Kontakto Visual

NOS wowonan ta komuniká aktitut i sintimentu. Nan por indiká sorpresa òf miedu, transmití kompashon òf amor, i tin biaha, nan por revelá duda òf tristesa. Un hòmber di edat a bisa di su paisanonan, ku a sufri hopi: “Nos ta papia ku nos wowonan.”

Otro hende por saka konklushon tokante nos i tokante loke nos ta bisa dor di opservá na unda nos ta fiha nos wowonan. Den hopi kultura, hende tin tendensia di konfia un persona ku ta wak nan den nan kara ku un ekspreshon amigabel. Di otro banda, si un persona ta wak abou òf un otro opheto en bes di wak esun ku e ta papia kuné den su kara, hende ta duda ku e ta sinsero òf kompetente. Den otro kultura nan ta haña ku no ta nèchi pa keda wak un hende den su kara. Pa nan, e por ta asta un muestra di agresividat òf provokashon, foral ora bo ta papia ku un hende di e sekso opuesto òf ku un hefe òf un otro persona di rango haltu. I den algun área, si un persona hóben mester wak un hende mas grandi den su kara ora e ta papia kuné, nan ta konsiderá esaki komo falta di rèspèt.

Sin embargo, kaminda kontakto visual no ta ofensivo, e ta yuda enfatisá un deklarashon importante i ta un prueba ku e oradó ta konvensí di loke e ta bisa. Ripará kon Hesus a reakshoná ora ku su disipelnan tur asombrá a bisa: “Ta ken por wòrdu salbá anto?” Beibel ta informá: “Hesus a keda wak nan i a bisa nan: ‘Serka hende esaki ta imposibel, ma serka Dios tur kos ta posibel.’” (Mat. 19:25, 26) Tambe e Skritura ta mustra ku apòstel Pablo a paga bon tinu na e reakshon di esnan den su ouditorio. Na un okashon tabatin un hòmber ku a nase lam presente ora Pablo tabata papia. Echonan 14:9 i 10 ta bisa: “E hòmber aki tabata skucha Pablo papia, kende, ora ku el a fiha su bista riba dje i a mira ku e tabatin fe pa wòrdu kurá, a bisa na bos haltu: ‘Lanta para règt riba bo pia.’”

Sugerensianan pa Sirbishi di Vèlt. Ora bo ta trahando den sirbishi di vèlt, sea amigabel i kariñoso ora bo ta aserká hende. Kaminda ta apropiá, hasi pregunta ku ta stimulá pensamentu pa bo kuminsá un kòmbersashon riba un tema ku ta interesá boso tur dos. Purba establesé kontakto visual, esta laga boso bista topa, òf por lo ménos wak e persona den su kara di un manera respetuoso i bondadoso. Un smail kariñoso, kompañá pa un mirada ku ta transmití goso, ta algu ku ta atraé hende hopi. Tal ekspreshon di kara por laga e persona sa ki klase di hende bo ta i yud’é sinti mas trankil segun ku bo ta kòmbersá.

Kaminda ta apropiá, opservá e ekspreshon di wowo di e persona, ya ku esaki por duna bo un indikashon kon pa trata ku e situashon. Lo bo por mira si e persona ta rabiá, no ta interesá òf no ta komprondé bo. Tambe lo bo ripará si e ta pèrdiendo pasenshi, òf al kontrario, ta hopi interesá den loke bo ta bisa. For di su ekspreshon di wowo bo por saka afó si bo tin ku papia mas slo òf mas lihé, purba hink’é den e kòmbersashon, stòp di papia kuné, òf, posiblemente sigui ku un demostrashon kon pa studia Beibel.

Sea bo ta dunando testimonio públiko òf ta kondusiendo un studio di Beibel, hasi esfuerso pa wak e persona ku bo ta papiando kuné den su kara na un manera respetuoso. Pero no keda wak e duru den su kara, pasobra esei por lag’é haña bèrgwensa. (2 Rei. 8:11) Pero den un manera natural i amigabel, wak e persona ku frekuensia den su kara. Den hopi pais, esaki ta transmití interes sinsero. Klaru ku ora bo ta lesando for di Beibel òf kualkier otro publikashon, bo bista lo ta fihá riba loke bo ta lesa. Pero pa enfatisá un punto, lo bo por wak e persona den su kara, maske ta brevemente. Si bo hisa kara wak e de bes en kuando, tambe lo bo por ripará su reakshon riba loke bo ta lesando.

