Dokternan A Siña for dje Caso cu Mi A Hera Muri

DEN mei di 1991, nos tabata informá cu nos tabata spera nos di cuater yu. Nos yu menor, Mikael, tabatin nuebe aña di edad, i nos yu morocho [ohochi], Maria i Sara, tabatin 13. Aunke nos no a planea pa un otro yu, pronto nos a custumbrá cu e idea di haña un otro yu.

Un anochi den e tercer luna di mi embaraso, di ripiente mi a sinti un dolor den mi pulmon. E siguiente dia casi mi no por a cana. E dokter a bisa cu mi tabatin pulmonia, i el a duná mi penicilina. Mi a cuminsá sintí mi mihó despues di dos dia, pero mi tabata hopi swak. Anto di ripiente mi a sinti dolor den e otro pulmon, i nan a ripití e mésun procedimentu.

Durante a dianan cu a sigui, mi no por a drumi riba cama debí na dificultad di hala rosea. Un poco mas cu un siman despues dje promé atake di dolor, un banda di pia a bira blou i a hincha. E biaha aki nan a hibá mi hospital. E dokter a bisá mi cu e dolor den mi pulmon no tabata debí na pulmonia sino na klompi di sanger. El a bisa tambe cu mi tabatin un klompi di sanger den mi las. Nan a informá mi cu klompi di sanger ta un causa di mas comun pa morto den hende muher embarasá den Suecia. Un poco dia despues nan a hibá mi n’e Hospital Karolinska Sjukhuset den Estocolmo, locual tin un clínica materno special pa embarasonan complicá.

E dokternan a dicidí di duná mi heparin, un medicacion pa haci sanger fini. Nan a duná mi siguransa di cu e peliger di derame debí n’e tratamentu cu heparin tabata poco na comparacion cu e rísico di sufri di un otro klompi di sanger den mi pulmon. Despues di dos siman, mi a recobrá suficientemente pa bai cas. Mi a sinti un felicidad caluroso i ardiente ya cu mi tabata na bida cu un yu chikitu bibu creciendo den mi.

E Tempu pa Duna Lus

Nan a dicidí pa lanta e dolornan di parto, pero promé cu nan por a dal paso p’e comienso dje procedimentu, mi a sinti un dolor severo na parti abou di mi barica. P’esei nan a hibá mi hospital lihé. Pero, e dokternan no por a haña nada malu.

E siguiente anochi mi barica tabata hopi hinchá, i e dolor no a mengua. Den meianochi, un dokter a examiná mi i a haña cu mi tabatin dolor di parto. Su manicé mi barica a hincha asta mas, i e dolor tabata insoportabel. E dokter a parce preocupá i a puntra cua tabata e último biaha cu mi a ripará movementu dje yu. Di ripiente mi a corda cu e no a move pa masha tempu.

Nan a hibá mi un bes n’e sala di parto. Di leu mi por a tende e personal papia. Un hende a bisa, “E ta nenga di aceptá transfusion di sanger.” Anto e enfermera a hala cerca i a bisa na bos haltu: “Bo sa cu bo yu ta morto, no ta berdad?” Mi a sinti como si fuera un hende a claba un cuchú den mi curason.—Proverbionan 12:18.

Nengamentu Firme di Aceptá Sanger

Di ripiente mi dokter a presentá i a bisá mi cu mi estado tabata mashá serio. El a puntrá mi si ainda mi tabata kier a mantené mi decision di no aceptá transfusion di sanger. Mi a bisa vigorosamente cu sí, pero mi no ta corda hopi mas despues di esei. Sin embargo, mi a declará mashá claro na mi dokter cu hende cristian ta ser mandá pa “abstené . . . di sanger” i cu mi tabata kier a keda obediente n’e ley di Dios.—Echonan 15:28, 29; 21:25.

Entretantu, nan a yama un otro dokter, Barbro Larson, un ciruhana experto. El a yega lihé i a operá un bes. Ora nan a habri mi barica, nan a descubrí cu mi a perde tres liter di sanger den sangramentu interno. Pero, Dra. Larson a respetá mi decision tocante transfusion di sanger.

Despues, un otro dokter a bisa cu lo mi muri siguramente den poco minuut. Segun informe, el a declará, “Mi no sa si e ta na bida awor aki.” Despues a sali na cla cu e dokternan no por a descubrí e fuente dje sangramentu, di manera cu nan a pone un compres den mi barica pa yuda controlá e sangramentu. Dokter i enfermera no a ofrecé absolutamente ningun speransa pa mi sobrebibencia.

Ora mi yunan a yega hospital i a tende di mi estado, unu di nan a bisa cu Armagedon lo yega pronto i cu despues nan lo ricibí mi di nobo den e resureccion. E resureccion ta ki un areglo maraviyoso i hustu!—Juan 5:28, 29; 11:17-44; Echonan 24:15; Revelacion 21:3, 4.

