Kiko e Ekspreshon “Wowo pa Wowo, Djente pa Djente” Ta Nifiká?

Loke Beibel ta bisa

E lei di “wowo pa wowo, djente pa djente” tabata un di e leinan di Dios ku Moises a duna e pueblo di Israel. Hesus a referí na e lei ei den su Sermon Riba Seru. (Mateo 5:38; Éksodo 21:24, 25; Deuteronomio 19:21) Segun e lei ei, un malechor mester a haña un kastigu ku ta kuadra ku e krímen ku el a kometé.a

E prinsipio ei a apliká den kaso di un hende ku a heridá un otro hende intenshonalmente. Relashoná ku un hende ku a kometé un akto asina, Lei di Moises a bisa: “Fraktura pa fraktura, wowo pa wowo, djente pa djente; meskos ku el a hasi daño na un hende, asina mester hasi kuné tambe.”—Levítiko 24:20.

• Kiko tabata propósito di e lei di “wowo pa wowo, djente pa djente”?

• E lei di “wowo pa wowo, djente pa djente” ta apliká na e kristiannan awe?

• Idea robes tokante e lei di “wowo pa wowo, djente pa djente”

• Hesus ta korigí un idea robes

Kiko tabata propósito di e lei di “wowo pa wowo, djente pa djente”?

E lei di “wowo pa wowo, djente pa djente” no a outorisá hende pa tuma hustisia den nan mes man. Mas bien, e lei tabata pa yuda e huesnan duna kastigu na un manera balansá, no muchu leve ni muchu pisá.

E regla ei a sirbi tambe pa prevení hende di kousa daño na otro intenshonalmente òf asta di pensa di hasi esei. Lei a bisa: “Esnan ku keda [esta, esnan ku a mira kon e hustisia di Dios ta ser apliká] lo tende i tene miedu, i nunka mas lo hasi un maldat asina meimei di boso.”— Deuteronomio 19:20.

E lei di “wowo pa wowo, djente pa djente” ta apliká na e kristiannan awe?

Nò, e kristiannan djawe no ta bou di e lei ei. E tabata parti di Lei di Moises, ku a ser eliminá ora Hesus a muri.—Romanonan 10:4.

Sinembargo, e lei ei ta yuda nos komprondé kon Dios ta pensa. Por ehèmpel, e ta yuda nos mira kon importante hustisia ta pa Dios. (Salmo 89:14) E ta mustra nos tambe kiko ta Dios su norma di hustisia, esta, ku un malechor tin ku paga pa su aktonan.—Yeremías 30:11.

Idea robes tokante e lei di “wowo pa wowo, djente pa djente”

Idea robes: E lei di “wowo pa wowo, djente pa djente” a duna oportunidat sin fin pa tuma vengansa.

Echo: Lei di Moises a bisa: “No tuma vengansa, ni tene renkor kontra e yunan di bo pueblo.” (Levítiko 19:18) Na lugá di tuma vengansa, e lei a animá hende pa konfia den Dios i den e areglo ku el a instituí pa korigí kualke maldat.—Deuteronomio 32:35.