E Fin di Religion Ta Cerca?

“E tera siguramente lo ser yená cu e conocimentu di Jehova mescos cu awa ta cubri laman.”

ISAIAS, PROFETA ISRAELITA DI SIGLO 8 P.E.C.

ASINA Isaías e profeta hebreo a profetisá cu un dia tur hende riba tera lo ser uní den e adoracion di e Dios Todopoderoso. Sin embargo, awe, tal prospecto por parce mas leu cu nunca.

Por ehempel, cerca e principio di siglo 20, revolucionarionan comunista na Rusia a kere cu e destruccion di religion tabata un paso necesario pa liberá pueblo. Nan a declará cu ateismo, por ‘liberá pueblo for dje carga pisá di prehuicio i desilusion di pasado.’ Na 1939 caba, Stalin a reducí e cantidad di misa católico Ortodox habrí den e Union Soviético te na 100, compará cu mas cu 40.000 promé cu 1917.

Hitler tambe a considerá religion como un obstáculo den su caminda pa coge mando absoluto. Hitler a bisa: “Bo ta sea cristian of aleman. Bo no por ta tur dos.” El a purba eliminá gradualmente tur forma di adoracion cu e no por a dominá. Cu tal meta na bista, nazista a desaroyá nan mes oracion, fiesta, i bautismo, i asta ceremonia di entiero di aparencia religioso. Hitler tabata nan mesías, i e patria tabata nan dios. Nazista por a cometé cualkier barbaridad cu aprobacion di Hitler.

E Tempu Final di Religion?

Ni Stalin ni Hitler a cumpli cu nan esfuerso pa dominá religion. Pero awor, ta parce cu indiferencia ta sucesor di tirania. Pa studiantenan di Bijbel tal desaroyonan no ta yega como un sorpresa. Apostel Pablo a bisa Timoteo cu den e “último dianan” hende lo ta “stimador di placer mas bien cu stimador di Dios.”—2 Timoteo 3:1-4.

E Bijbel ta siña cu e “último dianan,” aki marcá pa indiferencia religioso, lo ser e introduccion dje fin di tur religion? No. En bes di pronosticá e fin di tur religion, e Bijbel ta splica cu religion falsu—locual ta duná e nomber simbólico di Babilonia e Grandi—lo yega na un fin.a E buki di Revelacion ta bisa: “Un angel fuerte a hisa un piedra manera un piedra di mulina i a tir’é den laman, bisando: ‘Asina cu un tiru lihé Babilonia e stad grandi lo ser tirá abou, i lo e no ser hañá nunca mas.’”—Revelacion 18:21.

Sin embargo, e desaparicion di religion falsu lo no resultá den un mundu sin Dios. Al contrario, Salmo 22:27 ta profetisá: “Tur extremo dje tera lo corda i bolbe bek cerca Jehova. I tur e famianan dje nacionnan lo buig dilanti bo.” Imaginá bo mes e tempu ora “tur e famia dje nacionnan” lo uni huntu den e adoracion di e solo Dios berdadero! Bou di gobernacion dje Reino di Dios, tal promesa notabel lo haña un cumplimentu glorioso. (Mateo 6:10) Ora e tempu ei ta yega, religion—e religion berdadero—lo ser masha importante pa hende. Pero, kico di awor?

Satisfaciendo e Bashí Spiritual

E bashí spiritual tantu prevalente den Europa awe ta parce e situacion cu a existí den e Imperio Romano dje promé siglo. Historiador Will Durant a duna detaye dje manera cu cristianismo dje promé siglo exitosamente a logra satisfacé e necesidad spiritual dje tempu ei: “Den e ausencia di moralidad den paganismo muribundo, den e frialdad di stoicismo i e corupcion di epicúreo, den un mundu afligí cu brutalidad, crueldad, opresion, i cáos sexual, den un imperio pacífico cu a parce di no tin mester di hombresa of e diosnan di guera, el a introducí un moralidad nobo di hermandad, bondad, decencia, i pas.”

E bashí moral i spiritual den e bida di hende di nos tempu por ta saciá mediante e mésun mensahe fuerte cu cristiannan di promé a predicá den tur e Imperio Romano. I tin hende ei cu ta scucha e mensahe. Hopi europeo, aunke nan no ta parce religioso, ta kere ainda cu Dios ta hunga un papel importante den nan bida. Aunke nan no ta bai misa mas, tog algun di nan a yena nan bashí spiritual na un otro caminda.

Juan José, un homber hóben di Palma de Mayorca, Spaña, tabata educá den un scol católico i a sirbi den misa te cu el a haci 13 aña di edad. El a bai misa tur diadomingo cu su famia, pero no a bai misa mas ora el a yega 13 aña di edad. Pakico? Juan José a splica: “Entre otro cosnan, baimentu di misa a fastidiá mi. Mi tabata conocé e ceremonia for di memoria. Tur cos a parce di ta un ripiticion di loke mi a tende caba. Ademas, hopi bes e pastor di nos parokia a trata nos cu ta sirbidor di misa severamente. I mi a kere cu tabata inhustu pa hende pober paga pastor pa ceremonia di entiero.

“Mi a kere den Dios ainda, pero mi a pensa cu mi por a sirbi Dios na mi manera, sin ceremonia di misa. Huntu cu un grupo di amigu, mi a purba di gosa bida lo mihó cu mi tabata por. Mi ta suponé cu bo por bisa cu diberticion a bira e cos mas importante den mi bida.

