Introdukshon ku Ta Lanta Interes

E INTRODUKSHON ta un parti krusial di tur diskurso. Si bo logra lanta e interes di bo ouditorio, nan lo ta mas dispuesto na sigui skucha ku atenshon. Si den sirbishi di vèlt bo introdukshon no lanta interes di e persona, lo bo no por sigui ku e kòmbersashon. I ounke e ouditorio den Salòn di Reino lo no sali bai laga bo ku palabra na boka, si bo no kapta nan atenshon, algun di nan lo por kuminsá pensa riba otro kos.

Ora bo ta prepará bo introdukshon, tene na mente e siguiente metanan: (1) kapta e atenshon di bo ouditorio, (2) resaltá bo tema i (3) mustra nan dikon e tema ta importante pa nan. Den algun kaso bo por logra e tres metanan aki pareu, miéntras ku den otro kasonan bo por logra nan separá i no den mesun órden.

Kon pa Kapta e Atenshon di Bo Ouditorio. E solo echo ku hende a reuní pa skucha un diskurso no ta nifiká ku nan ta prepará pa konsentrá riba e tema. Dikon nò? Pasobra tin yen di otro kos den nan bida ku ta sklama pa nan atenshon. Podisé nan tin un problema na kas òf un otro inkietut ku ta preokupá nan. E reto ku abo komo oradó ta konfrontá ta di kapta i keda ku e atenshon di e ouditorio. Tin mas ku un manera pa logra esei.

Un di e diskursonan mas famoso ku a wòrdu duná ta e Sermon Riba Seru. Kon el a kuminsá? Segun e relato di Lukas, Hesus a bisa: “Felis boso ku ta pober; . . . felis boso ku tin hamber awor akí; . . . felis boso ku ta yora awor akí; . . . felis boso ta ora hende odia boso.” (Luk. 6:20-22, BPK) Dikon esei a lanta interes? Pasobra den poko palabra Hesus a menshoná algun problema grave di su oyentenan. Anto en bes di papia hopi riba nan, el a mustra ku hende ku tabatin e tipo di problemanan ei tòg por ta felis, i el a hasié di tal manera ku su oyentenan kier a sigui skuch’é.

Pregunta ta un manera efikas pa lanta interes, pero nan mester ta apropiá. Si bo preguntanan ta indiká ku simplemente bo ta bai papia di kosnan ku e ouditorio a yega di tende kaba, nan lo pèrdè interes lihé. No hasi pregunta ku ta brongosá òf ofendé bo ouditorio. Mas bien, purba hasi pregunta ku ta pone hende pensa. Despues di kada pregunta, pousa brevemente pa duna bo oyentenan chèns di formulá un kontesta den nan mente. Na momentu ku nan ta sinti ku nan ta den un diálogo mental ku bo, e ora ei bo a kapta nan atenshon.

Un otro manera efikas pa kapta atenshon ta dor di konta un eksperensia di bida real. Pero lo bo no logra bo meta si e historia ta brongosá algun oyente òf si nan ta keda kòrda e historia pero no e lès ku e mester siña nan. Un eksperensia den e introdukshon mester prepará e tereno pa trata un aspekto importante di e kurpa di bo diskurso. Ounke lo bo mester di algun detaye pa hinka bida den e relato, evitá di hasi e eksperensia innesesariamente largu.

Tin oradó ta kuminsá ku un notisia resien, un sita for di un korant lokal òf un deklarashon di un outoridat rekonosé. E introdukshonnan aki tambe por ta efikas, basta nan ta kuadra ku e tema i ta apropiá pa e ouditorio.

Si bo diskurso ta parti di un simposio òf di e programa di Reunion di Sirbishi, por lo general ta mihó pa hasi bo introdukshon kòrtiku i al kaso. Si bo ta bai duna un diskurso públiko, tene bo na e tempu asigná pa introdukshon, ya ku ta e kurpa di e diskurso ta loke lo transmití e informashon ku ta mas balioso pa bo ouditorio.