Bida den Peliger

Mi hemoglobina a baha te na 4 gram pa deciliter, pero a parce cu e sangramentu a para. Mas promé mi a pone un copia dje revista ¡Despertad! di 22 di november di 1991 huntu cu mi file. Dra. Larson a hañ’é i a ripará e título, “Prevencion i control di hemoragia sin transfusion di sanger.” El a les’é ansiosamente pa mira si tabatin algu cu e por a usa pa yudá mi sobrebibí. El a ripará e palabra “eritropoyetin,” locual ta un medicacion cu ta stimulá e curpa pa producí cel corá di sanger. Awor el a duná mi esei. Pero e medicacion ta tuma tempu pa producí resultado. Pues, e pregunta tabata, Eritropoyetin por duna resultado na ora?

Su mañan e nivel di mi hemoglobina a baha te na 2,9. Ora mi a lanta fo’i soño i a haña tur mi famia cant’i mi cama, mi a puntra mi mes kico a pasa. Mi no por a papia pa motibu dje respirador. Mi casi a sintí mi histérico di pena, pero mi ni sikiera por a yora. Nan tur a bisá mi cu mi tabatin cu conserbá mi forsa afin di sobrebibí.

Su mañan mi tabatin keintura debí n’e inflamacion cu e compres a causa den mi barica. Mi hemoglobina a baha te na 2,7. Aunke ta mashá peligroso pa manda hende fo’i tinu den tal estado, Dra. Larson a splica cu apesar dje rísico, nan a keda obligá di operá atrobe pa kita e compres.

Promé cu e operacion, nan a permití mi yunan drenta pa bishitá mi. Nan tur a kere cu esei tabata un despedida. Vários miembro dje personal médico tabata yora. Nan no a kere cu mi por a sobrebibí. Nos yunan tabatin curashi, i esei a duná mi trankilidad i confiansa.

Pa motibu cu nan a duná mi e mínimo di anestesia, tabatin bes cu mi por a tende loke dokter i enfermera a bisa otro. Algun tabata papia tocante mi como si mi tabata morto caba. Despues, ora mi a ripití loke mi a tende durante e operacion, un enfermera a pidi disculpa. Pero el a bisa cu e tabata convencí cu lo mi muri i ainda no a comprendé con mi a scapa.

Su mañan mi a sintí mi un poco mas mihó. Mi hemoglobina tabata 2,9 i mi hematocrito tabata 9. Rumannan cristian a bishitá mi i a trece cuminda i cofi pa mi famia. Nos a keda gradicidu pa nan amor i cariño. E anochi ei mi estado tabata crítico pero stabil, i nan a hibá mi na otro afdeling.

E Dokternan Ta Siña

Hopi miembro dje personal médico tabata curioso tocante mi, i e mayoria di nan tabata mashá bondadoso. Un enfermera a bisa: “Ta bo Dios a salbá bo.” Un dokter di un otro afdeling a pasa i a bisa: “Mi simplemente kier a mira e aparencia di un hende cu un nivel di hemoglobina asina abou. Mi no por comprendé con bo por ta asina alerto.”

Su mañan, aunke tabata su dia liber, mi dokter a bishitá mi. El a bisa cu el a sinti un humildad debí na loke a pasa. El a bisa cu si mi recobrá completamente, nan lo iniciá un investigacion nobo den alternativanan p’e terapia di transfusion di sanger den tratamentu di pashent.

Mi recobramentu tabata dramático. Dos siman i mei despues di un parto trágico, e nivel di mi hemoglobina a aumentá te na poco mas cu 8. P’esei mi a sali for di hospital. Tres dia despues nos a celebrá nos asamblea anual di circuito di Testigo di Jehova, i mi tabat’ei. Ki animá mi a keda pa mira tur nos rumannan cristian atrobe cu a apoyá nos asina tantu durante nos experencia penoso!—Proverbionan 17:17.

Manera Dra. Larson a primintí, un informe tocante mi caso titulá “Eritropoyetin ta reemplasá transfusion di sanger” tabata publicá despues den e periódico médico sueco Läkartidningen. El a bisa: “Un señora di 35 aña di edad, un Testigo di Jehova, a sufri di un sangramentu masivo severo durante embaraso. El a nenga transfusion di sanger pero a aceptá terapia di eritropoyetin. Despues di nuebe dia di tratamentu despues di operacion cu dósis haltu di eritropoyetin, e hemoglobina a aumentá for di 2,9 te na 8,2 gram pa deciliter sin ningun mal resultado.”

E artículo a concluí: “Na principio e paciente tabata mashá swak, pero el a recobrá sorprendentemente lihé. Ademas, el a sigui despues dje operacion totalmente sin complicacion. E pashent por a sali for di hospital despues di dos siman.”

Aunke tal experencia tabata un golpi duru pa nos, nos ta contentu cu como un resultado, algun dokter por a siña algu tocante alternativanan pa transfusion di sanger. Nos ta spera cu nan lo ta prepará pa purba e métodonan di tratamentu cu a duna bon resultado caba.—Relatá dor di Ann Yipsiotis.

[Plachi na página 29]

Ami cu e ciruhana competente