Bo Wowo Ta Bon?
1. Ora nos “wowo ta bon,” kiko esei ta nifiká?
1 Loke nos wowo ta enfoká riba dje ta influensiá nos akshonnan. Ku bon motibu anto Hesus a bisa: “Si bo wowo ta bon, henter bo kurpa lo ta yen di lus”! (Mat. 6:22) Ora nos wowo ta spiritualmente “bon,” òf simpel, e ta enfoká riba un solo meta, esta, hasimentu di Dios su boluntat. Nos ta pone e Reino na promé lugá i no ta laga kosnan material ni aktividatnan innesesario interferí ku nos sirbishi.
2. Kiko lo por afektá nos punto di bista, pero kiko lo por yuda nos?
2 Eksaminá Bo Mes: Propaganda i kosnan ku otro hende tin por afektá nos punto di bista enkuanto loke nos tin mester. Promé ku bo kuminsá hasi esfuerso pa logra un sierto meta òf kumpra algu ku lo rekerí hopi tempu, plaka i energia di bo, lo ta bon pa “kalkulá e gastunan” i puntra bo mes, ‘Esaki lo stroba mi òf yuda mi sirbi Yehova mas mihó?’(Luk. 14:28; Fil. 1:9-11) Lo ta sabí tambe pa de bes en kuando analisá kon lo bo por simplifiká bo bida pa bo por hasi mas den sirbishi.—2 Kor. 13:5; Efe. 5:10.
3. Kiko nos ta siña di un ruman muhé ku a hasi ahuste pa simplifiká su bida?
3 Ora un ruman muhé a kuminsá traha pionero regular, el a disidí di keda ku su trabou di henter dia ounke un trabou di mitar dia lo tabata sufisiente pa kubri su gastunan. Pero ku tempu el a konkluí: “Ningun hende no por sirbi dos shon. Mi mester a sakrifiká mi deseonan i rekonosé loke básikamente ta mi nesesidatnan. Mi a realisá ku kosnan material ta bira bieu i si mi sigui hasi esfuerso pa haña e kosnan ku mi ta deseá mi ta keda morto kansá.” Su sirkunstansia a permitié hasi ahuste pa simplifiká su bida i kambia di trabou pa e por a sigui traha pionero.
4. Dikon ta urgente pa nos mantené un wowo simpel awor?
4 Debí na e urgensia di nos tempu ta mas importante ainda pa nos mantené un wowo simpel. Kada dia ku pasa ta un dia mas serka di e fin di e sistema di kosnan akí i e komienso di Dios su mundu nobo. (1 Kor. 7:29, 31) Ora nos ta enfoká riba e trabou di prediká, nos por salba nos mes i esnan ku ta skucha nos.—1 Tim. 4:16.