De bes en kuando bo por ta pará dilanti di un ouditorio ku ta yen di duda òf ku no ta muchu amabel. Kon lo bo por kapta nan atenshon? Esteban, un kristian di promé siglo, deskribí komo un hòmber “yen di spiritu santu i di sabiduria,” a ser hibá forsosamente dilanti e korte supremo hudiu. Einan el a presentá un bon defensa di kristianismo. Kon el a kuminsá? Ku rèspèt i refiriendo na algu ku ámbos banda a aseptá. El a bisa: “Boso, ruman hòmbernan i tatanan, tende mi! E Dios di gloria a paresé na nos tata Abraham.” (Echo. 6:3; 7:2) Riba Seru di Areópago di Aténas, apòstel Pablo a adaptá su introdukshon na un ouditorio kompletamente diferente, bisando: “Hòmbernan di Aténas, mi ta mira ku boso ta masha religioso den tur sentido.” (Echo. 17:22) Den ámbos kaso e introdukshonnan tabata asina efikas ku e oyentenan kier a sigui skucha.

Ora bo ta den sirbishi di vèlt tambe bo tin ku kapta e atenshon di e hendenan. Si e persona no ta spera bo bishita, kisas lo e ta okupá ku otro keaser. Den algun parti di mundu e kustumber ta ku si bo ta un bishitante ku nan no a invitá, bo tin ku bisa mesora ta kiko bo a bin hasi. Miéntras ku na otro lugánan bo tin ku kumpli ku sierto formalidat promé ku bo por splika e motibu di bo bishita.—Luk. 10:5.

Sea kual sea e kaso, nos aktitut amigabel i sinsero por yuda krea un ambiente ku ta hiba na un kòmbersashon. Hopi bes ta bon pa kuminsá bisando algu ku ta relashoná ku loke e persona ta pensando. Kon bo por determiná kiko pa bisa? Wèl, kiko e persona tabata hasi ora ku bo a aserk’é? Podisé bo a hañ’é ta traha den kunuku, ta limpia su kurá, ta drecha un outo, ta kushiná, ta laba paña òf ta atendé ku yu. Òf kisas e tabata lesando korant òf mirando algu ku ta pasa riba kaya? E kosnan rònt di dje ta indiká ku e ta un amante di piskamentu, di deporte, di muzik, di biahamentu, di kòmpiuter òf di algu otro? Hopi bes hende ta preokupá ku loke nan a kaba di tende na radio òf wak na televishon. Un pregunta òf komentario breve riba un di e asuntunan ei lo por hiba na un kòmbersashon ameno.

E biaha ku Hesus a papia ku un muhé samaritano na e pos serka di Síkar ta un hopi bon ehèmpel ku ta mustra kon pa kuminsá un kòmbersashon ku e meta di duna testimonio.—Huan 4:5-26.

Bo mester prepará bo introdukshon kuidadosamente, foral si bo kongregashon ta traha su teritorio ku frekuensia, sino bo no ta haña chèns di prediká e bon nobo.

Resaltá Bo Tema. Den e kongregashon kristian, e ruman promé ku bo riba programa òf e presidente di e reunion por lo general ta anunsiá e título di bo diskurso i ta introdusí bo. Pero tòg lo ta bon pa den bo palabranan di introdukshon bo resaltá e tema. Bo por hasi esaki dor di ripitié palabra pa palabra, ounke tin otro opshon tambe. En todo kaso, bo mester hala atenshon na bo tema den bo introdukshon, pa despues bo desaroy’é den transkurso di bo diskurso.