“Pero, ora mi a yega 18 aña di edad, mi a cuminsá studia Bijbel cu Testigonan di Jehova. Kico nan tabatin pa ofrecé mi cu mi no a haña den misa? Un fe definitivo fundá riba e Bijbel en bes di riba tradicion i ‘misterio’ cu mi nunca por a comprendé. Sin embargo, mi kerementu nobo a nificá cambionan grandi den mi bida. En bes di pasa tur fin di siman organisando fiestanan den discotecanan, mi a cuminsá bai di cas pa cas pa compartí cu mi próhimo e fe cu mi a descubrí recientemente. Activamente ocupá yudando otro hende a duna mi bida un nificacion. P’e último shete aña mi a keda ocupá como un evangelisador di tempu completo di Testigo di Jehova.”

No ta hóbennan so cu ta purba di satisfacé nan bashí spiritual. Antonia, un señora di edad di Extremadura, Spaña, a pasa e mayor parti di su bida “buscando Dios,” segun é. Durante cu e tabata tiener, el a bai misa tur dia i despues a drenta conbento católico, siendo cu el a kere “cu si no por haña Dios den conbento, no por hañ’é na ningun parti.” Pero, tres aña despues el a bandoná e conbento, sintiendo asta mas desilusioná i mas bashí cu promé.

Finalmente, ora e tabata den su 50 i picu, el a bira un Testigo di Jehova. El a splica: “Mi a keda asina contentu ora e Testigonan a bishitá mi i, usando mi mes Bijbel, a contesta pregunta cu mi tabatin. Desde cu mi a bira un Testigo di Jehova, mi bida a haña un propósito. Mi tin mi problemanan, pero awor mi por trata cu nan pasobra awor mi ta conocé e Dios berdadero.”

E dos experencianan aki no ta e úniconan. Contrario cu e tendencia religioso, un cantidad aumentante di hende ta asociá cu Testigonan di Jehova i a haña cu un bida na armonia cu nan fe i e predicacion tocante dje na otro nan ta duna nan bida un nificacion i propósito.

E Religion Berdadero Ta Mas Importante cu Nunca

Aunke nos ta biba den un tempu ora hopi hende ta rechasá religion, no ta sabí pa husga tur religion como anticuá. Ta cierto cu den siglo binti aki hende ta rechasá ceremonia cu no tin nificacion, i siñansa anticuá i no bíblico, i nan ta rechasá e tradicion di bai misa djis pa aparencia. Realmente, Bijbel ta recomendá pa nos evitá religion hipócrita. Apostel Pablo a profetisá cu durante e “último dianan” algun hende ‘lo tin un forma di debocion piadoso, pero cu nan lo ser falsu na su poder.’ Hende asina ta mantené un aparencia religioso, pero nan conducta ta nenga su valides. Con nos mester reaccioná na tal hipocresia religioso? Pablo a consehá: “Apartá bo di esakinan.”—2 Timoteo 3:1, 5.

Pero Pablo tambe a bisa cu “religion sí ta paga un bon recompensa.” (1 Timoteo 6:6, The New English Bible) Pablo no tabata papia tocante cualkier sorto di religion. E palabra griego traducí aki como “religion” tabata eu·seʹbei·a, cu kier men “debocion of reverencia pa cu Dios.” E religion berdadero, debocion piadoso auténtico, “ta encerá promesa dje bida djawor i di loke ta bini.”—1 Timoteo 4:8.

Manera e ehempelnan anterior ta demostrá, religion berdadero por duna nificacion na nos bida i yuda nos enfrentá problema cu curashi. Mas cu esei, e religion berdadero ta garantisá un futuro eterno. Ta bale la pena pa sigui tras di e forma di adoracion ei, siendo cu nos ta sigur di cu tempu ‘lo e yena e tera.’b (Isaías 11:9; 1 Timoteo 6:11) No cabe duda cu awor ta e tempu ora e religion berdadero ta mas importante cu nunca.

[Notanan]

[Kuadro/Plachi na página 10]

E Cuenta di Dos Edificio

Spaña tin un abundancia di edificio religioso, pero e fervor cu ántes a sostené e construccion di catedralnan costoso ta parce di a evaporá. Por ehempel, den Mejorada del Campo, na rand di Madrid, un misa católico impresionante ta bou di construccion. Justo Gallego Martínez, un ex-frere benedictino, a cuminsá e proyecto mas cu 20 aña pasá. Pero e edificio ta solamente un casca bashí ainda. Martínez, e solo constructor, ta awor den su 60 i picu, p’esei ta parce improbabel cu e misa hamas lo ser completá. Pero, 300 kilometer pazuid, un otro cuenta a sali na cla.

“Fe ta move montañanan” ta loke un corant local a describí e construccion den dos dia di un Salon di Reino di Testigonan di Jehova den Martos, Jaén, Spaña. E corant a puntra, “Con ta posibel cu den e mundu actual basá riba egoismo, hende boluntario di vários region di Spaña a bini inegoistamente na Martos pa lanta un edificio cu a bati tur récord pa rapides, perfeccion, i organisacion?” Pa contestá e pregunta aki, e artículo a cita palabra di un dje trahadornan boluntario: “E mérito simplemente ta debí n’e echo cu nos ta un pueblo siñá pa Jehova.”

[Plachi na página 10]

Mejorada del Campo

Salon di Reino na Martos