Terorismo Lo Kaba un Dia?

Despues di un atake terorista, kisas bo ta puntra bo mes: ‘Dios ta interesá den loke a pasa? Dikon e kosnan akí ta pasa? Terorismoa lo kaba un dia? Kon mi por trata ku e miedu ku mi ta sinti?’ Beibel ta duna bon kontesta pa e preguntanan ei.

Kiko Dios ta pensa tokante terorismo?

Dios ta odia violensia i terorismo. (Salmo 11:5; Proverbionan 6:16, 17) I Hesus, kende ta representá Dios, a skual su disipelnan ora nan a aktua na un manera violento. (Mateo 26:50-52) Tin hende ku ta bisa ku nan ta kometé atake violento den nòmber di Dios, pero Dios no ta aprobá e atakenan ei. En realidat, e no ta skucha nan orashonnan.—Isaías 1:15.

Dios ta interesá den tur hende ku ta sufri. Esei ta inkluí hende ku ta víktima di atake terorista. (Salmo 31:7; 1 Pedro 5:7) Beibel ta bisa tambe ku Dios ta bai kaba ku tur violensia.—Isaías 60:18.

Kiko ta e kousa prinsipal di terorismo?

Beibel ta bisa kiko ta e kousa prinsipal di terorismo. E ta bisa: “Hende a ehersé outoridat riba un otro hende pa su daño.” (Eklesiástes 8:9, Beibel Santu) Den transkurso di historia humano, hende ku poder a usa terorismo pa oprimí otro hende. Komo resultado, hende ku a ser oprimí a usa terorismo pa bringa kontra e hendenan ku ta oprimí nan.—Eklesiástes 7:7.

Fin di terorismo

Dios ta primintí ku lo e kaba ku miedu i violensia. Dios ta primintí tambe ku lo e sòru pa den futuro tin pas riba tera. (Isaías 32:18; Mikéas 4:3, 4) Esaki ta loke Dios lo hasi:

Eliminá e kousa prinsipal di terorismo. Dios lo kita tur gobièrnu humano. Anto tera lo tin un gobièrnu so, e gobièrnu di Dios. E gobièrnu ei lo tin Hesukristu na kabes. Hesus lo trata tur hende na un manera hustu. Hesus lo kaba ku opreshon i violensia. (Salmo 72:2, 14) E tempu ei, niun hende lo no praktiká terorismo mas. Hende “lo deleitá nan mes den pas abundante.”—Salmo 37:10, 11, Beibel Santu.
Drecha tur daño ku terorismo a kousa. Dios lo drecha tur daño ku hende a sufri pa motibu di terorismo: tantu daño físiko komo emoshonal. (Isaías 65:17; Revelashon 21:3, 4) Dios a asta primintí ku lo e lanta hende for di morto. E tempu ei, nan lo biba riba tera, kaminda pas ta reina!—Huan 5:28, 29.

Beibel ta duna nos bon motibu pa kere ku pronto Dios lo tuma akshon. Pero, kisas bo ta puntra bo mes: ‘Dikon Dios no a kaba ku terorismo ainda?’ Si bo ke haña un kontesta pa e pregunta ei, wak e vidio Dikon Dios Ta Permití Sufrimentu?

a En general, e palabra “terorismo” ta referí na uso di violensia òf menasa kontra hende. Hopi bes, esaki ta kontra hende komun i koriente. Nan ta hasi esei pa hinka miedu den hende pa asina logra un kambio polítiko, religioso òf sosial. Sinembargo, hopi bes tin diskushon tokante si un suseso en partikular mester ser konsiderá komo un akto di terorismo òf nò.

Beibel por yuda bo trata ku e konsekuensianan di terorismo

Beibel ta bisa ku e siguiente dos kosnan akí por yuda bo:

Hasi orashon na Dios.—Filipensenan 4:6, 7.
Pensa regularmente tokante e speransa ku Beibel ta duna nos.—Hebreonan 6:19.

Si bo ke haña mas sugerensia basá riba Beibel, lesa e artíkulo na spañó “Kiko Bo Por Hasi pa Stòp di Preokupá Asina Tantu?”

Testigunan di Yehova ku a sufri pa motibu di un atake terorista a haña konsuelo tambe di nan kompañeronan den fe. Laga nos wak dos ehèmpel:

Un dia Natalya i su yu hòmber Aslan, di 9 aña di edat, tabata na un skol na e pueblo Beslan, na Rusia. Diripiente, un grupo di terorista armá a kore drenta e skol, i nan a sekuestrá 1000 persona. Durante e suseso trágiko ei, sentenáres di hende a muri. Mayoria di nan tabata mucha. Maske ku Natalya i Aslan a sobrebibí e atake, nan a keda troumatisá. Lesa nan relato i haña sa loke a yuda nan.
Pablo ku Sophie a pèrdè nan yu hòmber den morto durante e atake riba Twin Towers na New York. Den e vidio akí, bo por mira loke a yuda nan i otro víktima di atake terorista.