Ora Hesus a manda su disipelnan bai prediká, el a indiká bon kla kua ta e mensahe ku nan mester a duna: “Segun ku boso ta bai, prediká, bisando: ‘E reino di shelu ta serka.’” (Mat. 10:7) Relashoná ku nos tempu, Hesus a bisa: “E evangelio aki di e reino lo wòrdu prediká.” (Mat. 24:14) Nos a haña e animashon urgente pa “prediká e palabra,” es desir, pega na e Beibel ora nos ta duna testimonio. (2 Tim. 4:2) Pero promé ku nos habri nos Beibel òf dirigí atenshon na e Reino, hopi bes ta bon pa nos papia di algun asuntu ku ta di preokupashon general. Lo bo por komentá riba kriminalidat, desempleo, inhustisia, guera, kon pa yuda hóbennan, òf riba malesa i morto. Pero kòrda ku nos ta hiba un mensahe positivo, p’esei en bes keda papia hopi riba problema, purba dirigí e kòmbersashon na e Palabra di Dios i na e speransa di Reino.

Mustra Dikon e Tema Ta Importante pa Bo Ouditorio. Si bo ta bai papia den e kongregashon, bo por ta basta sigur ku en general esnan presente lo ta interesá den loke bo tin di bisa. Pero nan lo skucha manera hende ku ta bai siña algu ku di bèrdat ta toka nan? Nan lo paga tinu pasobra nan ta realisá ku loke nan ta tende ta pas ku nan situashon den bida i pasobra bo a lanta den nan e deseo di hasi algu al respekto? Esaki lo ta e kaso solamente si ora di prepará bo diskurso bo tene debido kuenta ku bo ouditorio: nan sirkunstansianan, nan preokupashonnan, nan aktitut. Si bo a hasi esei, bisa algu den bo introdukshon ku ta indiká esei.

Sea bo ta papiando for di plataforma òf bo ta dunando testimonio na un solo persona, un di e mihó maneranan pa lanta interes den un tema ta dor di enbolbé bo ouditorio. Mustra nan ku nan problemanan, nan nesesidatnan òf e preguntanan ku nan tin na mente tin di hasi ku e tema ku bo ta bai trata. I nan lo skucha ku mas interes ainda si bo indiká ku fuera di trata e aspektonan general di e tópiko, lo bo trata tambe aspektonan spesífiko. Pa hasi esei bo tin ku prepará bon.

Bo Forma di Presentá e Introdukshon. Loke bo ta bisa den un introdukshon ta e kos mas importante, pero kon bo ta bis’é tambe por lanta interes. P’esei ora di prepará, no pensa solamente riba kiko bo ta bai bisa sino tambe riba kon bo ta bai bis’é.

Ta importante pa usa e palabranan korekto pa logra bo meta, p’esei ta kumbiní bo prepará e promé dos òf tres frasenan kuidadosamente. Por lo general frasenan kòrtiku i simpel ta mihó. Pa un diskurso den kongregashon, lo bo kier skirbi nan den bo notanan òf bo por siña nan for di kabes, ya asina bo palabranan di introdukshon lo hasi e impakto nesesario. Un introdukshon efikas, presentá na un manera trankil, por duna bo e serenidat ku bo tin mester pa duna e restu di bo diskurso.

Ki Ora Bo Mester Prepará e Introdukshon. Opinionnan ta varia riba e punto aki. Algun oradó ku eksperensia ta kere ku e introdukshon ta e promé kos ku bo tin ku prepará, i otronan ku a studia e arte di duna diskurso ta di opinion ku bo mester prepar’é despues ku bo a kaba ku e kurpa di e diskurso.

No tin duda ku promé ku bo por formulá e detayenan di un introdukshon apropiá, bo tin ku konosé bo tema i bo puntonan prinsipal ku bo kier desaroyá. Awor kiko si bo diskurso ta basá riba un boskeho imprimí? Si unabes ku bo a lesa e boskeho, bo tin un idea pa e introdukshon, no tin nada malu den hasi un anotashon di dje. Kòrda tambe ku pa bo palabranan di introdukshon ta efikas bo tin ku tene kuenta ku bo ouditorio i ku e informashon di bo boskeho.