pasobra e Outor di Beibel ta e Persona di mas sabí den henter e universo.​—2 Tim. 3:16, 17.

BEIBEL TA PROBA KU DIOS TA HUSTU

11. Kon nos ta mira ku Yehova ta hustu den e manera ku el a laga skirbi Beibel?

¹¹ Yehova ta un Dios hustu. (Deu. 32:4) E kualidat di hustisia ta pone ku e no ta hasi distinshon di persona. (Echo. 10:34, 35; Rom. 2:11) I esei ta bisto na e idiomanan ku el a usa pa laga skirbi Beibel. Gran parti di e promé 39 bukinan di Beibel a ser skirbí na hebreo, ku tabata e idioma ku mayoria di Dios su pueblo tabata papia e tempu ei. Sinembargo, ya pa e promé siglo, mayoria di hende tabata papia griego. Dor di esei, e último 27 bukinan di Beibel a ser skirbí prinsipalmente na e idioma ei. Yehova no a limitá su Palabra na un idioma so. Awe, rònt mundu tin kasi 8 mil mion hende i nan ta papia diferente idioma. Kon nan tur por siña tokante Yehova?

12. Kua ta un manera ku Daniel 12:4 a kumpli den e último dianan akí?

¹² Mediante Profeta Daniel, Yehova a primintí ku den tempu di fin, e berdadero konosementu ku tin den Beibel “lo oumentá.” Hopi hende lo komprondé loke tin den Beibel. (Lesa Daniel 12:4.) Un manera ku e profesia akí a kumpli ta na momento ku Beibel i literatura basá riba dje, a ser tradusí, publiká i distribuí rònt mundu. Beibel a bira e buki di mas tradusí i e buki ku hopi hende tin. Esnan ku ta produsí tradukshonnan di Beibel ta bende nan hopi karu. Di otro banda, Testigunan di Yehova ta tradusí Dios su Palabra, sea en parti òf kompleto, na mas ku 240 idioma. I tur hende por haña un sin paga. Debí na esei, hende di tur nashon por siña tokante ‘e bon notisia di e Reino’ promé ku e fin yega. (Mat. 24:14) Nos Dios ta un Dios hustu i e ke pa mas tantu hende posibel haña chèns pa konos’é i lesa su Palabra. Dikon e ta hasi esei? Esei ta pasobra e ta stima nos masha hopi mes.

BEIBEL TA PROBA KU DIOS TA STIMA NOS

13. Dikon nos por bisa ku Beibel ta proba ku Dios ta stima nos? (Huan 21:25)

¹³ Beibel ta yuda nos komprondé ku e kualidat prinsipal di Yehova ta amor. (1 Huan 4:8) Pensa riba loke Yehova a laga skirbi den Beibel i loke el a laga afó. El a duna nos presis loke nos tin mester pa nos por tin un amistat kuné, pa nos ta felis aworakí i pa nos por haña bida eterno. Anto debí ku Yehova ta stima nos, e no a duna nos bòshi di detaye ku nos no tin mester.​—Lesa Huan 21:25.

14. Kon ta un manera mas ku Beibel ta proba ku Dios ta stima nos?

¹⁴ Un manera ku Yehova ta mustra nos kuantu e ta stima nos ta na e manera ku e ta komuniká ku nos. Sí, e ta laga nos sinti nos bon. Den Beibel e no ta duna nos un lista sin fin di regla, bisando nos presis kiko nos mag i no mag di hasi. Na lugá di esei, e ta usa historianan di bida, profesianan i konsehonan práktiko pa yuda nos tuma bon desishon. Asina ei, Dios su Palabra ta motivá nos pa stima i obedesé Yehova.

15. (a) Kon Beibel ta proba ku Yehova ta interesá den hende ku ta lesa su Palabra? (b) Den e plachi, kua personahe di Beibel e mucha muhé chikitu, e ruman hòmber hóben i e ruman muhé di edat ta meditá riba dje? (Gén. 39:1, 10-12; 2 Rei. 5:1-3; Luk. 2:25-38)

¹⁵ Beibel ta proba ku Yehova ta interesá den nos. Kon nos sa esei? Su Palabra ta yen di relato ku ta deskribí emoshon- i sintimentunan ku hende tin. Nos por identifiká ku e personahenan di Beibel pasobra nan tabatin “e mesun sintimentunan ku nos.” (Sant. 5:17) Mas importante ainda, ora nos mira e manera ku Yehova a trata hende ku ta meskos ku nos, nos por komprondé mihó e ora ei “ku Yehova tin masha kariño, kompashon i miserikòrdia.”​—Sant. 5:11.

16. Kiko nos ta siña tokante Yehova ora nos lesa den Beibel over di hende ku a kometé eror? (Isaías 55:7)

¹⁶ Tin un otro manera mas ku Beibel ta proba ku Yehova ta stima nos. Beibel ta sigurá nos ku Dios no ta bira lomba pa nos ora nos kometé eror. E israelitanan a peka kontra Yehova bes tras bes. Pero asina mes, ora nan a arepentí di kurason, Dios a pordoná nan. (Lesa Isaías 55:7.) E kristiannan di promé siglo tambe tabata sa ku Yehova ta stima nan masha hopi mes. Yehova a inspirá Apòstel Pablo pa animá e kristiannan na Korinto pa ‘pordoná i konsolá’ un hòmber ku pa un tempu a kometé piká serio pero ku a arepentí di kurason. (2 Kor. 2:6, 7; 1 Kor. 5:1-5) Ta bunita pa mira ku Yehova no a benta su adoradónan afó djis pasobra nan a kometé un eror. Na lugá di esei, ku amor el a yuda nan, korigí nan i invitá nan pa bira su amigu atrobe. Anto awendia e ta primintí di hasi meskos pa tur pekadó ku arepentí di kurason.​—Sant. 4:8-10.

BALORÁ BEIBEL—E “REGALO” KU DIOS A DUNA NOS

17. Dikon Beibel ta un regalo maravioso?

¹⁷ Yehova a duna nos un regalo masha bunita. Dikon su Palabra ta asina maravioso? Manera nos a siña den e artíkulo akí, Beibel ta siña nos ku Dios ta sabí, ku e ta hustu i ku e ta stima nos. I e ta proba ku Yehova ke pa nos konos’é i bira su amigu.

18. Kon nos por demostrá ku nos ta kontentu ku e regalo ku Yehova a duna nos?

¹⁸ Nos no ke lubidá ku Dios su Palabra ta un “regalo perfekto.” (Sant. 1:17) P’esei, laga nos sigui demostrá kon kontentu nos ta ku e regalo ei dor di les’é i meditá riba dje. Segun ku nos ta hasi esei, nos por tin sigur ku su Outor lo bendishoná nos esfuerso i ku nos lo “siña konosé Dios.”​—Pro. 2:5.