Mustra Interes Personal—Dor di Bon Kontakto Visual
1 Ora nos ta duna testimonio públikamente i di kas pa kas, hopi bes nos ta establesé kontakto visual ku hende promé ku nos kuminsá papia. Den e frakshon di tempu ei, nos lo por mira na nan ekspreshon di kara kiko nan ta pensa di nos presensia i asta ki beis nan tin. Di mes manera nan tambe por diserní hopi kos di nos. Un señora a bisa lo siguiente tokante e bishita di un Testigu: “Loke mi ta kòrda di su kara sonriente ta e trankilidat ku el a reflehá. Esei a hasi mi kurioso.” Esaki a habri kaminda pa e señora skucha e bon nobo.
2 Un manera efikas pa kuminsá un testimonio riba kaya òf na otro lugánan públiko ta dor di establesé kontakto visual. Un ruman hòmber ta wak e hendenan ku ta bini den su direkshon den nan kara. Ora e establesé kontakto visual, e ta smail, kaba e ta ofresé e revistanan. Usando e método aki, e ta disfrutá di hopi kòmbersashon plasentero.
3 Diserní Sintimentu di Otro Hende: Ora nos ta mantené kontakto visual ku hende, esaki por yuda nos diserní loke nan ta sinti. Por ehèmpel, si un persona tin difikultat pa komprondé nos òf no ta di akuerdo ku algu ku nos a bisa, generalmente su kara ta reflehá esei. Si e ta okupá òf e ta birando impasiente, nos por mira esei na su ekspreshonnan di kara. E ora ei nos por adaptá nos presentashon òf hasié mas kòrtiku di akuerdo ku e situashon. Pues un manera ekselente pa demostrá ku nos ta interesá personalmente den hende ta dor di tene kuenta ku nan sintimentunan.
4 Sinseridat i Konvikshon: Den hopi kultura, ora bo ta wak un persona den su kara, bo ta mustra ku bo ta sinsero. Tuma nota kon Hesus a reakshoná ora su disipelnan a puntr’é: “Ken realmente por ser salbá?” Beibel ta bisa: “Mirando nan den nan kara Hesus a bisa nan: ‘Pa hende esaki ta imposibel, pero pa Dios tur kos ta posibel.’” (Mat. 19:25, 26, NW) Sin duda e konvikshon den Hesus su wowonan a duna mas peso na su palabranan. Di e mesun manera, bon kontakto visual por yuda nos transmití e mensahe di Reino ku sinseridat i konvikshon.—2 Kor. 2:17; 1 Tes. 1:5.