Guera i Kambio di Klima Ta Kousa Mas Skarsedat di Kuminda Rònt Mundu—Kiko Beibel Ta Bisa?

E guera na Ukrania i e efektonan di kambio di klima ta kousa hopi problema den suministro di kuminda rònt mundu. Spesialmente, na pais di poko rekurso kaminda tin hopi skarsedat di kuminda esei ta kousa hopi problema.

“Guera, kambio di klima, preis di koriente ku ta subi i vários otro kos ta stroba produkshon di kuminda i esei ta kousa skarsedat di kuminda.”—António Guterres, Sekretario General di Nashonnan Uní, 17 di yüli 2023.
“Algun eksperto ta premirá ku debí ku Rusia a hala atras for di e akuerdo ku nan a sera ku ta permití Ukrania eksportá grano, esei lo kousa mas skarsedat di kuminda. Esei na su turno lo pone e preisnan di kuminda subi mas na e paisnan di ménos rekurso, manera e paisnan na Nort Afrika i Medio Oriente.”—E website Atalayar.com, 23 di yüli 2023.

Analisá loke Beibel ta bisa tokante skarsedat di kuminda i e speransa ku Beibel ta duna pa futuro.

Beibel a bisa di antemano ku lo tin skarsedat di kuminda

Hesus a profetisá lo siguiente: “Nashon lo lanta kontra nashon i reino kontra reino, i lo tin skarsedat di kuminda.”—Mateo 24:7.
Revelashon ta papia tokante kuater koredó di kabai simbóliko. Un di e koredónan di kabai ta representá guera. E koredó ku ta bini despues di dje ta representá hamber. Esei ta referí na un tempu ku lo tin skarsedat di kuminda i ku preis di kuminda lo subi drástikamente. Beibel ta bisa: “Mi a mira un kabai pretu aparesé; esun sintá riba dje tabatin un balansa den su man. Mi a tende un kos ku a zona manera un stèm, bisa . . . : ‘Solamente un kana di trigo pa e suèldu di henter un dia di trabou i solamente tres kana di sebada pa e suèldu di henter un dia di trabou!’”—Revelashon 6:5, 6, Beibel papiamentu koriente.

E profesianan di Beibel akí tokante skarsedat di kuminda ta kumpliendo awor, den e tempu ku Beibel ta yama “e último dianan.” (2 Timoteo 3:1) Pa haña sa mas tokante “e último dianan” i e korementu di e kuater koredónan di kabai den e buki Revelashon, wak e vidio Mundu A Kambia Desde 1914 i lesa e artíkulo “E Kuater Koredónan di Kabai—Ken Nan Ta?”

Kon Beibel ta yuda nos?

Beibel ta kontené konseho práktiko ku por yuda nos trata ku situashon difísil, inkluso oumento kontinuo di preis di kuminda i asta skarsedat di kuminda. Pa algun ehèmpel lesa e artíkulo: “Siña Kon pa Biba ku Ménos Sèn.”
Ademas, Beibel ta duna nos speransa ku e situashon di mundu lo drecha. Beibel ta primintí ku un dia “lo tin abundansia di grano riba tera” i tur hende lo tin sufisiente kos di kome. (Salmo 72:16) Pa haña sa mas informashon tokante loke Beibel ta primintí pa futuro i dikon bo por konfia loke Beibel ta bisa, lesa e artíkulo: “Berdadero Speransa pa un Mihó Futuro.”