Si timides ta pone ku na prinsipio ta duru pa bo wak hende den nan kara, no entregá. Ku práktika, lo bo logra hasié na un manera natural i asina lo bo komuniká ku otro hende na un manera mas efikas.

Ora di Duna Diskurso. Beibel ta konta nos ku promé ku Hesus a kuminsá su Sermon Riba Seru, “el a hisa kara wak su disipelnan.” (Luk. 6:20) Sigui su ehèmpel. Si bo ta bai papia dilanti un grupo, wak e grupo anto pousa un par di sekònde promé ku bo kuminsá papia. Den hopi pais lo bo por wak algun hende den ouditorio den nan kara. E pousa kòrtiku aki lo yuda bo superá e nervionan ku bo ta sinti na prinsipio, i bo ouditorio ta haña chèns pa ahustá su mes na e aktitut òf sintimentu ku bo kara ta revelá. Ademas, dor di hasi esaki bo ta duna e ouditorio oportunidat pa prepará pa skucha bo.

Durante bo diskurso, wak bo ouditorio. No djis wak e ouditorio komo un solo grupo. Purba wak e personanan presente un pa un. Den kasi tur kultura, nan ta ferwagt di un oradó p’e tin un sierto kontakto visual ku su ouditorio.

Wak bo ouditorio ta nifiká mas ku djis move bo wowonan di un banda pa otro. Ku rèspèt, wak un persona den ouditorio den su kara, i si ta apropiá bisa henter un frase na e persona ei. Kaba wak un otro, i bisa un òf dos frase na esun ei. No keda wak niun hende asina largu te ku e ta sintié inkómodo, ni no konsentrá riba solamente un par di hende den ouditorio. Sigui hasi kontakto visual den e manera aki ku henter bo ouditorio. Pero ora ku bo ta dirigí bo na un persona, papia di bèrdat kuné i opservá su reakshon promé ku bo pasa pa un otro.

Bo notanan mester ta riba e stènt di oradó, den bo man òf den bo Beibel. Nan mester ta poné di tal manera ku bo por djis move bo wowo pa mira nan. Si bo tin ku move henter bo kabes pa mira bo notanan, lo bo pèrdè kontakto ku e ouditorio. Tambe bo mester tene kuenta ku e kantidat di biaha ku bo ta wak bo notanan i na ki momentu. Si bo ta wak bo notanan nèt ora bo ta yegando na un punto kulminante di e diskurso, no solamente lo bo no por mira e reakshon di bo ouditorio sino tambe bo presentashon lo pèrdè un poko di su forsa. Tambe si konstantemente bo tin ku konsultá bo notanan, bo ta pèrdè kontakto ku bo ouditorio.

Ora bo tira un bala pa un persona, bo ta wak si el a fang’e. Kada pensamentu den bo diskurso ta manera un bala ku bo ta “tira” pa e ouditorio. Na nan reakshon bo ta sa si nan a “fang’e”; podisé nan ta sagudí kabes, smail, òf wak ku atenshon. Si bo mantené bon kontakto visual, esaki por yuda bo hasi sigur ku e ouditorio ta “fangu” bo ideanan.

Si bo ta asigná pa lesa pa e kongregashon, bo mester purba wak bo ouditorio durante e lesamentu? Si e ouditorio ta sigui bo lesamentu den nan Beibel, mayoria di nan lo no sa mes si bo ta hisa kara wak nan òf nò. Pero dor di wak bo ouditorio bo por hinka mas bida den bo lesamentu pasobra lo bo ta mas konsiente di nan reakshon. I den kaso ku mente di algun hende den ouditorio a dual i nan no ta usando nan Beibel, e kontakto visual ku e oradó por animá nan pa bolbe konsentrá riba loke ta ser lesá. Klaru ku ta brevemente lo bo por hisa kara wak, i bo no mester hasié di tal manera ku bo ta bruha den bo lesamentu. Pa logra esei, ta mihó pa tene bo Beibel den bo man i no baha bo kabes, sino keda ku bo kabes na haltu.

Tin biaha ansianonan tin ku duna un diskurso lesá na kongreso. Pa por hasi esaki efikasmente, nan mester di eksperensia, preparashon kabal i hopi training. Di mes un diskurso lesá ta limitá kontakto visual ku e ouditorio. Pero si e oradó a prepará bon, lo e por wak su ouditorio de bes en kuando sin pèrdè na unda e ta. Di e manera ei lo e mantené e atenshon di e ouditorio i nan lo por benefisiá plenamente di e instrukshon spiritual importante ku ta ser presentá.