Nos A Disidí di Biba Mas Simpel

Madián ku Marcela tabatin un bida kómodo na Medellín, Colombia. Madián tabatin un trabou ku tabata paga bon. P’esei, nan por a biba den un kas kómodo. Pero algu a motivá nan pa pensa tokante nan sirbishi na Yehova Dios i nan prioridatnan. Nan a splika: “Na aña 2006, nos a asistí na e dia spesial di asamblea ku tabatin komo tema: ‘Mantené Bo Wowo Simpel.’ Hopi di e diskursonan a enfatisá e importansia di simplifiká nos bida pa nos por hasi mas den sirbishi na Yehova. Bayendo kas, despues di e asamblea, nos a realisá ku nos tabata hasiendo nèt kontrario. Nos tabata kumpra kos pa loko, i nos tabatin un debe grandi pa kaba di paga.”

Despues di e informashon spiritual ei, Madián ku Marcela a kuminsá simplifiká nan bida. Esaki ta loke nan a bisa: “Nos a kuminsá baha nos gastunan. Nos a bai biba den un apartamento mas chikitu; nos a bende nos outo i nos a kumpra un motosaikel.” Ademas, nan a stòp di bai e sentronan komersial pa nan no kai den tentashon di kumpra mas kos. Nan a kuminsá dediká mas tempu den sirbishi, papiando ku hende tokante Beibel. Anto, nan a kuminsá anda ku ruman ku tabata pionero spesial, ruman ku tabata hopi okupá den sirbishi na Yehova Dios.a

Poko despues, Madián ku Marcela a disidí di hasi asta mas den nan sirbishi na Yehova. Nan a muda bai un kongregashon chikitu pafó di stat ku tabatin mester di yudansa. Pa nan por a muda, Madián mester a kita for di trabou. Su supervisor no por a komprondé dikon el a kita siendo ku e tin asina un bon trabou. Madián a puntra su supervisor: “Señora ta gana hopi plaka, pero señora ta felis?” Su supervisor a atmití ku e no tabata felis. E tabatin hopi problema, i e no tabata sa kon pa resolvé nan. Anto Madián a bis’é: “Pues, realmente, no ta importante kuantu plaka bo ta gana. Loke ta importante ta loke realmente ta hasi bo felis. Siña hende tokante Dios ta hasi ami i mi kasá masha felis. Anto, nos ke bira asta mas felis. P’esei, nos ke dediká mas tempu hasiendo e trabou akí.”

Madián ku Marcela ta masha felis pasobra pa nan, sirbi Dios ta e kos mas importante den nan bida. E último 13 añanan, nan a sirbi den vários kongregashon na e parti nortwèst na Colombia kaminda tin mas nesesidat di predikadó. Aktualmente, nan tin e privilegio di sirbi komo pionero spesial.