2023: Un Aña Ku A Duna Hende Hopi Ansiedat​—Kiko Beibel Ta Bisa?

Durante 2023, hopi di e susesonan rònt mundu ta mustra bon kla ku nos ta bibando den e tempu ku Beibel ta yama “e último dianan.” (2 Timoteo 3:1) Laga nos wak kon vários di e susesonan ei ta kuadra ku loke Beibel a bisa di antemano tokante e tempu ku nos ta biba aden.

Beibel i e susesonan di 2023

“Guera den vários lugá.”​—Mateo 24:6.

• “Tin mas i mas konflikto violento na vários parti di tera.”a

“Den un lugá tras di otro lo tin temblor.”​—Marko 13:8.

• “For di e promé lunanan di 2023, tabatin 13 temblor di un magnitut mas haltu ku 7 ku a tuma lugá rònt mundu. For di tempu ku a kuminsá registrá temblor, nunka algu asina a pasa.”b

“Esenanan spantoso.”​—Lukas 21:11.

• “Tera a sali for di e fase di keinta pa e fase ku tera ta kushi.”​—António Guterres, sekretario general di Nashonnan Uní.c

“Skarsedat di kuminda.”​—Mateo 24:7.

• “2023: Un otro aña sumamente difísil pa hende ku ta lucha pa pèrkurá kuminda pa nan famia.”d

“Tempunan krítiko, difísil pa trata kuné.”​—2 Timoteo 3:1.

• “Rònt mundu, un di kada ocho hende ta sufri di problema ku salú mental.”e

Kiko nos por ferwagt den 2024?

Niun hende no por bisa sigur kon kos lo bai den 2024. Pero loke ta pasando rònt mundu ta indiká ku pronto e Reino di Dios, ku ta un gobièrnu selestial, lo remplasá tur gobièrnu humano i pone fin na tur loke ta kousa sufrimentu i ansiedat.​—Dánièl 2:44; Revelashon 21:4.

Pero kiko nos por hasi aworakí si nos ta sinti ansiedat? Nos por pidi Dios yuda nos. Beibel ta bisa:

“Ora mi tin miedu, mi ta pone mi konfiansa den bo.”​—Salmo 56:3.

Kon nos por mustra konfiansa den Dios? Esei ta ora nos haña sa mas tokante e bunita futuro ku Beibel ta primintí. E tempu ei, lo no tin sufrimentu mas. Pa bo haña sa kon abo i bo famia por benefisiá di e promesanan ku tin den Beibel, nos kurso di Beibel interaktivo grátis lo yuda bo ku esei.