Lider Polítiko Ta Spièrta Hende Ku Armagedon Ta na Kaminda—Kiko Beibel Ta Bisa?

Djaluna mainta 10 di òktober 2022, Rusia a manda bòm riba vários stat na Ukrania. Rusia a tuma revancha kontra Ukrania pa un eksploshon grandi ku a tuma lugá dos dia promé. E eksploshon ei a hasi hopi daño na un brùg importante ku ta konektá Krimea ku Rusia. E susesonan ei a tuma lugá poko tempu despues ku algun lider polítiko a bisa ku Armagedon ta na kaminda.

“Ta promé biaha desde tempu di [Presidente merikano] Kennedy i e krísis di arma nuklear na Cuba ku nos ta asina serka di Armagedon. . . . Mi no ta kere ku ta posibel pa hende usa arma nuklear sin ku esei ta hiba na Armagedon.”—Presidente Merikano Joe Biden, 6 di òktober 2022.
“Mi tambe ta kere ku pronto nos lo haña nos ku Armagedon, algu ku lo afektá henter nos planeta.”—Esei ta loke presidente di Ukrania Volodymyr Zelensky a bisa ora a puntr’é kiko lo ta e konsekuensianan di uso di arma nuklear (BBC News, 8 di òktober 2022).

Ta posibel ku uso di arma nuklear lo hiba na Armagedon? Kiko Beibel ta bisa?

Uso di arma nuklear lo hiba na Armagedon?

Nò. Ta un biaha so e palabra “Armagedon” ta ser menshoná den Beibel, esta, na Revelashon 16:16. Armagedon no ta referí na un guera entre nashon, pero e ta referí na un guera entre Dios i “e reinan di henter e tera habitá.” (Revelashon 16:14) Dios lo usa e guera di Armagedon pa kaba ku gobernashon humano.—Daniel 2:44.

Pa haña sa mas tokante e konsekuensianan ku Armagedon lo tin pa tera, lesa e artíkulo: Kiko e Guera di Armagedon Ta?

Un guera nuklear lo destruí planeta Tera i su habitantenan?

Nò. Aunke e lidernan di mundu lo por disidí di usa arma nuklear den futuro, Dios lo no permití pa tera ser destruí. Beibel ta bisa:

“Tera ta permanesé pa semper.”—Eklesiástes 1:4, Beibel Santu.
“Hende hustu lo heredá tera, i nan lo biba riba dje pa semper.”—Salmo 37:29.

Sinembargo, profesia bíbliko i e susesonan aktual ta indiká ku nos ta bibando na un momento krusial den historia humano. (Mateo 24:3-7; 2 Timoteo 3:1-5) Haña sa loke Beibel ta bisa tokante futuro. Aseptá nos kurso di Beibel grátis.